ވިއްސާރަވުމާއި ގުޅިގެން މާލޭގެ ގިނަ ސަރަޙައްދުތަކުގެ މަގުތަކުގައި ފެންބޮޑުވެ ފެންގަނޑު ނުހިނދި އެތައް ގަޑިއިތުތަކެއްވަންދެން އޮވެއެވެ. ޚާއްސަކޮށް މާލޭގެ މާފަންނު ކަނބާއައިސާރަނި ހިނގުމުގެ ހުޅަނގު ސަރަހައްދަކީ ވިއްސާރަވެއްޖެނަމަ އެންމެ އަވަހަށް ފެންގަނޑު ޖަމާވާ ސަރަޙައްދެވެ. ގޭގެއަށް ފެންވަދެ ގެއްލުންތައްވެއެވެ.
ކަނބާއައިސާރަނި ހިނގުމުގައި ފެން ހިންދާ ސިސްޓަމެއް ބަހައްޓާފައި ހުރިނަމަވެސް ސިސްޓަމް ރަނގަޅަށް މަސައްކަތް ނުކުރުމާއި، ހަދާފައިވާ ކާނުތައް ބްލޮކްވެ އެ ސަރަޙައްދުން ފެން ހިންދުން އޮންނަނީ ބޮޑު ތަކުލީފަކަށްވެފައެވެ. މަގުތަކުގައި ބަހައްޓާފައި ހުންނަ އުޅަނދުތަކާއި، އަދި ގޭގެއަށް ފެންވަދެ މީހުން މުދަލަށްވެސް ބޮޑެތި ގެއްލުންތައް ކުރިމަތިވެއެވެ. ގިނަފަހަރަށް މަގުތަކުން ފެން ހިންދުމުގެ މަސައްކަތް ކުރަނީ އެމްއެންޑީއެފްގެ އެހީގައި ޕަމްޕު ބަހައްޓައިގެންނެވެ.
މާލޭގެ މަގުތައް ޒަމާނީ ފެންވަރަކަށް ތަރައްޤީކުރުމަށް ފަށާފައިވާ މަޝްރޫޢުގެ އެންމެ ބޮޑު އެއް ބޭނުމަކަށްވީ މާލޭގައި ފެންބޮޑުވުމުގެ މައްސަލައަށް ޙައްލެއް ހޯދައިދިނުމެވެ. ވިއްސާރަވުމުގެ ސަބަބުން މަގުތަކުގައި ހެދޭ ފެންގަނޑު އަވަހަށް ހިންދާލެވޭނެ ގޮތަކަށް މަގުތައް ފަރުމާކުރުމެއެވެ.
މާލޭ ސްޓްރީޓް ސްކޭޕިންގ ޕްރޮޖެކްޓްގެ ފުރަތަމަ ފިޔަވަހީގެ މަސައްކަތް ކުރިއަށް ގެންގޮސްފައިވަނީ މާލޭގައި އެންމެ ބޮޑަށް ފެންބޮޑުވާ ކަނބާ އައިސާ ރަނިހިނގުމުގައެވެ. މިމަގުގެ ފުރަތަމަ ފިޔަވަހީގެ މަސައްކަތް ނިންމައި މިހާރުވަނީ އާއްމުކޮށް ހުޅުވާލާފައެވެ. އާ ފަރުމާއާއިއެކު މަގުގައި ފެންބޮޑުވުމުގެ މައްސަލައަށްވަނީ ބޮޑު ލުޔެއް ލިބިފައެވެ. މި ސަރަޙައްދަކީ މާލެ މަގުތައް ހެދުމުގެ ޕްރޮޖެކްޓްގެ ދަށުން އަޖުމަ ބެލުމަށް ފުރަތަމަ ތަރައްޤީކުރި ސަރަޙައްދުވެސްމެއެވެ.
ޕީއެސްއެމް ނިއުސްއާ ވާހަކަދައްކަވަމުން މާލެ ސިޓީގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ މަގުތައް ހެދުމުގެ ކުރީގައި، ވާރޭވެހި މަގުތަކުގައި ހެދޭ ފެންގަނޑު އެތައް ވަގުތެއް ވަންދެއް ނުހިނދި އޮންނަކަމަށެވެ. އަދި ފެން ހިންދުމުގައި ކައުންސިލާއި އެމްއެންޑީއެފްއާއި ކަމާގުޅޭ އިދާރާތަކަށް ބޮޑު ތަކުލީފެއް ކުރިމަތިވާކަމަށެވެ. ނަމަވެސް މިހާރު އާ ފަރުމާގެ ދަށުން މަގުތައް ތަރައްޤީކޮށްފައިވާއިރު، އޮޓަމެޓިކް ސިސްޓަމްތަކާއެކު ފެން ބޮޑުވާ މިންވަރު ކުޑަވެ، މަގުގައި ހެދޭ ފެންގަނޑުވެސް މަދު ވަގުތުކޮޅެއްތެރޭ ހިންދާލެވޭކަން އޭނާ ފާހަގަކުރެއްވިއެވެ.
"ވިއްސާރަ ކިރިޔާ ވެހިލިޔަސް މާލޭ ސިޓީ ކައުންސިލްގެ މަސައްކަތަކަށްވާނީ ދަންވަރަށްވެސް ވެލިބަސްތާ ޖެހުމުގެ މަސައްކަތްކުރުން. މިދިޔަ ދެމަހު އަދި މަގު ހުޅުވާލިފަހުން އެއްގޮތަކަށްވެސް ފާހަގައެއް ނުވެ ފެން ބޮޑުވާކަމެއް. ބޯކޮށް ވާރޭ ވެހޭ ވަގުތު އިންޗިއަކަށް ފެން ހެދިލިނަމަވެސް ސްޓޯމް ވޯޓަރ ސިސްޓަމުން އިސާހިތަކު އެބަ ފެން ހިންދާލާ" ޝަމާއު ޝަރީފް ވިދާޅުވިއެވެ.
ޝަމާއު ވިދާޅުވީ ކަނބާއައިސާރަނި ހިނގުމާ ގުޅޭ ކުދި ގޯޅިތަކުގެ މަސައްކަތް ނިމުމުން، އެ ސަރަޙައްދުގެ ރައްޔިތުންނަށް ބޮޑު ލުއިފަސޭހައެއް ލިބޭނެކަމަށެވެ.
މާލެ ސްޓްރީޓް ސްކޭޕިންގެ މަސައްކަތް ކުރިއަށްގެންދަނީ ރޯޑް ޑިވެލޮޕްމަންޓް ކޯޕަރޭޝަން އާރްޑީސީންނެވެ. އާރްޑީސީގެ މެނޭޖިންގ ޑިރެކްޓަރ މޫސާ އަލީ މަނިކު ވިދާޅުވީ މާލޭގެ މަގުތައް ރަނގަޅު ފެންވަރަކަށް ހެދުންވީ ގޮންޖެހުންބޮޑު މަސައްކަތަކަށްކަމަށެވެ. އެގޮތުން މަގުތައް ކުރިން ހަދާފައިވަނީ ރޭވުންތެރިކަމެއް ނެތިކަން އޭނާ ފާހަގަކުރެއްވިއެވެ.
މޫސާ އަލި މަނިކު ވިދާޅުވީ ކުރިންވެސް ފެން ހިއްދާ ޕަމްޕް ސްޓޭޝަނެއް އެ ސަރަޙައްދުގައި ހުރިނަމަވެސް އެކަށީގެންވާ ގޮތުގައި ބޭނުންކުރެވޭނެ އިންތިޒާމް ނެތްކަމަށެވެ. އޭނާ ވިދާޅުވީ ފުރަތަމަ ހެދި މަގާއިއެކުވެސް، މާލޭގެ ފެންބޮޑުވުމުގެ މައްސަލައަށް ޙައްލު ހޯދޭނެކަން ޔަގީންވެއްޖެކަމަށެވެ. ނަމަވެސް އެންމެ އެދެވޭ ނަތީޖާ ފެންނާނީ މުޅި ޕްރޮޖެކްޓް ނިމުމުންކަން އޭނާ ފާހަގަކުރެއްވިއެވެ.
"މިފަހަރު އިތުރު ބޮޑެތި ހޮޅިތަކާއިއެކު ޖަންކްޝަންތައް ހަދާފައިވަނީ. ޕަމްޕް ސްޓޭޝަން ޤާއިމުކޮށް އޮޓޮއިން ފެންގަނޑު ބޭރުކުރެވޭގޮތަށް މިހުރީ މިހާރު. އަދި ކޮންމެ 6 މަހަކުން ހޮޅިތައް ސާފުކޮށް މެއިންޓެއިންކޮށް ބެލެހެއްޓޭނެ." މޫސާ އަލީ މަނިކް ވިދާޅުވިއެވެ.
ސިޓީ ކައުންސިލުން ވިދާޅުވީ ވިއްސާރަވެއްޖެނަމަ، ގޭގެއަށް ފެންވަދެ އެ ސަރަޙައްދުގެ ރައްޔިތުންގެ ގިނަ ޝަކުވާތަކެއް ކުރިން ލިބޭކަމަށެވެ. ނަމަވެސް ވޭތުވެދިޔަ ދެމަހެއްހާ ދުވަހުގެ ތެރޭގައި ވިއްސާރަވެ، ފެންބޮޑުވުމުގެ ސަބަބުން އެއްވެސް ޝަކުވާއެއް ސިޓީ ކައުންސިލަށް ލިބިފައިނުވާކަމަށެވެ.
މަލޭގޭ މަގުތައް ޒަމާނީ ފެންވަރަށް ހެދުމުގެ މަސައްކަތް ސަރުކާރުން ފަށާފައިވާއިރު، އެމަސައްކަތުގެ ދަށުން 400 އަށްވުރެ ގިނަ މަގު ހެދުމުގެ މަސައްކަތް ދަނީ ކުރަމުންނެވެ.