ހދ.ނޮޅިވަރަންފަރަށް އެ އަތޮޅުގެ 3 ރަށަކުން ބަދަލުކުރި އާއިލާތަކުގެ ތެރެއިން، ގޯތި ނުލިބިވާ 52 އާއިލާއަކާއި ގޯތި ހަވާލުކުރުމުގެ މަސައްކަތް މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ފަށައިފިއެވެ.
ހައުސިންގ މިނިސްޓްރީއިން ވިދާޅުވީ ގެތަކުގެ ވެރިންނާއި އެގްރިމެންޓް ހެދުމާއި ތަޅުގަނޑި ހަވާލުކުރުމުގެ މަސައްކަތް މިހާރު ފަށައިގެން ކުރަމުންދާކަމަށެވެ. މި 52 އާއިލާއަށް ދާއިމީ ބޯހިޔާވަހިކަމެއް ލިބިފައި މިވަނީ 9 އަހަރު ފަހުންނެވެ.
އެއްފަސްކުރުމުގެ ސިޔާސަތުގެ ދަށުން ހދ.އަތޮޅުގެ ތިން ރަށުގެ މީހުން އެއަތޮޅު ނޮޅިވަރަންފަރަށް ބަދަލުކޮށްފައިވަނީ 2011 ވަނަ އަހަރެވެ. ނޮޅިވަރަންފަރަށް ބަދަލުކޮށްފައިވަނީ ހދ.މާވައިދޫ، ހދ.ފަރިދޫ އަދި ހދ.ކުނބުރުދޫގެ އާއިލާތަކެވެ.
ބަދަލުކުރި އާއިލާތަކަށް ބޯހިޔާވަހިކަން ދާއިމީ ބޯހިޔާވަހިކަން ހަމަޖައްސައިދެނީ ސަރުކާރުންނެވެ. ނަމަވެސް މިހާތަނަށްއައިއިރު ސަރުކާރުން ދާއިމީ ބޯހިޔާވަހިކަން ހަމަޖައްސައި ނުދޭ 52 އާއިލާ އެރަށުގައި ދިރިއުޅެމުން އައިސްފައިވެއެވެ.
މި އާއިލާތަކަށް ޚާއްސަކޮށްގެން 60 ހައުސިންގް ޔުނިޓް އިމާރާތްކުރަން ފެށިނަމަވެސް، އެ ގެތައް ނުނިމި އެތައް އަހަރުތަކެއް ވަނީ ވެފައެވެ.
މި ސަރުކާރުން ހަވާލުވިއިރު ގެތަކުގައި ނިމިފައިވަނީ ހަމައެކަނި ސްޓްރަކްޗަރގެ މަސައްކަތާއި، ބައެއް ގެތަކުގެ ފުރާޅުގެ މަސައްކަތެވެ. ނަމަވެސް ގެތަކުގެ މަސައްކަތް ނުނިމުމާއި، ޔުޓިލިޓީ ޚިދުމަތްތައް ނުލިބުމުގެ ސަބަބުން މިހާތަނަށްވެސް ގެތަކަށް މީހުން ބަދަލުވެވޭގޮތް ވަނީ ނުވެފައެވެ.
މީހުން ބަދަލުކުރިތާ 9 އަހަރުފަހުން، މި ސަރުކާރުން މިވަނީ އެރަށަށް ބަދަލުކުރި އާއިލާތަކަށް ޚާއްސަކޮށްގެން އަޅަންފެށި ގެތަކުގެ މަސައްކަތް މުޅިން ނިންމައި ގެތައް ހަވާލުކުރުމުގެ މަސައްކަތް ފަށާފައެވެ. މި މަސައްކަތަށް ހައުސިންގ މިނިސްޓްރީގެ ޓީމެއް ނޮޅިވަރަންފަރުގައި ދަނީ ހަރަކާތްތެރިވަމުންނެވެ. އަދި މިހާރު ބައެއް އާއިލާތަކާއި ގޭގެ ތަޅުދަނޑި ހަވާލުކޮށް ނިމިފައިވާކަމަށް ހައުސިންގ މިނިސްޓްރީއިންވަނީ ވިދާޅުވެފައެވެ.
މީގެކުރިން މި 52 އާއިލާ ދިރިއުޅެމުން އައިސްފައިވަނީ، އެ އާއިލާތަކުން އަމިއްލައަށް ހަމަޖެއްސި ގޭގޭގައެވެ.
ސަރުކާރުން މިދިޔަ އަހަރުވަނީ މި އާއިލާތަކަށް ބޯހިޔާވަހިކަން ފޯރުކޮށް ނުދެވިވާ މުއްދަތަށް، ބަދަލުގެ ގޮތުގައި ފައިސާ ދޭން ނިންމައި އެ މަސައްކަތް ފަށާފައެވެ. އެގޮތުން ފައިސާ ދިނުމުގެ ފުރަތަމަ މަރުޙަލާގައި 39 މަސްދުވަހަށްވާ 117 ހާސް ރުފިޔާ ކޮންމެ އާއިލާއަކަށް ވަނީ ދޫކޮށްފައެވެ. އަދި މިހާރު މަހުންމަހަށް ފައިސާ އަދާކުރާ އުސޫލުންވެސް ދަނީ ފައިސާ ދޫކުރަމުންނެވެ.
ދެހާހާއި ގާތްކުރާ އާބާދީއެއް އޮންނަ ނޮޅިވަރަންފަރުގައި 280 ގޭބިސީގައި މީހުން ދިރިއުޅެމުންދެއެވެ. ބިން ބޮޑުނަމަވެސް ބޯހިޔާވަހިކަމުގެ މައްސަލައަކީ އެ ރަށަށް ކުރިމަތިވެފައިވާ މައްސަލައެކެވެ. ސަރުކާރުން މިހާރުވަނީ އެރަށުގައި އިތުރު 100 ހައުސިންގ ޔުނިޓް އެޅުމަށް ނިންމާފައެވެ. މި މަޝްރޫޢުގެ މަސައްކަތް ނިމުމާއިއެކު ބޯހިޔާވަހިކަމުގެ ދަތިކަމުގެ މައްސަލައަށް ލުޔެއް ލިބޭނެކަމަށް ރަށު ކައުންސިލުން ފާހަގަކުރެއެވެ.