ހުޅުމާލޭގައި 5 ބުރީގެ އޮފީސް ޢިމާރާތެއް އެޅުމަށް ރެއިންބޯ ކޮންސްޓްރަކްޝަނާއި ޙަވާލުކޮށްފިއެވެ.
އެކަމަށްޓަކާ ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީގައި ބޭއްވި ރަސްމިއްޔާތެއްގައި އެކޯޕަރޭޝަންގެ ފަރާތުން އެކަމުގެ އެއްބަސްވުމުގައި ސޮއިކުރައްވާފައިވަނީ މެނޭޖިންގ ޑިރެކްޓަރ ސުހެއިލް އަޙްމަދެވެ. އަދި ރެއިންބޯ ކޮންސްޓްރަކްޝަންގެ ފަރާތުން ސޮއިކުރެއްވީ، އެކުންފުނީގެ ޑިރެކްޓަރ މާޒިން އިބްރާހީމް ރަފީޤެވެ.
މި ޕްރޮޖެކްޓަކީ 2 ޖުލައި 2020 ވަނަ ދުވަހު އިޢުލާންކޮށް، އިވެލުއޭޝަން މަރުހަލާ ނިންމާ، ރެއިންބޯ ކޮންސްޓްރަކްޝަނާއި ހަވާލުކޮށްފައިވާ މަޝްރޫޢެކެވެ. އަދި މި އޮފީސް އިމާރާތަކީ އެޗް.ޑީ.ސީން އާއްމުކޮށްފައިވާ ހުޅުމާލެ ޕްލޭނިންގ އެންޑް ޑިވެލޮޕްމަންޓް ގައިޑްލައިންގެ ދަށުން އިމާރާތްކުރާ ތަނެއްކަމަށްވެސް އެކޯޕަރޭޝަނުން ވިދާޅުވެއެވެ.
"މިކްސް އޮފީސް ބިލްޑިންގ" ދަށުން ހަދާ މި އޮފީސް އިމާރާތް ތަރައްޤީކުރުމަށް ހަމަޖެހިފައިވަނީ ހުޅުމާލޭ ޕްލޮޓް ނަންބަރު D6-1B ގައެވެ. މިއީ 12،137.37 އަކަފޫޓުގެ ބިމެއްކަމަށް އެޗް.ޑީ.ސީން މަޢުލޫމާތުދެއެވެ. އެގޮތުން 5 ބުރިއަށް ހަދާ މި އޮފީސް ޢިމާރާތުގައި އޮފީސް ސްޕޭސްގެ އިތުރުން، ގްރައުންޑް ފްލޯގައި ކޮމާޝަލް ސްޕޭސް އަދި ޕާކިންގއަށްވެސް ޖާގަ ކަނޑައަޅާފައިވާނެކަމަށް އެޗް.ޑީ.ސީން ވިދާޅުވެއެވެ.
ހުޅުމާލޭގައި 5 ބުރީގެ އޮފީސް ޢިމާރާތެއް އެޅުމަށް ރެއިންބޯއާއި ޙަވާލުކޮށްފައިވާއިރު، ހުޅުމާލޭގައި މެދުފަންތީގެ 162 ހައުސިންގ ޔުނިޓް ތަރައްޤީކުރުމަށް ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑް އަދި މެގަ އިންފްރާ ޕްރޮޖެކްޓްސް ޕްރައިވެޓް ލިމިޓެޑް ގުޅިގެން އުފައްދާފައިވާ ޖޮއިންޓް ވެންޗަރ ކުންފުންޏެއްކަމަށްވާ ރެއިންބޯ މެގަ ޑިވެލޮޕާސްއާއި މިމަހުގެ 16 ވަނަ ދުވަހު ވަނީ ޙަވާލުކޮށްފައެވެ.