ރަސްމާލެ: ތާރީޚީ އެންމެ ބިޔަ އިގުތިޞާދީ އަދި ބޯހިޔާވަހިކަމުގެ މަޝްރޫޢާއެކު ތަނަވަސްކަން!

"މޯލްޑިވްސް ވޯޓަރފްރަންޓް އެންޑް މެރީނާ އެޓް ރަސްމާލެ" ތަރައްޤީ ކުރުމުގެ މަޝްރޫއަކީ ރާއްޖޭގެ ތާރީހުގައިވެސް މިހާތަނަށް ހިންގޭ އެންމެ ބޮޑު ބޭރުގެ އިންވެސްޓްމެންޓުގެ އެއްބަސްވުމެވެ.

މިމަޝްރޫޢުގެ އަސްލު ބިނާވެފައިވާ އިގްތިޞާދީ އަސާސްތަކާއި ހަޤީޤީ ތަފާސްހިސާބުތަކަށް ފުންކޮށް ބަލައިލުމުން އެނގެނީ މިއީ ރާއްޖޭގެ މުސްތަޤުބަލު އުޖާލާކޮށްދޭނެ ހަރުދަނާ ޕްލޭނެއް ކަމެވެ.

އެންމެ ބޮޑު އިންވެސްޓްމެންޓު ޕްރޮގްރާމު

ރަސްމާލޭގައި 20 ބިލިޔަން ޑޮލަރުގެ ވޯޓަރފްރަންޓް އަދި މެރީނާ ޕްރޮޖެކްޓެއް ތަރައްޤީކުރުމަށް އަބޫދާބީގެ މަޝްހޫރު ޑިވެލޮޕަރ "އީގަލް ހިލްސް" އާއެކު ދިވެހި ސަރުކާރުން އެއްބަސްވެފައިވަނީ މިމަހުގެ 21ވަނަ ދުވަހުއެވެ. މި އެއްބަސްވުމާއެކު ރަސްމާލެއަކީ ރާއްޖެއަަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނެސްދިނުމަށް ސަރުކާރުން ކުރިއަށްގެންދާ މަޝްރޫޢެއް ކަމަށް ބުނެ މީގެ ކުރިން ރައްޔިތުންނަށް ދައްކަމުންދިޔައީ އެއްވެސް ކުލައެއް ނެތް ހުވަފެނެއް ކަމަށް ގިނަ ބަޔަކު ސޯޝަލް މީޑިއާގެ އެކި މަންސަތަކުގައި އަޑުހަރުކޮށް ދައްކަމުންދިޔައެވެ. އަދި ރަސްމާލެ މަޝްރޫޢު ހުއްޓާލުމަށްވެސް ބައެއް ފަރާތްތަކުން ގޮވާލިއެވެ.

ސަރުކާރުގެ ސްޓްރެޓެޖީ ބިނާވެފައިވަނީ އެއް މަޝްރޫޢު ހުއްޓާލައި އަނެއް މަޝްރޫޢު ހިންގުމުގެ ބަދަލުގައި، ދެ މަޝްރޫޢު އެކުއެކީގައި ކުރިއަށް ގެންދިއުމަށެވެ. މި އެއްބަސްވުމުގެ ދަށުން އީގަލް ހިލްސް ކުންފުނިން ރަސްމާލެއިން އެންމެ ޑޮލަރެއްގެ ފައިދާ ހޯދުމުގެ ކުރިން، އެމީހުންގެ އަމިއްލަ ޚަރަދުގައި 400 އާއި 500 މިލިޔަން ޑޮލަރު އިންވެސްޓްކޮށްގެން ހުޅުމާލޭގައި ތިން ކޮޓަރީގެ 5،000 ހައުސިންގ ޔުނިޓް އަޅައިދޭނެއެވެ. މި ފްލެޓްތަކުގެ އަގު އަދާކުރެވިގެންދާނީ ދައުލަތަށް ލިބޭ 10 އިންސައްތައިގެ ރެވެނިއު ޝެއަރގެ ތެރެއިންނެވެ.

މީގެ މާނައަކީ ދަޢުލަތުގެ ބަޖެޓުން އެއްވެސް ފައިސާއެއް ނުދައްކައި އަދި އިތުރު ދަރަންޏެއް ނުނަގައި، ރައްޔިތުންނަށް އެންމެ ބޮޑަށް ބޭނުންވެފައިވާ ބޯހިޔާވަހިކަން ވަގުތުން ފޯރުކޮށްދެވުމެވެ. ރަސްމާލޭގެ ބިމުން 500 ހެކްޓަރު، މާނައަކީ ބިމުގެ ދެބައިކުޅަ އެއްބައި، ޚާއްޞަކޮށްފައިވަނީ ސީދާ ދިވެހިންގެ ބޯހިޔާވަހިކަމަށެވެ. މިއީ 150،000 އަށްވުރެ ބޮޑު އާބާދީއަކަށް ދިރިއުޅެވޭނެ ސަރަޙައްދެކެވެ. އަދި އަނެއް 500 ހެކްޓަރުގައި ހިންގޭ އިޤްތިޞާދީ ހަރަކާތްތަކަކީ މިބޮޑު އާބާދީ ދިރިއުޅުމަށް ބޭނުންވާ ވަޒީފާތަކާއި ޚިދުމަތްތައް ފޯރުކޮށްދޭނެ މައިބަދައެވެ.

"70%އާ ހަމައަށް ހިއްކުމުގެ މަސައްކަތް އެވަނީ ނިމިފައި. 2-3 މަސްތެރޭ ހިއްކާ ނިމޭނެ. 1100 ހެކްޓަރުގެ ބިމެއް އެއީ. ޙަޤީޤަތުގައި ބިމެއް ކްރިއޭޓްވުމަކީ އެންމެ ބޮޑު އެސެޓް. އޭގެ އިކޮނޮމިކް އަގު ވަރަށް ބޮޑުވާނެ. މިއީ ޤައުމުގެ ވަރަށް ބޮޑު ރައުސްމާލެއް. އެންމެނަށް ގޯތި ހަމަޖައްސާވަރަށް ބިން އެބައޮތް. އެއްވެސް ގޯއްޗެއް ކެންސަލެއް ނުވާނެ. އަދި ފޯމުތައް ރިވިއުކުރަމުން މިހާރު އެ ގެންދަނީ، ޤަބޫލުކުރެވޭ ވަރަށް ގިނަ ރައްޔިތުންނަށް ނުވަތަ ބައެއް ކެޓަގަރީތަކުން އެއްކޮށްގޮތަށް ގޯތި ދެވޭނެ ވަރަށް ބިން އެބައޮތް. ފްލެޓް އެޅޭނެ ޖާގަވެސް އެބައޮތް" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރަސްމާލެއިން ގަންނަ ޕްރޮޕަޓީ އޮޓަމެޓިކުން ވާރުތަ ނުވާނެ

ސަރުކާރުން މިމަޝްރޫޢު އިއުލާންކުރުމާއެކު، ދެކެވޭ ވާހަކަތަކަަށް އިޝާރާތްކުރައްވާ ބިނާރާ ގެދޮރުވެރިކަމާއި ޢުމްރާނީ ތަރައްޤީއާބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ، ބޭރުގެ ފަރާތްތަކަށް މިލްކުވާ ގޮތަށް އެއްވެސް ބިމެއް ފްރީހޯލްޑް އުޞޫލުން ނުވިއްކާ ކަމަށެވެ.

ރާއްޖޭގެ ހުރިހާ ރިސޯޓުތަކެކޭ އެއްފަދައިން، މިސަރަހައްދުގައިވެސް މިފަދަ ކަންކަން ހިނގާނީ ރާއްޖޭގެ ޤާނޫނުތަކާއި ޤަވާޢިދުތަކާ އެއްގޮތަށް ކަމަށެވެ. އަދި އެތަނުން ތަނެއް ގަންނަ ފަރާތްތައް ފާސްކުރުމާއި، ވިސާ ނުދިނުމުގެ ފުރިހަމަ ބާރު އޮންނާނީ ދިވެހި ދައުލަތަށްކަން ފާހަގަކުރައްވާ، ޕްރޮޕަޓީއެއް ގަތުމަކީ ރާއްޖޭގެ ރަށްވެހިކަން ނުވަތަ ދާއިމީ ރެސިޑެންސީ ލިބޭނެ އެއްވެސް ދޮރެއް ނޫން ކަމަށް ވަޒީރު ވިދާޅުވިއެވެ.

"ދައުލަތުން މީހެއްގެ ވިސާ ބާޠިލުކޮށްފިނަމަ، އެމީހަކު ޖެހޭނީ ޤައުމު ދޫކޮށް ދާން. އެމީހާ ގަތް ޢިމާރާތް އޮންނާނީ ދިވެހި ބިމުގައި، ދިވެހި ޤާނޫނުގެ ދަށުގައި، އެހެން ފަރާތަކަށް ވިއްކާލުމަށްޓަކައި. މީގެއިތުރުން، ކުރީގެ ޖީއެމްއާރު އެއްބަސްވުމުގައި އޮތް ފަދައިން ކޮންމެ ފަސިންޖަރެއްގެ އަތުން އެއަރޕޯޓް ޑިވެލޮޕްމަންޓް ޗާޖު ނަގައިގެން ޑިވެލޮޕަރަށް ދޭންޖެހޭ ފަދަ އެއްވެސް ޝަރުޠެއް މި އެއްބަސްވުމަކު ނެތް. ޑިވެލޮޕަރަށް ލިބޭނީ އެމީހުން ބިނާކޮށް ވިއްކާ ތަންތަނުން ލިބޭ އާމްދަނީ އެކަނި," ވަޒީރު ޑރ. މުއްޠަލިބު ވިދާޅުވިއެވެ.

މާލީ މަންފާވެސް ލިބިދޭ ފުރިހަމަ މޮޑެލްއެއް

"މިފަދަ ބޮޑު މަޝްރޫޢަކުން އެއްފަހަރާ ބޮޑު ފައިސާގެ އަދަދެއް، ނުވަތަ އަޕްފްރަންޓް ޕޭމަންޓެއް ނުނަގަނީ ކީއްވެގެންތޯ" މިއީވެސް ގިނަ ބަޔަކު އުފައްދާ ސުވާލެކެވެ. ހަޤީޤަތުގައި އެއްފަހަރު ލިބޭ ފައިސާކޮޅަކަށް ގައުމުގެ ބޮޑު ރައުސްމާލެއް ދޫކޮށްލުމަކީ ދުރުވިސްނޭ ގޮތެއް ނޫން ކަމަށް ޤަބޫލުކުރެވޭތީ، މި އެއްބަސްވުން އެކުލަވާލާފައިވަނީ މުޅިން ތަފާތު ދެމެހެއްޓެނިވި އުޞޫލަކުންނެވެ.

ރާއްޖޭގެ ފަތުރުވެރިކަމުގެ ދާއިރާއަށް ބެލިނަމަވެސް، އެއްފަހަރު ލިބޭ ބިމު ކުއްޔަށްވުރެ އިގުތިޞާދީ ޙަރަކާތްތަކުން ލިބޭ ޓެކުހުގެ އާމްދަނީ އެތައް ގުނައެއް އިތުރެވެ. ދައުލަތަށް އެންމެ ފައިދާހުރި ގޮތަކީ އެއްފަހަރު ދޭ ޗެކަކަށް ބަރޯސާނުވެ، ދިގު މުއްދަތަކަށް ދެމިގެންދާ ޓެކުހާއި ވިޔަފާރީގެ ހަރަކާތްތަކުން އާމްދަނީ ހޯދުމެވެ.

މި ފަލްސަފާގެ މައްޗަށް ބިނާކޮށް ރަސްމާލެ އެއްބަސްވުމުން ދައުލަތަށް ކަށަވަރުކޮށްދެނީ ވަރަށް ފުރިހަމަ މާލީ މޮޑެލްއެއް ކަމަށް މާލީ ކަންކަމާއި ސަރުކާރު ކުންފުނިތަކާބެހޭ ވަޒީރު ޙަސަން ޒަރީރުވެސް ވަނީ ވިދާޅުވެފައެވެ. އެސިޓީގައި ހިންގާ ކޮންމެ ހޮޓަލަކުންނާއި، ކޮންމެ ރެސްޓޯރެންޓަކުންނާއި، ވިޔަފާރިއަކުން ފޯރުކޮށްދޭ ޚިދުމަތަކުން އެއްވެސް ލުޔެއް ނުދީ ޓީޖީއެސްޓީ ދައުލަތަށް ލިބޭނެއެވެ. މީގެ އިތުރުން މާސްޓަރ ޑިވެލޮޕަރަށް ލިބޭ ޖުމްލަ އާމްދަނީގެ %10 ސީދާ ދައުލަތަށް ލިބޭއިރު، ވިއްކާ ކޮންމެ ރިއަލް އެސްޓޭޓް މުޢާމަލާތަކުން %4 ފީއެއް ސަރުކާރަށް ލިބިގެންދާނެއެވެ.

މިނިސްޓަރ ޒަރީރު ވިދާޅުވީ މިމަޝްރޫޢުން ވިއްކާ ހުރިހާ ޕްރޮޕަޓީއަކުން ލިބޭ ފައިސާ ޖަމާކުރަން ޖެހެނީ ރާއްޖޭގެ ބޭންކުތަކުގައި ޤާއިމުކުރެވޭ އެސްކްރޯ އެކައުންޓުތަކަށް ކަމަށް ކަނޑައަޅާފައިވާ ކަމަށެވެ. މިއީ އަބަދުވެސް ބޭރު ފައިސާގެ ތާށިކަމާ ކުރިމަތިލާންޖެހިފައިވާ ރާއްޖޭގެ ބޭންކިންގ ނިޒާމަށް ބޮޑު ލުޔެއް ގެނެސްދިނުމުގެ އިތުރުން، ބޭރުގެ އިންވެސްޓަރުންގެ އިތުބާރު ބޮޑުވެގެންދާނެ ކަމަށް ވަޒީރު ސިފަކުރެއްވިއެވެ.

"ކުރިން އެބަހުރި 200-300 މިލިޔަން ޑޮލަރު އިންވެސްޓްކޮށްފައި ރާއްޖޭގެ މަޝްރޫޢުތަކުގައި. އެއާ ޚިލާފަށް މިއީ ދުނިޔޭގެ އެންމެންނަށް އެންގޭ، ދިވެހި ވިޔަފާރިވެރިންނަށް ކިހާވަރެއްގެ ކުންފުންޏެއްކަން އެންގޭ ބައެއް. މިއާއެކު އިންވެސްޓަރ ކޮންފިޑެންސް އިތުރުވެ، ރާއްޖޭގެ ޕްރައިވެޓް ސެކްޓަރއަށް ބޭނުންވާ ބޭރުގެ އެހީތައް ހޯދުމަށް ބޮޑު ކުރިއެރުމެއް ލިބޭނެ. ފައިނޭންސް ހޯދުމުގެ ފުރުޞަތު ތަނަވަސްވާނެ،" ވަޒީރު ހަސަން ޒަރީރު ވިދާޅުވިއެވެ.

މަޝްރޫޢުގެ ތަރައްޤީގެ މަރުޙަލާގައި ދައުލަތަށް 11 ބިލިޔަން ޔޫއެސް ޑޮލަރަށްވުރެ ބޮޑު އާމްދަނީއެއް ލިބޭނެ ކަމަށް ލަފާކުރެވޭއިރު، ޤައުމީ އިޤްތިޞާދުގެ ތެރެއިން 54،000 އަށްވުރެ ގިނަ އައު ވަޒީފާގެ ފުރުޞަތު އުފެދިގެންދާނެއެވެ. އަދި މިހުރިހާ ފައިދާއެއް ހާސިލުކުރާއިރުވެސް، ސަރުކާރުން އެއްވެސް ލޯނެއް، އެއްވެސް ސޮވަރިން ގެރެންޓީއެއް، އަދި އެއްވެސް ޓެކްސް އިނާޔަތެއް ދޫކޮށްލާކަށްވެސް ނުޖެހޭނެއެވެ. މުޅި މަޝްރޫޢުގެ މާލީ މުޢާމަލާތްތައް ދައުރުވާނީ ދިވެހި ބޭންކުތަކުގެ ތެރެއިން ކަމަށް ވަޒީރު ވިދާޅުވިއެވެ.

20 ބިލިޔަން ޑޮލަރުގެ ބިޔަ މަޝްރޫޢު ހިންގުމަށް ދިން ކުންފުނި:

މިބިޔަ މަޝްރޫޢުގެ އިތުބާރާއި ފުރިހަމަކަން ވަޒަންކޮށްލުމަށްޓަކައި، މާސްޓަރ ޑިވެލޮޕަރެއްގެ ގޮތުގައި ހަމަޖެހިފައިވާ އީގަލް ހިލްސް ކުންފުނީގެ ވަނަވަރާއި ޤާބިލުކަމަށް ފުންކޮށް ނަޒަރު ހިންގާލަން ޖެހެއެވެ. ދުނިޔޭގެ މަޝްހޫރު ވިޔަފާރިވެރިޔާ މުޙައްމަދު އަލަ އައްބާރު އިސްވެ ހުންނަވައި އުފައްދަވާފައިވާ މިކުންފުންޏަކީ ބައިނަލްއަޤްވާމީ ފެންވަރުގައި ޢުމްރާނީ ތަރައްޤީގެ ދާއިރާގައި ވޭތުވެދިޔަ 28 އަހަރު ދުވަހުގެ ދިގު ތަޖުރިބާ ލިބިފައިވާ ކުންފުންޏެކެވެ. ދުނިޔޭގެ އެކި ކަންކޮޅުތަކުގައި 20 އަށްވުރެ ގިނަ ޤައުމުގައި އެ ކުންފުނިން ދަނީ ބިޔަ މަޝްރޫޢުތައް ކާމިޔާބުކަމާއެކު ހިންގަމުންނެވެ.

އީގަލް ހިލްސްގެ މުޅި ޕޯޓްފޯލިއޯއަށް ބަލާއިރު، ޖުމްލަ 450 ބިލިޔަން ޔޫއެސް ޑޮލަރަށްވުރެ އަގުބޮޑު މަޝްރޫޢުތައް އެ ކުންފުނިން ވަނީ ހިންގާފައެވެ. ދުނިޔޭގެ އެކި ކަންކޮޅުތަކުގައި ގާތްގަނޑަކަށް 400،000 ހައުސިންގ ޔުނިޓާއި، 90 އަށްވުރެ ގިނަ ހޮޓަލާއި، 17 ބޮޑު ޝޮޕިންގ މޯލް ވަނީ ބިނާކޮށްފައެވެ. އެކުންފުނީގެ މަސައްކަތްތައް ހަމައެކަނި ގެދޮރު އެޅުމަކަށް ހަނިވެފައެއް ނުވެއެވެ. އޭގެ ތެރޭގައި ލަގްޒަރީ ހޮޓާތަކާއި، ބައިނަލްއަޤްވާމީ ފެންވަރުގެ މެރީނާތަކާއި، ވިޔަފާރީގެ މައި މަރުކަޒުތަކާއި، ކޮމިއުނިޓީ ސެންޓަރުތަކާއި، އާންމު ހިތްފަސޭހަ މައިދާންތަކުގެ އިތުރުން މުޅި ސިޓީއަކަށް ބޭނުންވާ ފުރިހަމަ އަސާސީ އިންފްރާސްޓްރަކްޗަރ ހިމެނެއެވެ.

މުޅި ދުނިޔެ ބަލައިގަންނަ ޔޫއޭއީގެ "ޑައުންޓައުން ދުބާއީ" އަދި ސަރބިއާގެ ތާރީޚީ "ބެލްގްރޭޑް ވޯޓަރފްރަންޓް" ފަދަ ސިޓީތަކަކީ މިކުންފުނިން ހަޤީޤަތަކަށް ހަދައިދީފައިވާ ބިޔަ ބިނާތަކެވެ. އަލްބޭނިއާގައި ތަރައްޤީކުރާ 2.5 ބިލިޔަން ޑޮލަރުގެ މެގަ މެރީނާ މަޝްރޫޢާއި، ޝާރްޖާގައި ހިންގާ 1.2 ބިލިޔަން ޑޮލަރުގެ ވޯޓަރފްރަންޓް މަޝްރޫޢަކީވެސް އެކުންފުނީގެ މާލީ ތަނަވަސްކަމާއި ފަންނީ މޮޅުކަން ދައްކުވައިދޭ ދިރިހުރި މިސާލުތަކެވެ. މިފަދަ ބޮޑެތި ޕްރޮޖެކްޓްތައް ބިނާކޮށް ނިންމުމުގެ ރެކޯޑާއި، އެތައް ބިލިޔަން ޑޮލަރެއްގެ މާލީ ޤާބިލުކަން ލިބިފައިވާ ބައިނަލްއަޤްވާމީ ޑިވެލޮޕަރަކު ރަސްމާލެ މަޝްރޫޢުގެ މޭސްތިރިއަކަށް ހަމަޖެހިގެން ދިއުމަކީ، މިއީ ހަމައެކަނި ކަރުދާހުގައި އޮތް ހުވަފެނެއް ނޫން ކަމާއި، ދިވެހިރާއްޖޭގެ ތާރީޚުގައިވެސް ޢަމަލީ ގޮތުން ފެނިގެންދާނެ އެންމެ ފުރިހަމަ އަދި އިތުބާރު ހުރި ޢުމްރާނީ ބަދަލުކަން ސާފުކޮށް ހާމަކޮށްދޭ އަލިގަދަ ހެއްކެކެވެ.