ހިޔާ ފްލެޓްތަކުގެ ގުރުއަތުލުން، ދިހަވަރަކަށް ދުވަހުގެ ތެރޭގައި ނިންމައި، ފްލެޓް ލިބުނު މީހުންނާއެކު އެގްރިމެންޓްގެ މަސައްކަތް ފަށާނެކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ވިދާޅުވެއްޖެއެވެ. އެޗްޑީސީން ވިދާޅުވީ ފްލެޓްތަކަށް ފައިސާ ދެއްކޭނެ އުސޫލު ފައިނަލްކުރުމުގެ މަސައްކަތްވެސް ކުރަމުންދާކަމަށެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އެޗްޑީސީގެ މެނޭޖިންގ ޑައިރެކްޓަރ ސުޙައިލް އަޙްމަދު ވިދާޅުވީ ގުރުއަތު ނެގުން ނިމުމާއެކު އެގްރިމެންޓްތައް ހެދުމުގެ މަސައްކަތް ފަށާނެކަމަށެވެ. އެގޮތުން އެގްރިމެންޓްތައް ތައްޔާރުކުރުމާއި ފްލެޓްތަކަށް ފައިސާ ދެއްކުމުގެ އުސޫލުތަށް ފައިނަލްކުރުމުގެ މަސައްކަތްވެސް ކުރަމުންދާކަމަށް އޭނާ ވިދާޅުވިއެވެ. ހިޔާ ހައުސިންގ ޔުނިޓްގެ އަގުގެ ގޮތުގައި ކަނޑައަޅާފައިވަނީ މަހަކަށް 7،500 ރުފިޔާއެވެ. ސަރުކާރުންވަނީ ދެ ގޮތަށް ފައިސާ ދެއްކޭނެ އިންތިޒާމް ހަމަޖައްސާނެކަމަށް ވިދާޅުވެފައެވެ. އެގޮތުން ޑައުންޕޭމަންޓް ދައްކައިގެންނާއި ނުދައްކާ މަހުން މަހަށް ފައިސާ ދައްކާގޮތަށްވެސް ފްލެޓަށް ވަދެވޭނެކަމަށް ސަރުކާރުން ވިދާޅުވެއެވެ.
"މިދަނީ ބަލަމުން ޑައުން ޕޭމަންޓް ދައްކާ މީހުންނަށް ހަމަޖެހިގެންދާނެ ގޮތްތައް. ފުރަތަމަ ޑައުންޕޭމަންޓް 20،000 ނޫނީ 50،000ދައްކާ މީހާއަށް ކިހާވަރެއްތޯ ކުޑަވާނީ. އެގޮތަށް ޕެކޭޖުތަނެއް އިޢުލާންކުރާނީ." ސުޙައިލް ވިދާޅުވިއެވެ.
އޭނާ ވިދާޅުވީ ގުރުއަތު ނަގާ ނިންމުމުގެ ކުރިން، އެގްރިމަންޓްގައި ހިމެނޭ ކަންކަމާ ފައިސާ ދެއްކުމާ ގުޅޭގޮތުން ހަދާ އުސޫލުތަށް އިޢުލާންކުރާނެކަމަށެވެ. އަދި އެގްރިމަންޓްގައި ސޮއިކުރުމުގެ ކުރިން، އެގްރިމެންޓްގައި ހުންނާނެ ކަންކަންވެސް އާއްމުކޮށް އިޢުލާންކުރާނެކަމަށެވެ.
ފްލެޓް ނަންބަރު ކަނޑައެޅުމަށް ހިޔާ މަޝްރޫޢުގެ ގުރުއަތު ނެކުން ކުރިއަށް ނުގެންދާ 7 ކެޓަގަރީގެ ގުރުއަތުނެގުން އާދިއްތަދުވަހު ފަށާނެކަމަށް އެޗްޑީސީންވަނީ ވިދާޅުވެފައެވެ. ގުރުއަތު ނެގުން ކުރިއަށްގެންދަނީ ޓީވީން ލައިކްކޮށް ދައްކާގޮތަށްކަމުން، ކޮންމެ ދުވަހަކުވެސް ކުރިއަށްގެންދެވޭނީ 600 ފްލެޓްގެ ގުރުއަތު ނެގުންކަމަށް ސުޙައިލް ވިދާޅުވިއެވެ.
ލިބޭ ފްލެޓްގެ ނަންބަރު ކަނޑައެޅުމަށް ނަގާ ގުރުއަތުލުން ފުރަތަމަ ކުރިއަށް ގެންގޮސްފައިވަނީ "ޚާއްސަ އެހީއަށް ބޭނުންވާ މީހުންގެ ކެޓަގަރީ"އިންނެވެ. މި ގުރުއަތުލުން ކުރިއަށްގެންދިޔައީ މިދިޔަ މަހުގެ 21ވަނަ ދުވަހުއެވެ. އެގޮތުން މި ކެޓަގަރީން ފްލެޓް ލިބުނު 188 މީހުންނަށް ލިބޭ ފްލެޓްގެ ނަންބަރުވަނީ ކަނޑައަޅާފައެވެ. މި ކެޓަގަރީގެ ފްލެޓްތައް ދީފައިވަނީ، ހިޔާ އިމާރާތްތަކުގެ 1ވަނަ ފަންގިފިލާއިންނެވެ.
ސުޙައިލް ވިދާޅުވީ ގުރުއަތު ނެގުން ކުރިއަށްގެންދަނީ ހައުސިންގ މިނިސްޓްރީއިން އެޗްޑީސީއަށް ލިސްޓްތައް ފޮނުވަމުންދާ ނިންވަރުންކަމަށެވެ. މިހާރު ހުރިހާ ލިސްޓްތަކެއް ލިބިފައިވާތީ، ދިހަވަރަކަށް ދުވަހުގެ ތެރޭގައި ގުރުއަތުނެގުން ނިންމާލެވޭނެކަމަށް ސުޙައިލް ވިދާޅުވިއެވެ.
"އެއް ދުވަސްކުރިން އަންގަމުންދާކަން، ޖެހިގެން އަންނަ ދުވަހު ގުރުއަތު ނެގުން އޮންނާނީ ކޮންބައެއްކަން. އަދި ގަޑިވެސް އެ ފަރާތްތަކަށް އަންގާނަން. ގުރުއަތު ނިމުމުން އެސްއެމްއެސްއެއްވެސް ލިބޭނެ އެމީހަކަށް ލިބުނު ފްލެޓް ނަންބަރުގެ މަޢުލޫމާތު ހިމެނޭ." ސުޙައިލް ވިދާޅުވިއެވެ.
ހިޔާ ފްލެޓްތަކުގެ ބޮޑެތި މަސައްކަތްތައް ނިމުނުނަމަވެސް، މުށި ޖެހުމާއި ދޮރު ހަރުކުރުމާއި ބޮކި ހަރުކުރުންފަދަ މަސައްކަތްތައް އަދި މުޅިން ނިންމާފައެއް ނުވެއެވެ. މި މަސައްކަތް ކުރުމަށްޓަކާ 3 މަސްދުވަހުގެ މުއްދަތެއް ފްލެޓްތަކުގެ ވެރިންނަށް ދޭނެއެވެ. މި 3 މަހު ޔުނިޓްތަކުން ކުލި ނަގަމުން ނުދާނެކަމަށް އެޗްޑީސީން މަޢުލޫމާތުދެއެވެ. އަދި މުއްދަތުގެ ކުރިން މަސައްކަތް ނިންމައި ޢާއިލާތަކުން ފްލެޓަށް ބަދަލުވިނަމަވެސް، ކުލި ނުނަގާނެކަމަށްވަނީ ވިދާޅުވިއެވެ.
ހިޔާ މަޝްރޫޢުގައި ހިމެނެނީ 6،720 ހައުސިންގ ޔުނިޓެވެ.