ދެވަނަ މެޗުގައި ކިރްގިސްޠާން އަތުންވެސް ރާއްޖެއަށް ނާކާމިޔާބީ

ފުޓުބޯޅައިގެ ބައިނަލްއަޤްވާމީ ބްރޭކުގައި ދިވެހިރާއްޖެއިން ކުޅުނު ދެވަނަ މެޗުންވެސް ބަލިވެއްޖެއެވެ.

މި މެޗުގައި ރާއްޖެއިން ނުކުތީ ކިރްޤިސްޠާނާ ދެކޮޅަށް އެ ޤައުމުގައެވެ.

ކިރްޤިސްޠާނުގެ ބިޝެކްގައި ކުޅުނު މިމެޗުން ރާއްޖޭގެ މައްޗަށް އެ ޤައުމުން ކުރިހޯދީ 0-5 ގެ ނަތީޖާއަކުންނެވެ. މެޗުގައި ކިރްޤިސްޠާނުން ޖެހި ފަސް ލަނޑަކީވެސް މެޗުގެ ފުރަތަމަ ހާފުގައި އެޓީމުން ކާމިޔާބުކުރި ލަނޑުތަކެކެވެ.

މެޗު ފަށައިގެން 12ވަނަ މިނެޓުގައި ކިރްޤިސްޠާނުން ވަނީ ލަނޑެއްޖަހައި ލީޑުނަގާފައެވެ. ރާއްޖޭގެ ޑިފެންސްލައިނަށް ހެދުނު ގޯހެއްގެ ފައިދާ ނަގައި މިލަނޑު އެޓީމަށް ކާމިޔާބުކޮށްދިނީ އަޓަބައޭވް އެރްބޯލެވެ. އޭގެ އަށް މިނެޓުފަހުން އަސްޓަނަކޫލޮވް ސިރޮޒިއްދީން ވަނީ އެޓީމުގެ ދެވަނަ ލަނޑު ޖަހައިދީ ލީޑު ފުޅާކޮށްދީފައެވެ.

ކިރްޤިސްޠާނުގެ ތިންވަނަ ލަނޑު، 23 ވަނަ މިނެޓުގައި ޖަހައިދިނީ ފުރަތަމަ ލަނޑުވެސް ޖަހައިދިން އަޓަބައޭވް އެވެ. އަދި އޭގެ 10 މިނެޓުފަހުން، ޓީމުގެ ސެންޓަރ ބެކަކަށް ކުޅެމުންދިޔަ މުރްޒަކޯވް ވަލޭރީ ވަނީ ކިރްޤިސްޠާނުގެ ހަތަރުވަނަ ލަނޑު ޖަހައިދީފައެވެ.

މެޗުގައި ކިރްޤިސްޠާނުގެ ފަހު ލަނޑު، 42 ވަނަ މިނެޓުގައި ކާމިޔާބުކޮށްދިނީ ޖޮއެލް ކޯޖޯއެވެ.

ރާއްޖެއިން މި ބްރޭކުގައި ކުޅުނު ފުރަތަމަ މެޗާ ޚިލާފަށް މި މެޗުގައި ދިވެހި ކުޅުންތެރިންގެ ފަރާތުން، ޙާއްސަކޮށް ދެވަނަ ހާފުގައި ރަނގަޅު ކުޅުމެއް ފެނިގެންދިޔައެވެ. މި ހާފުގައި ބަދަލު ތަކަކާއެކު ނުކުތް ދިވެހި ޓީމުން ވަނީ އެޓޭކުތަކެއް ވެސް އުފައްދާފައެވެ. އެހެންނަމަވެސް އޮން ޓާގެޓަށް، ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ.

މެޗުގައި ރާއްޖެއިން އެންމެ ރަނގަޅު ހަމަލާތަކެއް އުފެއްދީ ޑިފެންޑަރު އީނާޒާއި ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންއެރި އަލީ ފާސިރުއެވެ.

ހިލޭ ޖެހުމެއްގައި އަޙްމަދު އައިހަމް ނަގައިދިން ހުރަހަކުން ތަނަވަސްވި ފުރުސަތެއްގައި ބޮލުން އީނާޒް ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ. އަދި މެޗުގެ ފަހިކޮޅު، އައިހަމް ތަނަވަސްކޮށްދިން ފުރުސަތެއްގައި އޭރިއާ ތެރެއަށް ވަދެ ފާސިރު ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ބޭރު ދާގަނޑަށެވެ.

ކިރްޤިސްޠާން އަތުން ފަރަގު ބޮޑު ނަތީޖާއަކުން ރާއްޖެ ބަލިވިއިރު ބްރޭކުގައި ކުޅުނު ފުރަތަމަ މެޗުގައި ޗައިނާ އަތުން ރާއްޖެ ބަލިވީ 0-3ގެ ނަތީޖާއަކުންނެވެ.

މި ބްރޭކުގައި ރާއްޖެއިން ކުޅޭ ފަހު މެޗުގައި ނުކުންނާނީ ލުބުނާނާ ދެކޮޅަށެވެ. އެމެޗު ކުޅޭނީ އަންނަ މަހުގެ އެއްވަނަ ދުވަހު، ކިރްޤިސްޠާނުގައެވެ.