ފަރެސްމާތޮޑާ އެއަރޕޯޓްގެ މަސައްކަތް ނޮވެމްބަރުމަހުގެ 11ގެ ކުރިން ނިންމައި، ސަރުކާރާ ހަވާލުކުރާނެ ކަމަށް އެމްޓީސީސީގެ ސީއީއޯ ޢާދަމް ޢާޒިމް ވިދާޅުވެއްޖެއެވެ.
ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފަށާފައިވަނީ މިއަހަރުގެ ޖެނުއަރީމަހުއެވެ. މި އެއަރޕޯޓް ތަރައްޤީކުރަނީ ކައިރީގައި ހުރި ކުދި ރަށްތަކެއް ހިއްކައިގެންނެވެ. އެއީ 19.9 ހެކްޓަރުގެ ބިމުގެ ސަރަޙައްދެކެވެ. ބިން ހިއްކުމުގެ މަސައްކަތް 2019ވަނަ އަހަރު ނިންމި ނަމަވެސް، ދިގު މުއްދަތެއްވަންދެން އެއަރޕޯޓްގެ ޢަމަލީ މަސައްކަތް އޮތީ ނުފެށިއެވެ. އެއަރޕޯޓްގެ ޢަމަލީ މަސައްކަތް ކުރުމަށް އެމްޓީސީސީއާ ހަވާލުކުރީ މިދިޔަ އަހަރުގެ ނޮވެމްބަރުމަހުއެވެ.
ސައިޓުގައި ޢަމަލީ މަސައްކަތް ފަށައި މިހާރު ކުރަމުންދަނީ ރަންވޭގެ ބޭސް ލޭޔަރުތައް އެޅުމަށް ވާންޖެހޭ ތައްޔަރީތަކެވެ. ފަރެސްމާތޮޑާ އެއަރޕޯޓްގެ މަސައްކަތާ ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްވަމުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީގެ ސީއީއޯ އާދަމް ޢާޒިމް ވިދާޅުވީ ފަރެސްމާތޮޑާ އެއަރޕޯޓްގެ މަސައްކަތްތައް ބާރު ސްޕީޑްގައި ފަށައިގެން ކުރިއަށްދާކަމަށެވެ. ޢާޒިމް ވިދާޅުވީ މި އެއަރޕޯޓްގެ މަސައްކަތް ވެގެންދާނީ އެމްޓީސީސީން އެންމެ އަވަހަށް ފުރިހަމަކުރާ އެއަރޕޯޓް މަސައްކަތަށްކަމަށެވެ. އޭނާ ވިދާޅުވީ ޝެޑިއުލަށްވުރެ ކުރިން މަސައްކަތް ނިންމުމަށް އެމްޓީސީސީގެ ޓީމުން މަސައްކަތް ފަށާފައިވާކަމަށެވެ.
"ޓަރގެޓަކީ 8މަސްތެރޭ މަސައްކަތް މުޅިން ނިންމުން. މިއަހަރު ނޮވެމްބަރު 11ގެ ކުރިން ހުރިހާ މަސައްކަތެއް ނިންމައި ސަރުކާރާ ހަވާލުކުރުން." ޢާޒިމް ވިދާޅުވިއެވެ.
ފަރެސްމާތޮޑާ އެއަރޕޯޓަކީ އެތެރޭގެ އުދުހުންތަކަށް ޚާއްސަކޮށްގެން ތަރައްޤީކުރާ އެއަރޕޯޓެކެވެ. މި މަޝްރޫޢުގައި ހިމެނެނީ 1200މީޓަރުގެ ރަންވޭ ހެދުމާއި، ޓަރމިނަލްއާއި، ޓެކްސީވޭއާއި، ފްލައިޓް ޕާކުކުރާ އޭޕްރަންގެ މަސައްކަތެވެ.
ސަރުކާރުގެ ވަޢުދަކީ ރާއްޖޭގެ މީހުން ދިރިއުޅޭ ކޮންމެ ރަށަކުން، 30މިނެޓުގެ ލޯންޗު ދަތުރަކުން އެއަރޕޯޓަށް ދެވޭހާ ކައިރީގައި ވައިގެ ބަނދަރު ތަރައްޤީކުރުމެވެ. ޕީއެސްއެމްއާ ވާހަކަދައްކަވަމުން ފަރެސްމާތޮޑާ ކައުންސިލްގެ ރައީސް ނަޞްރުﷲ މުޙައްމަދު ވިދާޅުވީ، ވައިގެ ދަތުރުގެ ޚިދުމަތް ހޯދުމަށް މިހާރު ރަށުގެ ރައްޔިތުން ދަތުރުކުރަންޖެހެނީ ގދ.ކާޑެއްދޫ އެއަރޕޯޓަށްކަމަށެވެ. ނަމަވެސް މިއީ އަތޮޅުގެ ދުރު ސަރަޙައްދަކަށްވުމުން އެކަމުގެ ދަތި އުނދަގުލާ ކުރިމަތިވާކަމަށާ، ބޮޑު ޚަރަދެއްވެސް މިކަމަށް ހިނގާކަމަށެވެ.
"މިހާރު ދާންޖެހެނީ ކާޑެއްދޫ އެއަރޕޯޓަށް. ގާތްގަނޑަކަށް 1ގަޑިއިރުގެ ދަތުރެއް އެބަ ކުރަންޖެހޭ އެއަރޕޯޓަށްދާން. 2000ރުފިޔާ އެއީ." ނަޞްރުﷲ ވިދާޅުވިއެވެ.
ނަޞްރުﷲ ވިދާޅުވީ އެއަރޕޯޓާއެކު ރަށުގެ އިޤްތިސާދީ ޙާލަތުވެސް ރަނގަޅުވެގެންދާނެކަމުގެ އުއްމީދު ބޮޑުކަމަށެވެ. އެގޮތުން މިހާރު މަސްވެރިކަމަށް ބަރޯސާވާ ފަރެސްމާތޮޑާގައި ރަށު ފަތުރުވެރިކަން ފުޅާކުރެވޭނެކަމަށެވެ. ފަތުވެރިކަމަށް މިސްރާބު ޖަހާފައިވީނަމަވެސް، ދަތުރުފަތުރުގެ އުނދަގޫ ނިޒާމުގެ ސަބަބުން މިކަމަށް ހުރަސް އެޅިފައިވާކަން ނަޞްރުﷲ ފާހަގަކުރެއްވިއެވެ. ނަމަވެސް އެއަރޕޯޓާއެކު ރަނގަޅު ޙާލަތަށް ދެވޭނެކަމުގެ އުއްމީދު މުޅި ރަށުގެ ރައްޔިތުންދަނީ ކުރަމުންނެވެ.
ފަރެސްމާތޮޑާއަކީ އާބާދީގައި 1700އަށްވުރެ ގިނަ މީހުން ހިމެނޭ ރަށެކެވެ.