ސ. ހިތަދޫ ޝަރަފުއްދީން ސްކޫލުގައި އިމާރާތްކުރާ ކްލާސްރޫމްތައް އެޅުމުގެ މަސައްކަތް އިނޯކާ ޕްރައިވެޓް ލިމިޓެޑާ ހަވާލުކޮށްފިއެވެ.
ޕީއެސްއައިޕީގެ ދަށުން ކުރިޔަށް ގެންދާ މި މަޝްރޫއުގައި އިނޯކާ ޕްރައިވެޓް ލިމިޓެޑުގެ ފަރާތުން ސޮއި ކުރެއްވީ ޕްރޮކިއުމަންޓް މެނޭޖަރ މުޙައްމަދު ހަމްދޫނެވެ. އަދި މިނިސްޓްރީ އޮފް އެޑިއުކޭޝަންގެ ފަރާތުން މި އެއްބަސްވުމުގައި ސޮއި ކުރެއްވީ މިނިސްޓަރ އޮފް ސްޓޭޓް ފޮރ އެޑިއުކޭޝަން އަހުމަދު ރިޔާޒުކަމުގައި އެޑިއުކޭޝަން މިނިސްޓްރީން ވިދާޅުވެއެވެ.
މި މަޝްރޫއުގެ ދަށުން ޝަރަފުއްދީން ސުކޫލުގައި 18 ކްލާސްރޫމް އިމާރާތް ކުރަން ހަމަޖެހިފައިވާ ކަމަށް އެޑިއުކޭޝަން މިނިސްޓްރީން ވިދާޅުވެއެވެ. އަދި މި މަޝްރޫޢުގެ ސަބަބުން އެ ސްކޫލަށް ދިމާވެފައިވާ ޖާގައިގެ ދަތިކަމަށް އަވަސް ހައްލެއް ލިބިގެންދާނެކަމަށްވެސް އެ މިނިސްޓްރީން ވިދާޅުވެއެވެ.
11 މިލިއަން ވުރެ ގިނަ ރުފިޔާ ޚަރަދުކޮށްގެން ކުރިޔަށް ގެންދާ މި މަޝްރޫއު އިނޯކާ ޕްރައިވެޓް ލިމިޓެޑާ ހަވާލުކުރީ އެއް އަހަރު ތެރޭ މަސައްކަތް ނިންމާ ހަވާލުކުރާ ގޮތަށެވެ. އެހެންކަމުން، 2022 ވަނަ އަހަރު އޭޕްރިލް މަހުގެ ނިޔަލަށް މަސައްކަތް ނިންމުމަކީ އަމާޒެއްކަމަށް އެޑިއުކޭޝަން މިނިސްޓްރީން ވިދާޅުވެއެވެ.