3 މީހުންނާއެކު ދަތުރުކުރި ތެޔޮ އުފުލާ ބޯޓެއް އަޑިއަށް ގޮސްފިއެވެ.
އެމްއެންޑީއެފްއިން ވިދާޅުވީ ކަނޑު ގަދަވުމުގެ ސަބަބުން ތެޔޮ އުފުލާ ބޯޓެއް އަޑިއަށްދާކަމުގެ މަޢުލޫމާތު އެމްއެންޑީއެފަށް ލިބުނީ މިއަދު ހެނދުނު 11:00 އެހާއިރުކަމަށެވެ.
އެމްއެންޑީއެފުން ވިދާޅުވި ބޯޓުން ދަތުރުކުރި މީހުން ސަފާރީއަކަށް ނަގާފައިވާކަމަށާއި އެއްވެސް މީހަކަށް ގެއްލުމެއް ލިބުނުކަމުގެ މަޢުލޫމާތުވެސް ލިބިފައިނުވާކަމަށެވެ.
އެމްއެންޑީއެފްއިން ވިދާޅުވީ "ސަވާރީ" ނަމަކަށް ކިޔާ ތެޔޮ އުފުލާ ބޯޓު، 10000 ލީޓަރުގެ ޑީސަލާއެކު ދަތުރުކޮށްފައި ވަނީ ތިލަފުށީން ހުޅުމާލެއަށެވެ. އަދި އަޑިއަށްދިޔަ ބޯޓު ފުންކުރުމުގެ މަސައްކަތްކުރަމުންދާކަމަށް އެމްއެންޑީއެފްއިން ވިދާޅުވިއެވެ.
އެމްއެންޑީއެފުން ވިދާޅުވީ މޫސުން ގޯސްވުމާ ގުޅިގެން ކަނޑުމަތީގެ ޙާދިސާތައް ހިނގާކަމުގެ ރިޕޯޓްތައް ލިބެމުން އަންނަކަމަށެވެ. އެހެންކަމުން ކަނޑު ދަތުރުކުރާ ފަރާތްތަކުން މޫސުމަށް ސަމާލްވުމަށް ވަނީ އިލްތިމާސްކޮށްފައެވެ.
Kan'du dhathuru kuravva faraaiythakun moosumah samaaluvumah ilthimaas kuran.https://t.co/Eevo7Tz1EP pic.twitter.com/PYUKqfrXZv
— Maldives National Defence Force (@MNDF_Official) March 29, 2021
މޫސުން ގޯސްވެ އެކި ވަގުތުތަކުގައި ރާއްޖޭގެ އެކި ސަރަޙައްދުތަކަށް މޫސުމާބެހޭ އެލަރޓްތައްވެސް ދަނީ ނެރެމުންނެވެ. އެގޮތުން ބައެއް ވަގުތުތަކުގައި 50 މޭލަށްވެސް ވައި ޖެހެމުން ދާތީ، ކަނޑުތަށް ގަދަވާނެކަމަށް މޫސުމާބެހޭ ޤައުމީ އިދާރާއިން ވަނީ ވިދާޅުވެފައެވެ.
އެމްއެންޑީއެފުން ވިދާޅުވީ ވައިގަދަވެ، ކަނޑުތައް ގަދަވާނެކަމަށް މޫސުމާ ބެހޭ އިދާރާއިން ވިދާޅުވެފައިވާތީ ކަނޑުދަތުރުކުރައްވާ އުޅަނދުފަހަރުގެ އޮޑިވެރިންނާއި، ކެޕްޓަނުން މޫސުމާބެހޭ އެންމެ ފަހުގެ މަޢުލޫމާތު ހޯދުމަށްފަހު ދަތުރުތަށް ރޭވުމަށް އިލްތިމާސްކުރާކަމަށެވެ. މިގޮތުން ދަތުރުކުރާ ފަރާތްތަކުން ދަތުރަށް ފުރުމުގެ ކުރިން އަންގަންޖެހޭ ފަރާތްތަކަށް އެންގުމާއި އަދި އުޅަނދުގައި ލައިފްޖެކެޓާއި މުޢާސަލާތީ ނިޒާމާއި ދިޔަ ހިއްކާ ޕަންޕްފަދަ ތަކެތި ހުރީ ރަނގަޅަށްތޯ ޗެކް ކުރުމަށް އަންގާކަމަށެވެ. ޚާއްޞަކޮށް ކުދި، ސަލާމަތީގޮތުން ރައްކާތެރިކަން ކުޑަ އުޅަނދުފަހަރުގައި ރޭގަނޑު، އަދި ވިއްސާރައިގައި ދަތުރު ނުކުރުމަށްވެސް ވަނީ އިލްތިމާސްކޮށްފައެވެ.
މުދާ އުފުލާ އުޅަނދުފަހަރުތަކުންވެސް މުދާ ބަރުކުރުމުގައި ގަވާއިދުތަކަށް އަމަލު ކުރުމަށްވަނީ އަންގާފައެވެ. އަދި ފަޅުތެރެއާއި ފަޅުން ބޭރުގައި އަޅާފައިވާ އުޅަނދުފަހަރުގެ އޮޑިވެރިންނާއި ކެޕްޓަނުން އޮޑިދޯނިފަހަރު ބެލެހެއްޓުމާއި ދިޔަ ހިއްކުމަށް ސަމާލުކަން ދިނުމަށް ވެސް އެމްއެންޑީއެފުން ވަނީ އަންގާފައެވެ.
އަދި ކަނޑުމަތީގެ އެއްވެސް ހާދިސާއެއް ހިނގައިފިނަމަ، ލަސްނުކޮށް ކޯސްޓްގާޑުގެ ހިލޭ ގުޅޭ ނަންބަރު 191 އަށް ގުޅުއްވުން އެމްއެންޑީއެފުންވަނީ އިލްތިމާސްކޮށްފައެވެ.