އިންގްލިޝް ޕްރިމިއަރ ލީގުގައި ޓޮޓްނަމް ހޮޓްސްޕަރ އާއި ވެސްޓް ބްރޮމްވިޗް އެލްބިއަން ބައްދަލުކުރިމެޗް ޓޮޓްނަމް ކާމިޔާބުކޮށްފިއެވެ. ޓޮޓްނަމްގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 2 ލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޓޮޓްނަމްއެވެ. ނަމަވެސް މެޗްގެ ފުރަތަމަ ހާފްގައި ޓޮޓްނަމްއަށް ވެސްޓް ބްރޮމްގެ ޑިފެންސް ފޫއަޅުވާލެވޭ ގޮތެއް ނުވިއެވެ. މިމެޗްގެ ފުރަތަމަ ލަނޑު މެޗްގެ 54 ވަނަ މިނެޓްގައި ޖަހާދިނީ ޓޮޓްނަމްގެ ތަޖުރިބާކާރު ފޯވަޑް ހެރީ ކޭންއެވެ. މިއީ އަނިޔާއިން އެނބުރި އައިސް އޭނާ ކުޅުނު ފުރަތަމަ މެޗެވެ. މިއީ މިސީޒަންގައި ލީގުގައި އޭނާ ކާމިޔާބުކުރި 13 ވަނަ ލަނޑެވެ. އަދި ކޭން އަނިޔާގެ ސަބަބުން ނުކުޅެދިނަ ދެމެޗްގައި އެޓީމަށް ލަނޑެއްވެސް ކާމިޔާބުކިރެވިފައެއް ނުވެއެވެ. މިމެޗްގައި ޓޮޓްނަމްގެ ދެވަނަ ލަނޑު މެޗްގެ 58 ވަނަ މިނެޓްގައި ޖަހާދިނީ ސޮން ހިއުންގ މިން އެވެ. މިއީ ސޮންވެސް ލީގުގައި މިފަހަރު ޖެހި 13 ވަނަ ލަނޑެވެ.
މިކާމިޔާބީއާއެކު ޓޮޓްނަމްވަނީ ކުޅުނު 22 މެޗުން ލިބިފައިވާ 36 ޕޮއިންޓާއެކު ތާވަލްގެ ހަތްވަނައަށް ކުރިއަށް ޖެހިލާފައެވެ.
މެޗަށްފަހު ވާހަކަ ދައްކަމުން ޓޮޓްނަމްގެ ކޯޗް ހޯޒޭ މޮރީނިއޯ ބުނީ ޖެހިޖެހިގެން ތިން މެޗުން ބަލިވުމަކީ އޭނާ އާދަވެފައިވާ ކަމެއް ނޫން ކަމަށާއި އަދި ޓޮޓްނަމަށްވެސް އެއީ އާދެފައިވާކަމެއް ނޫން ކަމަށެވެ. އެހެންކަމުން މިހަފްތާ ވެގެންދިޔައީ ވަރަށް އުނދަގޫ ހަފްތާއަކަށް ކަމަށް މޮރީނިއޯ ބުންޏެވެ. އަދި މިމެޗްގައި ކުޅުންތެރިންގެ ފަރާތުން ރަނގަޅު ކުޅުމެއް ފެނިގެންދާނެކަމަށް ކުރިންވެސް އުންމީދު ކުރެވުނު ކަމަށް ޓޮޓްނަމްގެ ކޯޗް ބުންޏެވެ. އަދި ކޭންއަކީ ޓޮޓްނަމްގެ ތާރީހުގައިވެސް ވަރަށް މުހިންމު ކުޅުންތެރިއެއް ކަމަށާއި ޓީމުން ކޭންއަށް ބަރޯސާ ވާވަރަކީ އެއްވެސް މީހަކަށް އޮޅިފައިވާކަމެއް ނޫން ކަމަށްވެސް މޮރީނިއޯ ބުންޏެވެ.
މެޗަށްފަހު ވާހަކަ ދައްކަމުން ވެސްޓް ބްރޮމްގެ ކޯޗް ސޭމް އެލަޑައިސް ހާމަކުރިގޮތުގައި މިމެޗްގައި ދަށް ތަންކޮޅަކަށްވީ ފުރަތަމަ ހާފްގައި ޓޮޓްނަމަށް ލަނޑެއް ޖެހުނަ ނުދީ ހިފަހައްޓާލުމަށްފަހު ދެވަނަ ހާފްގައި ބައިކޮޅަށް ދެ ލަނޑު ވަނަދިނުންކަމަށެވެ. އަދި މި ލެވެލްގައި ކޭން ކަހަލަ ކުޅުންތެރިޔަކު ޕެނަލްޓީ އޭރިޔާ ތެރޭގައި މާކް ނުކުރެވިހުރުން ކަމަށެވެ. މިއީ މިހާރު ރަނގަޅު ކުރަންޖެހިފައިވާ ކަންތައްތައް ކަމަށްވެސް އެލަޑައިސް ހާމަކުރިއެވެ. އަދި ބައިކޮޅަށް ވަންނަ ގޯލްތަށް ހުއްޓުވައިގެން ނޫން ގޮތަކަށް ކުރިމަގު އޮތީ އަދި އުނދަގޫ ފައްތަރެއްގައި ކަންވެސް އޭނާ ހާމަކުރިއެވެ.
މިމެޗުން ބަލިވުމުން ވެސްޓް ބްރޮމް މިހާރު އުޅެނީ 23 މެޗުން ލިބިފައިވާ 12 ޕޮއިންޓާއެކު ތާވަލްގެ 19 ވަނައިގައެވެ. އަދި 17 ވަނައިގާ އުޅޭ ބަރންލީއާ ދެމެދުގައި 11 ޕޮއިންޓްގެ ފަރަގެއް އެބައޮތެވެ.