ޅ.ނައިފަރުގައި ސަރުކާރުން އިމާރާތްކުރާ 100 ހައުސިންގ ޔުނިޓްގެ މަސައްކަތް މިއަހަރުގެ އޮކްޓޯބަރުމަހު ނިމޭނެކަމަށް މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ވިދާޅުވެއްޖެއެވެ.
މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން މައުލޫމާތުދެއްވާ ގޮތުގައި މި ޕްރޮޖެކްޓްގެ 40 އިންސައްތަ މަސައްކަތް މިހާރުވަނީ ނިމިފައެވެ.
ޅ.ނައިފަރުގައި 100 ހައުސިންގ ޔުނިޓް އިމާރާތްކުރުމުގެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން، އާރުސީއެންސީއާއެވެ. މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ޖެނުއަރީމަހުގެ 26 ވަނަ ދުވަހުއެވެ.
މިހައުސިންގ ޔުނިޓުތަކުގައި ހިމެނެނީ ތިންބުރީގެ 3 ބްލޮކް އިމާރާތާ، ހަތަރު ބުރީގެ 1 ބްލޮކް އިމާރާތެވެ. 3 ބުރީގެ ހައުސިންގ ޔުނިޓުތަކުގައި ހިމެނެނީ 24 އެޕާޓްމަންޓެވެ. އަދި 4 ބުރީގެ ހައުސިންގ ޔުނިޓުގައި 28 އެޕާޓްމަންޓު ހިމެނެއެވެ. ކޮންމެ ހައުސިންގް ޔުނިޓަކީވެސް 3 ކޮޓަރިއާ 3 ފާޚާނައާ ސިޓިންގްރޫމް އަދި ސްޓޯރޭޖް އޭރިއާ ހިމެނޭ އެޕަރޓްމަންޓްތަކެކެވެ. މިއިން ކޮންމެ އެޕަރޓްމަންޓަކީ 1000 އަކަފޫޓުގެ އެޕާރޓްމަންޓެވެ.
ޕްލޭނިންގ މިނިސްޓްރީއިން ވިދާޅުވީ މި މަސައްކަތުގައި މިހާތަނަށް 4 ބުރީގެ ބްލޮކް އިމާރާތާ، ތިން ބުރީގެ 2 އިމާރަތުގެ ކޮންކްރީޓް ހުރިހާ މަސައްކަތެއް ނިމިފައިވާކަމަށެވެ. އަދި 4 ބުރީގެ ބްލޮކް އިމާރާތާ، 3 ބުރީގެ ބްލޮކްގެ އެއް އިމާރާތުގެ ރޭނުމުގެ މަސައްކަތް ނިމިފައިވާކަމަށެވެ. އަދި ކޮންކްރީޓް މަސައްކަތް ނުނިމު ހުރި އިމާރާތުގެ މަސައްކަތްތައްވެސް ބާރުސްޕީޑްގައި މިހާރު ކުރިއަށްދާކަމަށް ޕްލޭނިންގ މިނިސްޓްރީން މަޢުލޫމާތުދެއެވެ. މިހާތަނަށް މި ޕްރޮޖެކްޓްގެ 40 އިންސައްތަ މަސައްކަތްވަނީ މުޅިން ނިމިފައެވެ. ޕްލޭނިންގ މިނިސްޓްރީން ވިދާޅުވީ މުޅި ޕްރޮޖެކްޓްގެ މަސައްކަތް މިއަހަރުގެ އޮކްޓޯބަރަށް ނިންމާނެކަމަށެވެ.
ނައިފަރުގައި ކުރިއަށްގެންދާ ޕްރޮޖެކްޓްގައި ޅ.މާފިލާފުށިން ނައިފަރަށް ބަދަލުކުރި އާއިލާއަކަށްވެސް ގެއެއް އިމާރާތްކޮށްދިނުމުގެ މަސައްކަތްދަނީ ކުރިއަށްގެންދަމުންނެވެ. މި ގޭގެ ކޮންކްރީޓް މަސައްކަތާ ރޭނުމާ ސިމެންތި ޖެހުމާ ފުރާޅުގެ މަސައްކަތް ވަނީ ނިމިފައެވެ.
މި ގޭގެ ފިނިޝިންގ މަސައްކަތްތައް ނިންމައި އަންނަ ފެބްރުއަރީމަހުގެ ތެރޭގައި ހަވާލުކުރެވޭނެކަމަށް މިނިސްޓްރީން މަޢުލޫމާތުދެއެވެ.
ނައިފަރުގައި ކުރިއަށްދާ ހައުސިންގ މަޝްރޫޢުއަށް ސަރުކާރުގެ ބަޖެޓުން 72.2 މިލިއަނަށްވުރެ ގިނަ ރުފިޔާ ޚަރަދުކުރެއެވެ.
ބޯހިޔާވަހިކަމުގެ ދަތިކަމުގެ މައްސަލަ ޙައްލުކުރުމަށް ނައިފަރުގައި ފްލެޓްތައް ހެދުމުގެ މަސައްކަތް ކުރިއަށްގެންދަނީ އެރަށު ހިއްކި ބިމުގައެވެ.
2004 ވަނަ އަހަރު އެރަށުންވަނީ 16 ހެކްޓަރުގެ ބިން ހިއްކާފައެވެ. އެރަށުން އެންމެ ފަހުން ގޯތި ދޫކޮށްފައިވަނީ 2012 ވަނަ އަހަރުއެވެ. އެ ބުރުގައި ނައިފަރު ހިއްކި ބިން ހިމެނޭހެން 300 ގޯތި ވަނީ ދޫކޮށްފައެވެ. އޭގެފަހުން 8 އަހަރުވެފައިވާއިރު، 5000 މީހުންގެ އާބާދީއެއް އޮންނަ ނައިފަރުގައި މިހާރުވެސް ގޯތިބޭނުންވާ ގިނަ ބަޔަކު ތިބިކަން ރަށު ކައުންސިލުން ފާހަގަކުރެއެވެ.