ކ.ގުރައިދޫ ބިން ހިއްކުމުގެ މަޝްރޫޢުގެ ބޮޑުބައެއް ނިންމާލައިފިއެވެ.
ޑިޒައިން އެންޑް ބިލްޑް އުސޫލުން ގުރައިދޫ ބިން ހިއްކުމުގެ މަސައްކަތް ސަރުކާރުން އެމް.ޓީ.ސީ.ސީއާ ޙަވާލުކޮށްފައިވަނީ 27 އޯގަސްޓް 2019 ގައެވެ. މި މަޝްރޫޢުގެ ދަށުން ބިން ހިއްކުމުގެ އިތުރުން 1200 މީޓަރުގެ ރިވެޓްމެންޓެއް ޖެހުމުގެ މަސައްކަތްވެސް ކުރުމަށް ވަނީ ހަމަޖެހިފައެވެ. މި މަޝްރޫޢަށް ދަޢުލަތުގެ ބަޖެޓުން ގާތްގަނޑަކަށް 85.9 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ލަފާކުރެވެއެވެ.
މި މަސައްކަތުގެ ކޮންޓްރެކްޓަރ އެމް.ޓީ.ސީ.ސީން ވިދާޅުވީ، ގުރައިދޫ ބިން ހިއްކުމުގެ މަސައްކަތުގެ %83 ނިމިފައިވާކަމަށެވެ. އަދި ރިވެޓްމަންޓް ޖެހުމުގެ މަސައްކަތުގެ %8 މިހާރު ނިމިފައިވާކަމަށެވެ. މި މަޝްރޫޢުގެ ދަށުން، 644,000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި ބިންހިއްކުމާއި، 1200 މީޓަރުގެ ސަރަޙައްދެއްގައި ބޮޑުހިލައިން ރިވެޓްމެންޓް ޖެހުމުގެ މަސައްކަތް ހިމެނެއެވެ.
މި މަޝްރޫޢުގެ ސަބަބުން ވިޔަފާރީގެ އިތުރު ފުރުޞަތުތަކެއް ހުޅުވި، ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ލިބިގެންދާނެކަމަށް ގުރައިދޫ ކައުންސިލުން ވިދާޅުވެއެވެ. އެގޮތުން ޕްލޭނިންގ މިނިސްޓްރީން ކައުންސިލާއި ހިއްސާކޮށްފައިވާ އަލަށް ހިއްކާ ސަރަޙައްދުގެ ޒޯނިންގ ޕްލޭންގައި ބޯހިޔާވަހިކަމަށް 4.75 ހެކްޓަރު ވަނީ ކަނޑައަޅާފައެވެ. ނަމަވެސް އެރަށުން ގޯތިދޫނުކުރާތާ 17 އަހަރުވެފައި ވާތީ، ބޯހިޔާވަހިކަމަށް އޮތް ޑިމާންޑް އެތައްގުނައެއް ބޮޑުވެފައިވުމުން، އެ ޕްލޭނަށް ބަދަލުގެނެސް ވީހާވެސް ގިނަ ބަޔަކަށް ގޯތިދޫކުރެވޭނެ ގޮތް ހެދުމަށް ކަމާބެހޭ ފަރާތްތަކާއި މަޝްވަރާކުރަމުން އަންނަކަމަށް ގުރައިދޫ ކައުންސިލުން ވިދާޅުވެއެވެ.
މި މަޝްރޫޢުގެ ދަށުން އެންމެ ބޮޑަށް ހިއްކުމަށް ނިންމާފައި ވަނީ ގުރައިދޫގެ ހުޅުނގު ފަރާތުންނެވެ. އެ ސަރަޙައްދުން 12.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި އެރަށާއި ވަކިން ދުރު ފަޅުމަތީގައި 1.7 ހެކްޓަރުގެ ބިން ހިއްކުމަށްވެސް ހަމަޖެހިފައިވާއިރު، މިއީ ޕިކްނިކް އައިލެންޑެއްގެ ގޮތުގައި ތަރައްޤީކުރާ ތަނެކެވެ.