ހިޔާ ހައުސިންގ ޔުނިޓްތަކަށް ކައްކާ ގޭސް ގުޅާނީ، ގޭސް ވިއުގައަކުން ކަމަށް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވެއްޖެއެވެ. ފްލެޓަށް ފުރަތަމަ މީހުން ވަންނައިރު މަސައްކަތް ނުނިމުނު ނަމަވެސް، ވަރަށް އަވަހަށް ޚިދުމަތް ފެށުމަށް މޯލްޑިވް ގޭސްއާއެކު ދަނީ މަސައްކަތް ކުރަމުންނެވެ. މިއީ މިގޮތަށް ރާއްޖޭގައި ކައްކާ ގޭސް ފޯރުކޮށްދިނުމަށް އަޅާ ފުރަތަމަ ވިއުގައެވެ.
ހިޔާ މަޝްރޫޢުގައި މިހާރު ކުރިއަށްދަނީ ފްލެޓްތަކަށް މީހުން ބަދަލުވުމަށް ކުރިއަށްގެންދަންޖެހޭ ފަހުގެ މަސައްކަތްތަކެވެ. ފައިނަލް ލިސްޓް އާއްމުކޮށް، ފްލެޓްތަކުގެ ގުރުއަތުލުމުގެ މަސައްކަތް ވަނީ ފަށާފައެވެ.
މީހުން ބަދަލުވުމުގެ ކުރިން ފްލެޓްތަކުގައި ހުންނަންޖެހޭ އާއްމު ޚިދުމަތްތައް ޤާއިމުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީންވަނީ ފަށާފައެވެ. ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީގެ މެނޭޖިންގ ޑިރެކްޓަރ ސުހައިލް އަޙުމަދު ވިދާޅުވީ މީހުން ބަދަލުވުމުގެ ކުރިން އެ ސަރަޙައްދަށް އާއްމު ގިނަ ވިޔަފާރިތަކާއި ޚިދުމަތްތައް އަންނާނެކަމަށެވެ.
ހިޔާ ފްލެޓްތަކުގެ އެންމެ ތިރީ ފަންގިފިލާ ޚާއްސަކުރަނީ ވިޔަފާރިތަކާއި އާއްމު ޚިދުމަތްތައް ޤާއިމުކުރުމަށެވެ. މިއީ ހިޔާ މަޝްރޫޢުއިން އުނިކުރި 280 ޔުނިޓް ސަރަޙައްދުގައި ހަދާ ތަންތަނެވެ. މީގެތެރޭގައި ކުދި ފިހާރަތަކާއި، ސުޕަރ މާކެޓާއި، ބޯކޮށާ ތަންތަނާއި، ބުކްޝޮޕާއި، ބޭސްފިހާރައާއި، ކްލިނިކާއި، ކެފޭ ރެސްޓޯރަންޓްފަދަ ޚިދުމަތްތަކަށް ޖާގަވަނީ ކަނޑައަޅާފައެވެ. ސުހައިލް ވިދާޅުވީ މި ތަންތަން ބިޑަށް ހުޅުވާލާ ދޫކުރުމުގެ މަސައްކަތް ފަށާފައިވާއިރު، މި މަހުގެ ފަހުކޮޅު ބައެއް ޕްލޮޓްތައް ހަވާލުކުރެވޭވަރުވާނެކަމަށެވެ. ސަރުކާރުން ލަފާކުރަނީ އަންނަ ޖުލައި މަހު ހިޔާ ފްލެޓްތަކުގައި މީހުންނަށް ދިރިއުޅެން ފެށޭނެކަމަށެވެ.
ފްލެޓްތަކަށް ގޭސް ފޯރުކޮށްދިނުމުގައިވެސް ފަސޭހަ އިންތިޒާމްތަކެއް އެޗްޑީސީންދަނީ ހަމަޖައްސަމުންނެވެ. މިފްލެޓްތަކަށް ގޭސް ވިއުގައެއް މެދުވެރިކޮށް ގޭސް ފޯރުކޮށްދިނުމަށް ކުރާ މަސައްކަތަކީ، މިގޮތަށް ރާއްޖޭގައި ކުރާ ފުރަތަމަ މަސައްކަތެވެ. ގޭސް ފޯރުކޮށްދިނުމަށް ވިއުގައެއް އެޅުމަށް ނިންމާފައިވަނީ އުސް އިމާރާތްތަކަށްވާތީ، ގޭސް ފުޅި އަރުވާ ބޭލުމުގައި ދިމާވާނެ ތަކުލީފުތައް ކުޑަކުރުމަށެވެ.
"ކޮންމެ ފްލެޓަކަށް ލިފްޓުން ގޭސް ފުޅި އެރުވުމަކީވެސް ވާނީ ދަތިކަމަކަށް. މޯލްޑިވް ގޭސްއާ ވާހަކަދައްކައިގެން މިދަނީ ގޭސްފުޅި ތިރީގައި ބަހައްޓައިގެން ޕައިޕް ލައިނަކުން ފްލެޓަށް ގޭސް ގުޅޭނެ ގޮތެއް ހަމަޖައްސަމުން. ނަމަވެސް މީހުން ފުރަތަމަ ވަންނައިރު ނުނިމިދާނެ. އެކަމަކުވެސް ލަސްތަކެއް ނުވެ މި ޚިދުމަތްވެސް ޤާއިމުކޮށް ޚިދުމަތް ދެވޭނެ." ސުހައިލް އަޙުމަދު ވިދާޅުވިއެވެ.
މީހުން ބަދަލުވާއިރު ފްލެޓްތަކުން ކުނި ޖަމާކުރުމަށް ސަރަޙައްދުތައް ހަމަޖައްސާނެއެވެ. ކޮންމެ ދުވަހަކުވެސް ކުނި ނަގާ، ކުނި ނައްތާލުމުގެ މަސައްކަތް ކުރިއަށްގެންދާނީ ވެމްކޯއިންނެވެ.
ސުހައިލް ވިދާޅުވީ 16ޓަވަރުގެ ކަންކަން ބެލެހެއްޓުމަށް، ޖުމްލަ 8 މެނޭޖްމަންޓް އޮފީސް ފްލެޓްތަކުގެ ތިރީގައި ހުންނާނެކަމަށެވެ.
ހިޔާ މަޝްރޫޢަކީ ހުޅުމާލޭ ދެވަނަ ފިޔަވަހީގައި ކުރިއަށްދާ ބޯހިޔާވަހިކަމުގެ އެންމެ ބޮޑު މަޝްރޫޢުއެވެ. ހިޔާގެ 6720 ހައުސިންގ ޔުނިޓަށް 25000އަށްވުރެ ބޮޑު އާބާދީއެއް ބަދަލުވާނެކަމަށް ބެލެވެއެވެ. މި އާބާދީއަށް ދަތިކަމެއްނެތި އާއްމު ޚިދުމަތްތައް ލިބޭވަރަށް އިންތިޒާމްތައް ހަމަޖެއްސުމުގެ މަސައްކަތް ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީންދަނީ ކުރަމުންނެވެ.