ފްލެޓް ކޮމިޓީން ކޮށްފައިވާ މަސައްކަތަކީ ބަލައިގަނެވޭ ރަނގަޅު މަސައްކަތްތަކެއްކަމަށާއި ، ނަމަވެސް ބައެއް ފޯމްތަކަށް ޕޮއިންޓް ދީފައިވާ ގޮތް އަލުން ބެލުމަށް މަޖިލީހުގެ ރިޕޯޓްގައި އަންގާފައިވަނީ، ބައެއް އާއިލާތަކުގެ ޝަކުވާތައް ލިބެމުންދާތީކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ޤައުމީ ތަރައްޤީއާ ތަރިކައިގެ ކޮމިޓީން ވަނީ ހިޔާ މަޝްރޫޢުއާ އަދި މި ސަރުކާރުގެ ބޯހިޔާވަހިކަމުގެ ސިޔާސަތުތަކާ ގުޅޭ ދިރާސާ ރިޕޯޓެއް ތައްޔާރުކޮށްފައެވެ. 138 ޞަފުހާގެ ރިޕޯޓަކީ މަޖިލީހުގެ ކޮމިޓީއަކުން މިހާތަނަށް ކުރެވުނު އެންމެ ބޮޑު އެއް މަސައްކަތްކަމަށް ނަޝީދު ވިދާޅުވިއެވެ.
ރިޕޯޓުގައި ހުރި ކަންކަން ތަފްސީލްކޮށްދެއްވުމަށް ބޭއްވި ނޫސްވެރިންގެ ބައްދަލުވުމުގައި މަޖިލީހުގެ ރައީސް، ރައީސް ނަޝިދު ވިދާޅުވީ މިފަދަ ރިޕޯޓެއް އެކުލަވާލުމުގެ އެންމެ ބޮޑު ބޭނުމަކީ ކުރިއަށް އޮތްތާނގައި، ހިޔާ މަޝްރޫޢުގައި ހުރި ފަދަ ބޮޑެތި މައްސަލަތައް ތަކުރާރުނުވުންކަމަށެެވެ.
ނަޝީދު ވިދާޅުވީ މިދިޔަ ސަރުކާރުގައި ފްލެޓް ލިސްޓް އެކުލަވާލުމުގައި އަމިއްލަ މަސްލަހަތާ މަންފާ ހިމެނޭގޮތަށް، ގިނަ މަސައްކަތްތަކެއް ކޮށްފައިވާކަމަށް ޤަބޫލުކުރައްވާ ކަމަށާއި އެ ފަރާތްތަކަށް ފިޔަވަޅުވެސް އަޅަންޖެހޭނެކަމަށެވެ.
ހިޔާ ފްލެޓްތަކާ ގުޅޭ މައްސަލަތައް ބެލުމަށް 2018 ވަނަ އަހަރު ސަރުކާރުންވަނީ ފްލެޓްތަކުގެ މައްސަލަ ބަލާ ކޮމިޓީ އުފައްދަވާ، ފްލެޓް ދީފައިވަނީ އެންމެ ޙައްގުވެރި ފަރާތްތަތަކަށްކަން ކަށަވަރުކުރުމަށް ގިނަ މަސައްކަތްތަކެއް ކޮށްފައެވެ. މަސައްކަތް ނިންމައި މިހާރު ދާއިމީ ލިސްޓް އިޢުލާންކޮށްފައިވާއިރު، މިކަމާ ގުޅޭގޮތުން ހުރި ޝަކުވާތައް އަންނަނީ އަދިވެސް ކަމާ ގުޅޭ ފަރާތްތަކަށް ލިބެމުންނެވެ. އެގޮތުން ފްލެޓް ލިބުމުން މަހުރޫމުވި ބައެއް އާއިލާތަކުން އެ މައްސަލަ ވަނީ މަޖިލީހުގެ ސަމާލުކަމަށްވެސް ގެނެސްފައިވެއެވެ.
ނަޝީދު ވިދާޅުވީ ހާލަތު ބެލިގޮތާމެދު ހިތްހަމަނުޖެހިގެން 119 ޝަކުވާއެއް ހުށައަޅާފައިވާކަމަށާއި މިގޮތަށް ހުރި މައްސަލަތައް އަދިވެސް އިތުރަށް ތަޙުޤީގުކުރުމަށް އެދިފައިވާނޭކަމަށެވެ.
"ޕްލެޓް ކޮމިޓީން ވަނީ ބޮޑެތި މަސައްކަތްތައް ކޮށްފައި. ނަމަވެސް މަޖިލީހަށާ ކަމާގުޅޭ ބައެއް އިދާރާތަކަށް އަދިވެސް މައްސަލަ އެބަ ހުށައަޅާ. ހުރިހާ މައްސަލަތަކެއް ނޫން، ފާހަގަކުރެވޭ ބޮޑެތި ޝަކުވާތައް އަލުން ބެލުމަށް އަންގާފައިވަނީ." ނަޝީދު ވިދާޅުވިއެވެ.
ދިރާސާގެ ވާހަކަތަކަށް އަލިއަޅުއްވާލައްވާ ރައީސް ނަޝީދު ވިދާޅުވީ ހިޔާ މަޝްރޫޢޫގެ ފްލެޓްތައް ދިނުމުގެ އުސޫލުގައި ހުރި ގިނަ މައްސަލަތަކެއް ފާހަގަކޮށް އެ ކަންކަން ރަނގަޅުކުރުމަށް ލަފާ ދީފައިވާކަމަށެވެ. އެގޮތުން ސިވިލް ސަރވިސް ކެޓަގަރީގައި ހުރި ފަންނީ މުޢައްޒަފުންނަށް ޚާއްސަކުރި ފްލެޓްތައް، އެ ފަރާތްތަކާ ވާހަކަދައްކައިގެން އެމީހުންގެ އާމްދަނީއާ އެކަށީގެންވާ އެހެން ހައުސިންގ މަޝްތޫޢުއެއްގައި ހިމެނުމަށް ވަނީ ލަފާދީފައެވެ.
ނަޝީދު ވިދާޅުވީ ސަރުކާރު ހަވާލުވިއިރު ހިޔާ މަޝްރޫއުގެ ނިމިފައިވަނީ ދެބައިކުޅަ އެއްބައި މަސައްކަތްކަމަށެވެ. އަދި ފްލެޓް ހަވާލުނުކުރެވި ލަސްވަނީވެސް ޔުޓިލިޓީއާ ގުޅޭ މަސައްކަތްތައް އަދިވެސް ނުނިމޭތީކަމަށް ވިދާޅުވިއެވެ.
ނަޝީދު ވިދާޅުވީ 2008 ވަނަ އަހަރުން ފެށިގެން މިހާތަނަށް ބޯހިޔާވަހިކަމުގެ މަޝްރޫޢު ކުރިއަށްގެންދިއުމަށް 33 ކޮންޓްރެކްޓް ހަދާފައިވާއިރު، މީގެތެރޭގައި އެކަށީގެންވާ ގޮތުގައި ކުރިއަށްނުދާ ގިނަ މަސައްކަތްތައްވެސް ހިމެނޭކަމަށެވެ. އަދި އެކަމަށްވެސް ކޮމިޓީގެ ރިޕޯޓުގައި ލަފާ އަރުވާފައިވެއެވެ.
ރައީސް ނަޝީދު ވިދާޅުވީ މީގެތެރެއިން ކުރިއަށްނުދާ މަޝްރޫޢުތަކުގެ އެއްބަސްވުން އުވާލުމަށާއި އަދި ކުރިއަށްގެންދެވޭ މަޝްރޫޢުތައް ކުރިއަށްގެންދިއުމަށް ލަފާ ދީފައިވާކަމަށެވެ. އަދި މިގޮތުން އެއްބަސްވުން އުވާލާއިރު ދަޢުލަތަށް ގެއްލުން ނުވާގޮތަށް އެކަން ކުރިއަށްގެންދިއުމަށްވެސް ލަފާ ދީފައިވާކަމަށް ރައީސް ނަޝީދު ވިދާޅުވިއެވެ.