ރާއްޖޭގެ ދެކުނުން އުފެދިފައިވަނީ ކޮޅިގަނޑެއްކަމަށާއި އޭގެ ސީދާ އަސަރު ރާއްޖެއަށް ނުކުރާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.
މޫސުމާއި ބެހޭ އިދާރާއިން މިކަން ހާމަކޮށްފައި މިވަނީ މޫސުން ދެނެގަންނަ އެޕްލިކޭޝަންތަކުން ރާއްޖެ ސަރަޙައްދުގައި ތޫފާނެއް އުފެދެމުން އަންނަކަމުގެ އެލަރޓްތަކެއް އަންނަން ފެށުމުން ބައެއް ފަރާތްތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން މެޓް އޮފީހުން ވިދާޅުވީ މި ކޮޅިގަނޑު އުފެދިފައިވަނީ ރާއްޖެއާ އެތައް ސަތޭކަ ކިލޯމީޓަރެއް ދުރުގައިކަމަށެވެ. އަދި މިވަގުތު މިއީ ކޮޅިގަނޑެއްކަމަށާއި މަޑުމަޑުން ކޮޅިގަނޑުގެ ބާރު ގަދަވެ، ތޫފާނަކަށް ބަދަލުވުމުގެ ފުރުޞަތު އޮތްނަމަވެސް، ރާއްޖެއަށް އެކަމުގެ ސަބަބުން އެއްވެސް ނުރައްކަލެއް ކުރާނެކަމަށް ނުބެލެވޭކަމަށް މެޓް އޮފީހުން ވިދާޅުވެއެވެ. ނަމަވެސް ކޮޅިގަނޑު އިރުމައްޗަށް ދަތުރުކުރަމުންދާއިރު، ކޮޅިގަނޑުގެ ވިލާ ދެކުނުގެ އަތޮޅުތަކުގެ މަތިން ދައުރުކުރާނެތީ އެ ސަރަޙައްދަށް މޫސުން ގޯސްވެދާނެކަމަށް ލަފާކުރެވޭކަމަށް މެޓް އޮފީހުން މައުލޫމާތުދެއްވައެވެ. މިކޮޅިގަނޑުގެ އަސަރު އަސަރު ރާއްޖޭގެ ދެކުނުގެ އަތޮޅުތަކަށް ކުރާނެކަމަށް ބެލެވެނީ އާދިއްތަ ނުވަތަ ހޯމަދުވަހުއެވެ. ނަމަވެސް އާދަޔާ ޚިލާފު އަސަރުތަކެއް ރާއްޖެއަށް ކުރާނެކަމަށް ނުބެލެވޭކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.
މެޓް އޮފީހުން ވިދާޅުވީ ހާލަތު ކައިރިން މޮނިޓަރ ކުރަމުންދާކަމަށާއި މިކަމާ ގުޅޭ ފުރިހަމަ މަޢުލޫމާތު ރައްޔިތުންނަށް ފޯރުކޮށްދެމުންދާނެކަމަށެވެ.