ހއ ދިއްދޫގަހުރި އަމާންވެށިން އިތުރު 10 ކުއްޖަކު ޕޮޒިޓިވްވެއްޖެއެވެ.
ހއ.ދިއްދޫގައި ޤާއިމްކޮށްފައިވާ އަމާންވެށީގައި ހުރި ކުއްޖަކު މީގެ ދެ ދުވަސް ކުރިން ޕޮޒިޓިވްވުމާ ގުޅިގެން އެކުއްޖާއާ ކޮންޓެކްޓް ވެފައިވާ ކުދިންގެ ނެގި ސާމްޕަލުގެ ތެރެއިން 10 ކުއްޖެއްގެ ސާމްޕަލް ޕޮޒިޓިވްވެފައިވާ ކަމަށް އެއަތޮޅު ހޮސްޕިޓަލުން ވަނީ ވިދާޅުވެފައެވެ.
ރޭ ޕޮޒިޓިވްވި ކުދިންނާއެކު ދިއްދޫ އަމާންވެށިން ކޯވިޑްއަށް ޕޮޒިޓިވްވި ކުދިންގެ އަދަދުވަނީ 11 އަށް އަރާފައެވެ. ހއ އަމާން ވެށިން ޕޮޒިޓިވްވި ހުރިހާކުދިންވެސް ހއ. ފެމިލީ އެންޑް ޗިލްޑްރަން ސަރވިސް ސެންޓަރުގައި އައިސޮލޭޓް ކުރެވިފައިވާ ކަމަށް ދިއްދޫ ކައުންސިލުން ވިދާޅުވެއެވެ. ހއ. އަމާންވެށީގައި ތިބި 15 ކުދިންވެސް ތިބީ ކަރަންޓީނުގައި ކަމުން އެކުދިންނާ ބައްދަލުވެފައިވަނީ އެތާ ތިބި ކުދިންނާ އެކަނިއެވެ.
ދިއްދޫގައި ގާއިމުކުރި ''ހއ. އަމާންވެށި'' ރަސްމީކޮށް ހުޅުވީ މިމަހުގެ 6 ވަނަ ދުވަހުއެވެ. ހއ. އަތޮޅުގައި ހުޅުވި އަމާންވެއްޓަށް ތިން ޢާއިލާއަކަށް ނިސްބަތްވާ 15 ކުއްޖަކުވަނީ ބަދަލުކޮށްފައެވެ.
ދިއްދޫ ކައުންސިލުން ވަނީ ހޯމް ކަރަންޓީނުގައި ތިބޭ ފަރާތްތަކާ ބައްދަލުކުރުމަށް އެތަންތަނަށް ނުދިއުމަށާއި ކަރަންޓީނުގައި ތިބޭ ފަރާތްތަކުގެ ޒަރޫރީ ބޭނުންތައް ފުރިހަމަ ކޮށްދިނުމުގައި އެހީތެރިވާ މީހުން ވެސް ރައްކާތެރިކަމުގެ ފިޔަވަޅުތަކާއެކު އެމަސައްކަތްތައް ކުރުމަށް އިލްތިމާސް ކޮށްފައެވެ.