ހައި ސްޕީޑް ފެރީ ނިޒާމު ޤާއުމުކުރުމާގުޅޭ ސަރވޭގެ މަސައްކަތްތައް، ފެރީ ނިޒާމުގެ ޚިދުމަތް ޤާއިމުކުރާ ފުރަތަމަ ޒޯންގައި ފަށައިފިއެވެ. މި ޒޯންގައި ހިމެނެނީ ހއ، ހދ، ށ، އަތޮޅެވެ.
ސަރވޭގެ މަސައްކަތްތަށް ކުރިއަށްގެންދަނީ މިނިސްޓްރީ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗާއާ، އެމްޓީސީސީ ގުޅިގެންނެވެ. މިސަރވޭއަކީ ރަށްރަށުގައި ފެރީ ޓަރމިނަލާއި ފެރީ ސްޓޮޕްތައް ހަދާނެ ސަރަޙައްދު ކަނޑައެޅުމާ އަދި އެކަމާގުޅޭގޮތުން ބަލަންޖެހޭ ކަންކަން ބެލުމަށް ކުރިއަށްގެންދާ ސަރވޭއެކެވެ. އެމްޓީސީސީން ވިދާޅުވީ މައި ފެރީޓަރމިނަލް ހެދުމަށް ހަމަޖެހިފައިވަނީ ގިނަ ބަޔަކު ދަތުރުކުރާ ބޮޑެތި ރަށްތަކުގައިކަމަށެވެ. އެގޮތުން 5 ރަށުގައި ފެރީ ޓަރމިނަލް ހަދާނެކަމަށެވެ. އެހެން ރަށްތަކުގައި ހަދާނީ ފެރީ ސްޓޮޕްތަކެކެވެ. މިއިން ކޮންމެ ތަނަކީވެސް މީހުންނަށް މަޑުކޮށްލައިގެން ތިބެވޭނެ އިންތިޒާމްތަކާއެކު ހަދާ ތަންތަނެވެ.
ސަރވޭގެ މަސައްކަތް ފަށާފައިވަނީ، ހައި ސްޕީޑް ފެރީ ނިޒާމުގެ ޚިދުމަތް ފުރަތަމަ ފެށުމަށް ހަމަޖެހިފައިވާ ޒޯން އެކެއްގައެވެ. ޒޯން އެކެއްގައި ހިމެނެނީ ހއ، ހދ، ށ އަތޮޅެވެ. ސަރވޭ ޓީމުން މި 3 އަތޮޅުގެ މީހުން ދިރިއުޅޭ ހުރިހާ ރަށްތަކުގައި ސަރވޭގެ މަސައްކަތްތައް ކުރިއަށް ގެންދާނެއެވެ. 3 އަތޮޅުގައި މީހުން ދިރިއުޅޭ 41 ރަށް އޮވެއެވެ. ސަރވޭ ޓީމުން ފުރަތަމަ މަސައްކަތް ފަށާފައި މިވަނީ މި ޒޯންގައި ހިމެނޭ ހއ.ގެ ރަށްތަކުގައެވެ.
"އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވަރކް" ޤާއިމުކުރުމުގެ މަސައްކަތަކީ ރާއްޖޭގެ ރަށްތަށް ހައިސްޕީޑް ފެރީ ނިޒާމަކުން ގުޅާލުމަށް ކުރިއަށްގެންދާ ބިޔަ މަޝްރޫޢުއެކެވެ. ފެރީގެ ނިޒާމު ޤާއިމުކުރުމުގެ މަސައްކަތާ، އަދި ފެރީ ނިޒާމުގެ ޚިދުމަތް ދިނުމުގެ މަސައްކަތްވެސް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއާއެވެ. ސަރުކާރުން މަސައްކަތްކުރަމުންދަނީ ހައިސްޕީޑް ފެރީ ނިޒާމުން ގުޅާލާ ފުރަތަމަ ޒޯންގެ މަސައްކަތް ނިންމައި، މިއަހަރުގެ އޮކްޓޯބަރުމަހު ޚިދުމަތް ފެށުމަށެވެ.
ހއ، ހދ އަދި ށ އަތޮޅުގައި އިންޓެގްރޭޓަޑް ނޭޝަނަލް ޕަބްލިކް ފެރީ ނެޓްވޯކް ގާއިމުކުރުމުގެ މަޝްރޫޢާ ގުޅޭ ގޮތުން ސަރވޭކުރުމަށް، މި މިނިސްޓްރީ އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީގެ ޓީމެއް ވަނީ ހއ.ހޯރަފުއްޓަށް ގޮސްފައި. pic.twitter.com/7Z0ZxoEWSc
— Min.of National Planning, Housing & Infrastructure (@MoNPHImv) March 6, 2021
މި ޚިދުމަތް ޤާއިމުކުރާނީ ރާއްޖޭގެ އަތޮޅުތައް 6 ޒޯނަކަށް ބަހާލައިގެންނެވެ. ޚިދުމަތް ދިނުމުގައި 3 ރޫޓެއް ބޭނުންކުރުމަށްވެސް ވަނީ ނިންމާފައެވެ. މީގެތެރޭގައި ހިމެނެނީ ކައިރި ރަށްރަށްކުރާ ކުރު ދަތުރުތަކަށް ކޮމިއުޓަރ ލިންކާއި ޚާއްސަ ޙާލަތްތަކުގައި ދުރު ރަށްރަށަށް ބާއްވާ ނޮންކޮމިއުޓަރ ލިންކާއި އެއްޒޯނުން އަނެއް ޒޯނަށް ދަތުރުކުރާ ހައިވޭ ލިންކެވެ.
އެމްޓީސީސީން މިހާރުވަނީ ދަތުރުތަކަށް ބޭނުންކުރާ އުޅަނދުތައް ތައްޔާރުކުރާނެ ބަޔަކު ހޯދުމަށްވެސް ހުޅުވާލާފައެވެ. މި ހައިސްޕީޑް ފެރީތަށް ފަރުމާކުރަނީ މީހުން އުފުލުމަށް ފަސޭހަ، ޖާގަ ތަނަވަސް ފެރީތަކެއްގެ ގޮތުގައިއެވެ. އެމްޓީސީސީންވަނީ މީގެ 17ފެރީ ހޯދުމަށް އިޢުލާންކޮށްފައެވެ.