ހިޔާ ފްލެޓްގެ ވަގުތީ ލިސްޓަށް 8000އަށްވުރެ ގިނަ ޝަކުވާ ލިބުނުކަމަށް ފްލެޓް ތަކުގެ މައްސަލަ ބަލާ ކޮމިޓީން ވިދާޅުވެއްޖެއެވެ. ރައީސުލްޖުމްހޫރިއްޔާގެ އޮފީހުން ބޭއްވި ޚާއްސަ ނޫސްވެރިންގެ ބައްދަލުގައި މަޢުލޫމާތު ދެއްވަމުން ފްލެޓްތަކުގެ މައްސަލަ ބަލާ ކޮމިޓީގެ މެންބަރު ޠާހާ މުޙަންމަދު ވިދާޅުވީ، ހުރިހާ ޝަކުވާތަކަށްވެސް ޖަވާބުދީފައިވާކަމަށެވެ.
ޠާހާ ވިދާޅުވީ ޝަކުވާތަކަށް ޖަވާބުދީފައިވަނީ ފޯމުގައި ހިމަނާފައިވާ އީމެއިލަށްކަމަށެވެ. ނަމަވެސް ގިނަ ފަރާތްތަކަކުން ޖަވާބު ނިލިބޭކަމަށް ބުނުމުން، ޝަކުވާގެ ޖަވާބު އަލުން ފޮނުވުމަށް ފުރުޞަތު ދިންކަމަށެވެ. މިގޮތުން ޝަކުވާގެ ޖަވާބު ނުލިބޭކަމަށް ބުނި 800މީހުންނަށް ޖަވާބު ފޮނުވާފައިވާކަމަށް ޠާހާ ވިދާޅުވިއެވެ. ހިޔާ ވަގުތީ ލިސްޓަށް ޖުމްލަ 8320 ޝަކުވާވަނީ ލިބިފައެވެ. މީގެތެރޭގައި އެކަކުގެ ނަމުގައި ހުށައަޅާފައިވާ އެކި ޝަކުވާތައްވެސް ހިމެނެއެވެ.
"ޕޯޓަލް މެދުވެރިކޮށް ޝަކުވާ ހުށައެޅީ. އެކަކު 30 ޝަކުވާވެސް ހުށައަޅާފައިވޭ. ޖުމަލް 5000 އެޕްލިކަންޓުން ޝަކުވާ ހުށައަޅާފައިވޭ. ހުރިހާ ފަރާތްތަކަށްވެސް ޝަކުވާގެ ޖަވާބު ފޮނުވާފައިވަނީ." ޠާހާ ވިދާޅުވިއެވެ.
ހިޔާ ފްލެޓަށް އެދި 23،000އަށްވުރެ ގިނަ މީހުން ކުރިމަތިލިއެވެ. 2018ވަނަ އަހަރު ހިޔާ ފްލެޓް ލިބޭ މީހުންގެ ލިސްޓު އެކުލަވާލިނަމަވެސް، "ފްލެޓްތަކުގެ މައްސަލަވަލާ ކޮމިޓީ" އުފައްދަވާ މަސައްކަތްފެށީ ފްލެޓް ލިބެނީ އެންމެ ޙައްގުވެރި ފަރާތްތަކަށްކަން ކަށަވަރުކުރުމަށެވެ. މިކަމުގައި އެންމެ ބޮޑު މަސައްކަތަކަށްވީ ގޭގެއަށް ގޮސް ދިރިއުޅުމުގެ ޙާލަތު ދެނެގަތުމެވެ. 2018ވަނަ އަހަރު ހެދި ލިސްޓުގައި މި ބަޔަށް ޕޮއިންޓްދިނީ ހުށައަޅާފައިވާ މަޢުލޫމާތަށް ބެލުމަށްފަހުއެވެ. ނަމަވެސް ފަހުންވަނީ ފްލެޓް ކޮމިޓީގެ މުއައްޒަފުން ގޭގެއަށް ގޮސް ޙާލަތު ބަލާ ޕޮއިންޓް ދީފައެވެ.
ޠާހާ ވިދާޅުވީ ޕޮއިޓް ދިން ގޮތުގެ ލިޔުމުގެ ސައްޙަކަން ކަށަވަރުކުރުމަށް، ފްލެޓަށް ހުށައެޅި މީހާއާއި ކޮމިޓީއިން ޙާލަތު ބަލަންދިޔަ 2 މުއައްޒަފުންގެ ސޮއުވެސް ފޯމުގައި ހިމަނާފައިވާކަމަށެވެ. މާލެއިން 16912ގެއަށް އަދި އަތޮޅުތަކުން 2226ގެއަށް ދިރިއުޅުމުގެ ޙާލަތު ބެލުމަށް ގޮސްފައިވެއެވެ.
އަތޮޅުތަކުގައި ދިރިއުޅޭ މީހުންނަށް ފޯމް ހުށައެޅުނީ އެކަނިވެރި މައިންނާ ބަފައިންނަށް ޚާއްސަ ކެޓަގަރީ އަދި ނުކުޅެދުންތެރިކަން ހުންނަ މީހުންނަށް ޚާއްސަ ކެޓަގަރީއިންނެވެ.
ހުށައެޅި ހުރިހާ ޝަކުވާތަކަށް ޖަވާބުދިނުމަށްހު ހިޔާ ފްލެޓްގެ ދާއިމީ ލިސްޓް އިޢުލާންކުރީ އަންގާރަ(އިއްޔެ) ދުވަހުއެވެ. ހިޔާ ފްލެޓްތަކުގައި މިހާރު ކުރިއަށްދާ މަސައްކަތްތަކާ ގުޅޭ މަޢުލޫމާތު ދެއްވަމުން ރައީސް އޮފީހުގެ ތަރުޖަމާނު މުޙައްމަދު މަބުރޫކު އަޒީޒް ވިދާޅުވީ މިހާރު ކުރިއަށްދަނީ ޔޫޓިލިޓީ ޚިދުމަތްތައް ގުޅުމުގެ މަސައްކަތް ކަމަށެވެ.
"މިހާރު ކުރިއަށްދަނީ ފެނާ ނަރުދަމާއާއި ކަރަންޓު އެޅުމުގެ މަސައްކަތް. މި މަސައްކަތްތައް މޭމަހުގެ ނިޔަލަށް ނިންމައި، ޖޫންގައި އާއްމުންނަށް ފްލެޓްތަކުގައި ދިރިއުޅެން ފެށޭނެކަމަށް އުއްމީދުމިކުރަނީ." މަބްރޫކް އަޒީޒް ވިދާޅުވިއެވެ.
ލިސްޓް އާއްމު ކުރުމުގެ މަސައްކަތް ނިމިފައިވާއިރު، ފްލެޓްތަކުގެ ވެރިންނާއެކު އެގްރިމެންޓް ހެދުމުގެ މަސައްކަތް ކުރާނީ ޕްލޭނިންގ މިނިސްޓްރީއިންނެވެ. ހިޔާ މަޝްރޫޢުގެދަށުން ހަދާފައިވާ 16 ޓަވަރުގައި 6720 ހައުސިންގ ޔުނިޓް ހިމެނެއެވެ. މިއީ މުޅިންވެސް ދެ ކޮޓަރީގެ އެޕަރޓްމަންޓްތަކެވެ.