އަންނަ އަހަރުގެ ފެބްރުއަރީގައި އިތުރު ދެ ޓަރޝިއަރީ ހޮސްޕިޓަލެއްގެ ޢަމަލީ މަސައްކަތް ނިމި ހޮސްޕިޓަލްތައް ލާމަރުކަޒީ އުސޫލުން ހިންގަން ފެށޭނެ ކަމަށް މިނިސްޓަރ އޮފް ހެލްތު އަޙްމަދު ނަސީމު ވިދާޅުވެއްޖެއެވެ.
ޕީއެސްއެމް ނިއުސްއިން ގެނެސްދޭ ދައުލަތުގެ ބަޖެޓް 2021 ޕްރޮގްރާމްގައި ވާހަކަފުޅު ދައްކަވަމުން ހެލްތު މިނިސްޓަރ އަޙްމަދު ނަސީމު ވިދާޅުވީ ޓަރޝިއަރީ ހޮސްޕިޓަލްތައް ލާމަރުކަޒީ އުސޫލުން ހިންގުމަކީ ސަރުކާރުގެ މިހާރުގެ އަމާޒުކަމަށެވެ. އަދި މިހާރު މަސައްކަތްދާ ގޮތަށް ދާނަމަ އަންނަ ފެބްރުއަރީ ހިސާބުގައި ހދ.ކުޅުދުއްފުށީ ރީޖަނަލް ހޮސްޕިޓަލާއި ރ.އުނގޫފާރު ރީޖަނަލް ހޮސްޕިޓަލްވެސް ޓަރޝިއަރީ ފެންވަރަށް ބަދަލުކޮށް ޚިދުމަތްދޭން ފެށޭވަރުވާނެކަމަށެވެ. އަދި އެހިސާބަށް ދާއިރު މިދެ ހޮސްޕިޓަލްވެސް މިނިސްޓްރީން ބަލަހައްޓާ ތަންތަނުގެ ގޮތުގައި އޮތް އޮތުން ބަދަލުކޮށް ވަކި ބޯޑެއްގެ ދަށަށް ދާނެކަމަށް ޤަބޫލުފުޅުކުރައްވާ ކަމަށް ހެލްތު މިނިސްޓަރ ވިދާޅުވިއެވެ.
"ހެލްތު މިނިސްޓްރީ އަކީ ހަގީގަތުގައި ރެގިއުލޭޓް ކުރާ ފަރާތެއް. މިހާރުގެ އަމާޒަކީ ބޮޑެތި ޓަރޝިއަރީ ހޮސްޕިޓަލްތައް ހިންގުން ހޮސްޕިޓަލް ބޯޑާއި ހަވާލުކުރުން. މިހާރު އައްޑޫ ސިޓީ ހޮސްޕިޓަލް އެހިންގަނީ އެހޮސްޕިޓަލްގެ ބޯޑުން. އަންނަ ފެބްރުއަރީ މަހުގެ ނިޔަލަށް އަޅުގަނޑަށް ޤަބޫލުކުރެވެނީ ކުޅުދުއްފުއްޓާއި އުނގޫފާރުގެ މަސައްކަތްތައްވެސް ނިމި މިހެން ހިންގަން ފެށޭނެކަމަށް." ހެލްތު މިނިސްޓަރ އަހުމަދު ނަސީމް ވިދާޅުވިއެވެ.
ރާއްޖޭގެ 5 ސަރަޙައްދެއްގައި ޓަރޝިއަރީ ފެންވަރުގެ ހޮސްޕިޓަލް ތަރައްޤީކުރުމަކީ ސަރުކާރުގެ އަމާޒެކެވެ. އަދި ސިއްޙީ ފަރުވާއަށް މާލެއަށް ބަރޯސާ ވާމިންވަރު ކުޑަކޮށް އަތޮޅުތެރޭގެ ސިއްޙީ ނިޒާމު ހަރުދަނާކުރުމަށްވެސް ސަރުކާރުން އަންނަނީ މަސައްކަތްކުރައްވަމުންނެވެ. އެގޮތުން ޓަރޝަރީ ފެންވަރަށް ބަދަލުކުރަން ނިންމާފައި ވަނީ، ހދ. ކުޅުދުއްފުށީ ރީޖަނަލް ހޮސްޕިޓަލާއި ރ.އުގޫފާރު ރީޖަނަލް ހޮސްޕިޓަލާއި ގދ.ތިނަދޫ އަބްދުއްސަމަދު މެމޯރިއަލް ހޮސްޕިޓަލާއި ލ.ގަން ރީޖަނަލް ހޮސްޕިޓަލްގެ އިތުރުން އައްޑޫ ސިޓީ އިކުއެޓޯރިއަލް ހޮސްޕިޓަލެވެ. މީގެތެރެއިން އައްޑޫ ހޮސްޕިޓަލް ލާމަރުކަޒީ އުސޫލުން ވަކި ބޯޑެއްގެ ދަށުން ހިންގަން ފަށާފައެވެ.