ރާއްޖޭގެ ފަތުރުވެރިކަން އިންޑިއާގައި އިޝްތިޙާރުކުރުމަށް ޙާއްސަ ހަރަކާތްތަކެއް ބޭއްވުމަށް ތައްޔާރުވެއްޖެއެވެ.
މި ހަރަކާތްތަކުގައި ރާއްޖެއިން ބައިވެރިވާ ވަފްދުގައި ޓޫރިޒަމް މިނިސްޓަރ އަބްދުﷲ މަޢުސޫމާއި މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދުވެސް ހިމެނިވަޑައިގަންނަވައެވެ.
އިންޑިއާގައި ރާއްޖެއިން ބާއްވާ ހަރަކާތްތަކުގެތެރޭގައި، އިންޑިއާގެ ނިއުދިއްލީގައި ޕްރެސް ކޮންފަރެންސެއްގެ އިތުރުން ރޯޑް ޝޯވްއެއް ބޭއްވުމަށްވަނީ ހަމަޖެހިފައެވެ. މި ހަރަކާތްތައް ކުރިއަށްދާނީ މިމަހުގެ 22 ވަނަ ދުވަހުއެވެ.
ރޯޑް ޝޯވްއަށްފަހު ދެން މި ވަފްދުގެ ފަރާތުން ބައިވެރިވާނީ، ދެކުނު އޭޝިއާ ސަރަޙައްދުގައި ބާއްވާ ފަތުރުވެރިކަމުގެ އެންމެ ބޮޑު އެއް ފެއަރ ކަމުގައިވާ ސައުތް އޭޝިއާ ޓްރެވެލް އެންޑް ޓޫރިޒަމް އެކްސްޗޭންޖް، ސާޓޭ ފެއާގައެވެ.
މިއަހަރުގެ ސާޓޭ ފެއަރގައި އެމްއެމްޕީއާރުސީއާއެކު ރާއްޖޭގެ ފަތުރުވެރިކަމުގެ ސިނާޢަތުގައި ޙަރަކާތްތެރިވާ 13 ކުންފުންޏަކުންނާއި ކަމާއި ގުޅުންހުރި 22 ފަރާތަކުން ބައިވެރިވާނެއެވެ. އިންޑިއާއަކީ ރާއްޖޭގެ ފަތުރުވެރިކަމަށް މުޙިއްމު ޤައުމެކެވެ. ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން އަންނަނީ އިންޑިއާއިންނެވެ.
ރާއްޖޭގެ ފަތުރުވެރިކަން ދުނިޔެއަށް އިޝްތިހާރުކޮށް ރާއްޖެއަށް އަންނަ ފަތުރުވެރިންގެ އަދަދުތައް އިތުރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖެ އިޝްތިހާރުކުރުމަށް ރާއްޖެއިން ބޭރުގައި ބާއްވާ 44 ފެއަރއަކާއި ރޯޑްޝޯއެއްގައި މިއަހަރު ބައިވެރިވާނެކަމަށް އެމްއެމްޕީއާރުސީން ބުނެއެވެ.
އެމްއެމްޕީއާރުސީން މިއަހަރު ބައިވެރިވުމަށް ނިންމާފައިވާ ދުނިޔޭގެ ބައެއް ބޮޑެތި ބައެއް އެހެން ފެއަރ ތަކުގެތެރޭގައި، ސްޕެއިންގައި ކުރިއަށްދާ ފިތޫރު ފެއަރއާއި، ޑަބްލިއުޓީއެމް ލަންޑަންއާއި، އައިޓީބީ އޭޝިއާ، އަދި އައިޓީބީ ޗައިނާ ހިމެނެއެވެ.