ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމުގެ ރިޔާސަތަށް މިއަދު ދެ އަހަރު ފުރުނުއިރު، ތަރައްޤީއާއި ތަމައްދުން ހާސިލްކުރުމަށްޓަކައި އުމްރާނީ އަދި އިޤްތިސާދީ ތަރައްޤީއާއި ގުޅުންހުރި މުހިއްމު މަޝްރޫޢުތައް ކުރިއަށް ގެންދިއުމުގައި ސަރުކާރުން މުހިއްމު މަސައްކަތްތަކެއް ވަނީ ކޮށްފައެވެ.އަދި އެހާމެ މުހިއްމު މަސައްކަތްތަކެއް މިހާރުވެސް ކުރައްވަމުން ގެންދަވާކަން ފާހަގަކޮށްލަން ޖެހެއެވެ.މި ގޮތުން ސަރުކާރުން އެންމެ އިސްކަމެއްދީގެން ކުރިއަށްގެންދާ މަޝްރޫޢުތަކުގެ ތެރޭގައި އިބްރާހިމް ނާސިރު އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުއާއި ހުޅުމާލެ ޔޫތް ސިޓީގެ މަޝްރޫޢުއާއި މާލޭ ޕޯޓް ތިލަފުއްޓަށް ބަދަލުކުރުމުގެ މަޝްރޫޢުއާއި އައި ހެވަންގެ މަޝްރޫޢުތައް ތަންފީޒު ކުރުމަށްޓަކައި ސަރުކާރުން ދަނީ މަސައްކަތްތަކެއް ކުރަމުންނެވެ.މި މަޝްރޫޢުތައް ނިމި މުޅި ޤައުމަށް އެކަމުގެ ފައިދާ ވާނެ ދުވަހަކަށް ރައްޔިތުން އިންތިޒާރު ކުރަމުންދާއިރު މި މަސައްކަތްތައް މިހާރު ގޮސްފައިވާ ހިސާބު ބަލާލުން މުހިއްމެވެ. އައި ހެވަން މަޝްރޫއަށް ބަލާއިރު އެ މަޝްރޫޢުގެ ތަފްސީލީ ފީސިބިލިޓީގެ މަސައްކަތް ކޮންސަލްޓެންސީގެ ދާއިރާގައި މަޝްހޫރު ކުންފުންޏެއް ކަމަށްވާ ބޮސްޓަން ކޮންސަލްޓިންގް ގްރޫޕާއެކު ކުރިއަށް ގެންގޮސް މިހާރު ވަނީ މުޅިން ނިންމާލާފައެވެ.ސަރުކާރުގެ ވިސްނުމަކީ ކުރިއަށް އޮތް ދުވަސްތަކުގެ ތެރޭގައި އިންވެސްޓަރުންނާއި އެކު މި މަޝްރޫޢުގެ މަޝްވަރާތައް ފެށުން ކަމަށް މަޢުލޫމާތު ލިބެއެވެ. އަދި މިހާތަނަށް ޓްރާންސްޝިޕްމަންޓް އަދި ލޮޖިސްޓިކްސްގެ ދާއިރާގެ ބޮޑެތި ކުންފުނިތަކުން މި މަޝްރޫޢަށް ޝައުގުވެރިވާކަން ފާޅުކޮށްފައިވާކަމަށްވެސް ސަރުކާރުންވަނީ ހާމަކުރައްވާފައެވެ.ދެން އޮތީ މާލޭ ޕޯޓް ތިލަފުއްޓަށް ބަދަލުކުރުމުގެ މަޝްރޫޢުއެވެ. މި މަޝްރޫޢާއި ގުޅޭ އިތުރު ޕްރޮޕޯޒަލްތަކެއް ލިބި މިހާރުވެސް ސަރުކާރުންދަނީ އެ ޕްރޮޕޯސަލްތައް ދިރާސާ ކުރައްވަމުންނެވެ. މި ގޮތުން މިހާތަނަށް ލިބިފައިވާ ހުށަހެޅުންތަކުގައި ތަފާތު އެކި ވިޔަފާރީގެ މޮޑެލްތަކުގެ ދަށުން ޕޯޓް ތަރައްޤީކޮށް ހިންގުމަށް ހުށަހަޅާފައިވާކަމަށް ސަރުކާރުން ހާމަކުރައްވައެވެ.ސަރުކާރުން އެންމެ ބޮޑު އަހައްމިއްޔަތު ކަމެއްދީގެން ކުރިއަށް ގެންދާ އިބްރާހިމް ނާސިރު އިންޓަރނޭޝަނަލް އެއަރޕޯޓް ތަރައްޤީ ކުރުމުގެ އަމަލީ މަސައްކަތްތައް މިހާރުވަނީ ފެށިފައެވެ.މިއީ މުޅި ޖުމްލަ ގާތްގަނޑަކަށް 800 މިލިއަން އެމެރިކާ ޑޮލަރުގެ ބޮޑު މަޝްރޫޢެކެވެ. އެއަރޕޯޓް ތަރައްޤީގެ މަޝްރޫޢުއަށް ޗައިނާގެ އެގްޒިމް ބޭންކް މެދުވެރިކޮށް ދެއްވާ ލޯން އެޕްރޫވްކުރުމުގެ އެންމެ ފަހު މަރުހަލާއަށްވެސް މިހާރުވަނީ އާދެވިފައެވެ.ކޮންމެއަކަސް މިދަފަ ތަރައްޤީގެ މަޝްރޫޢުތައް ކުރިއަށްދާ ގޮތަށް ބަލާލުމުން އަންގައިދެނީ ޤައުމު ހިންގުމުގައި ސަރުކާރުގެ ޤާބިލްކަމެވެ. އަދި ދެއަހަރުގެ ކުރު މުއްދަތެއްގައި ސަރުކާރުން މި ހާސިލްކުރަމުންދާ ކާމިޔާބީ ތަކުގެ ފައިދާ މުސްތަޤްބަލުގައި ކުރާނީ ދިވެހި ރައްޔިތުންނަށްކަން ގައިމެވެ.