ތިން ރަށެއްގެ ބަނދަރުގެ މަސައްކަތް ކުރުމަށް އެމްޓީސީއާ ހަވާލުކޮށްފިއެވެ.
އެމްޓީސީސީއާ ހަވާލުކޮށްފައިވަނީ އއ.އުކުޅަހު ބަނދަރު ހެދުމުގެ މަސައްކަތާއި، އެރަށުގެ ފެރީ ޓަރމިނަލްގެ ތޮށި ހެދުމުގެ މަސައްކަތާއި، އއ.މާޅޮހާއި ޅ.ހިންނަވަރު ބަނދަރު ތަރައްޤީކުރުމުގެ މަސައްކަތެވެ.
ޅ.ހިންނަވަރު ބަނދަރު ތަރައްޤީކުރުމުގެ މަސައްކަތުގެ ދަށުން އެރަށު ބަނދަރަށް 653 މީޓަރުގެ އެއްގަމު ތޮށި އިތުރުކުރުމަށްވަނީ ހަމަޖެހިފައެވެ. މީގެ އިތުރުން 123 މީޓަރުގެ ސަރަހައްދެއްގައި ބޮޑުހިލައިގެ ބޭރު ތޮށްޓެއްލުމާއި، ބަނދަރާއި ނެރު ފުންކުރުމާއި، އެ ސަރަޙައްދުގެ ބިން ހިއްކުމާއި، ރިވެޓްމަންޓް ޖެހުމާއި، ބަނދަރު ބައްތިޖެހުމާއި ބަނދަރު ވަށައިގެން ޕޭވްމަންޓް ޖެހުންވެސް މިމަސައްކަތުގެ ތެރޭގައި ހިމެނެއެވެ. 99.5 މިލިއަން ރުފިޔާގެ މިމަޝްރޫޢުގެ މަސައްކަތް 350 ދުވަހުގެތެރޭގައި ނިންމުމަށްވަނީ އެއްބަސްވެފައެވެ.
އއ.އުކުޅަހު ބަނދަރު ހެދުމާއި، ފެރީ ޓަރމިނަލްގެ ތޮށި ހެދުމުގެ މަސައްކަތް އެމްޓީސީއާ ހަވާލުކޮށްފައިވަނީ 120 ދުވަސްތެރޭގައި ނިންމާ ގޮތަށެވެ. މިމަސައްކަތުގެދަށުން އެރަށު ބަނދަރަށް 136 މީޓަރުގެ ސަރަޙައްދެއް އިތުރުކުރުމަށްވަނީ ހަމަޖެހިފައެވެ. އަދި ކުދި ދޯނިފަހަރަށް ގާތްކުރެވޭގޮތަށް ޖެޓީއެއް ހެދުންވެސް ހިމެނެއެވެ. މިމަސައްކަތަށް 19.9މިލިއަން ރުފިޔާގެ ޚަރަދުކުރުމަށްވަނީ ހަމަޖެހިފައެވެ.
އެމްޓީސީސީއާ މިއަދު ހަވާލުކުރި އއ.މާޅުހު ބަނދަރު ތަރައްޤީ ކުރުމުގެ މަސައްކަތުގައި ތެރޭގައި އެރަށުގެ ބަނދަރަށް 394 މީޓަރުގެ އެއްގަމު ތޮއްޓެއް އިތުރުކުރުމަށްވަނީ ހަމަޖެހިފައެވެ. މީގެ އިތުރުން 407 މީޓަރުގެ ސަރަހައްދެއްގައި ބޮޑުހިލައިގެ ބޭރު ތޮއްޓެއް ލުމާއި، ބަނދަރު ފުންކުރުމާއި، ބަނދަރު ބައްތިޖެހުމާއި ޕޭވްމަންޓް ހެދުމުގެ މަސައްކަތްތައްވެސް ހިމެނެއެވެ. މި މަސައްކަތް ނިންމުމަށް ހަވާލުކޮށްފައިވަނީ 1 އަހަރު ދުވަސްތެރޭގައެވެ.
މިތިން ރަށުގައި ކުރުމަށް ހަމަޖެހިފައިވާ މިމަސައްކަތް ހަވާލުކުރުމުގެ އެއްބަސްވުމުގައި މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޝަނާ ފާރޫޤްއެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމްއެވެ.