ދަނޑުވެރިންނަށް ޚާއްސަކޮށްގެން އެގްރިކަލްޗަރ އޮންލައިން ސިސްޓަމެއް މިނިސްޓްރީ އޮފް ފިޝަރީޒް، މެރިން ރިސޯސަން އެންޑް އެގްރިކަލްޗަރ ލޯންޗްކުރައްވައިފިއެވެ.
މިއަދު ފާހަގަކުރަމުންދާ ދަނޑުވެރިންގެ ދުވަހާގުޅުވައިގެން އެގްރިކަލްޗަރ މިނިސްޓްރީގައި ބޭއްވި ރަސްމިއްޔާތެއްގައި މި ސިސްޓަމް ރަސްމީކޮށް ލޯންޗްކޮށްދެއްވީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛު ފައްޔާޟް އިސްމާޢީލެވެ.
ދަނޑުވެރިންނަށް ޚާއްސަކޮށްގެން ތަޢާރަފްކުރި މި ސިސްޓަމުން ފޯރުކޮށްދޭ ޙިދުމަތްތަކުގެ ތެރޭގައި ދަނޑުވެރިކަމަށް ބޭނުން ކުރާ ތަކެތި އެތެރެކުރުމުގެ ހުއްދައަށް އެދުމާއި، ހުއްދަ ދޫކުރުމާއި، ދަނޑުބިން ރަޖިސްޓްރީ ކުރުންފަދަ ކަންކަން ހިމެނެއެވެ.
އެގްރިކަލްޗަރ އޮންލައިން ސިސްޓަމް ލޯންޗްކޮށްދެއްވުމަށްފަހު ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟް ވިދާޅުވީ، އިމްޕޯޓް އަދި އެކްސްޕޯޓް ސިނާޢަތުގައި ހަރަކާތްތެރިވާ ފަރާތްތަކުން ކުރަންޖެހޭ ކަންކަން އެއް ވިއުގަރއަކުން ގުޅާލެވިގެން އޮންލައިންކޮށް ކުރެވޭނެ މަގު ފަހިކޮށްދިނުމަކީ ސިންގަލް ވިންޑޯ ނިޒާމުގެ އެންމެ މުހިއްމު އެއް ބޭނުންކަމަށެވެ. އަދި މި ސިސްޓަމްގެ ތެރެއިން ދަނޑުވެރިކަމާގުޅޭ މޮޑިއުލް މިހާރު ލޯންޗްކޮށްފައިވާއިރު، މަސްވެރިކަމާގުޅޭ މޮޑިއުލްވެސް ވަރަށް އަވަހަށް ލޯންޗްކުރައްވާނެކަމަށް މިނިސްޓަރ ވިދާޅުވިއެވެ. މިނިސްޓަރ ފައްޔާޟް ވިދާޅުވީ އޭޝިއަން ޑިވެލޮޕްމަންޓް ބޭންކް، އޭ.ޑީ.ބީގެ އެހީގައި ކުރިއަށްގެންދާ ސިންގަލް ވިންޑޯ ނިޒާމް ހަރުދަނާ ކުރުމަށް ކުރަންޖެހޭ މަސައްކަތްތައް ސަރުކާރުން ކުރައްވަމުންދާކަމަށެވެ.
"އަޅުގަނޑުމެން ސިންގަލް ވިންޑޯ ފުޅާކުރުމުގެ ވިސްނުމުގައި ރައީސުލްޖުމްހޫރިއްޔާގެ އިރުޝާދުފުޅާއެކު މަޝްރޫޢެއް އަޅުގަނޑުމެން ކުރިއަށް އެބަގެންދަން. އެއީ ޚިދުމަތް ލިބިގަންނަން ބޭނުންވާ ހުރިހާ ފަރާތްތަކަށް އެއް ސިންގަލް ވިންޑޯ މެދުވެރިކޮށް ޙިދުމަތްތައް ދެވޭނެގޮތްތަކެއް ފަރުމާކުރުން. އެ މަސައްކަތައިގެން އަޅުގަނޑުމެން މިހާރު ކުރިއަށް އެބަދަން" މިނިސްޓަރ ފައްޔާޟް ވިދާޅުވިއެވެ.
ދަނޑުވެރިކަމުގެ ސިނާޢާތާގުޅޭގޮތުން ވާހަކަފުޅުދައްކަވަމުން އިކޮނޮމިކް މިނިސްޓަރ ފައްޔާޟް ވިދާޅުވީ، ޒަމާންތަކެއްވަންދެން ދަނޑުވެރިކަމުގެ ނަން އެކި ސަރުކާރުތަކުގެ ތެރޭގައި އޮތްނަމަވެސް، މި ސިނާޢަތަކީ މާބޮޑު އަހައްމިއްޔަތުކަމެއް ދެވިފައިވާ ދާއިރާއެއް ނޫންކަމަށެވެ. ނަމަވެސް ރާއްޖެއަށް އިމްޕޯޓްކުރާ ކާބޯތަކެތީގެ ބާވަތްތައް މަދުކޮށް، އިމްޕޯޓް މުދަލަށް ބަރޯސާވާ މިންވަރު ކުޑަކުރުމަކީ މިއަދުގެ ސަރުކާރުގެ ވަރަށް މުހިއްމު ސިޔާސަތެއްކަމަށް މިނިސްޓަރ ވިދާޅުވިއެވެ.
ދަނޑުވެރިންނަށް ބޭނުންވާ އެހީތެރިކަން ފޯރުކޮށްދީ، ދަނޑުވެރިންގެ އުފެއްދުންތައް މާކެޓްކުރުމަށް އެހީވުމުގެ ގޮތުން އެގްރޯ ނެޓް އުފައްދާ، އެކުންފުނީގެ މަސައްކަތްތައް ވަރަށް ބާރަށް ކުރިއަށްދާކަން މިނިސްޓަރ ފާހަގަކުރެއްވިއެވެ. އަދި ދަނޑުވެރިކަމުގެ ސިނާޢާތް ފުޅާކޮށް ކުރިއެރުވުމަށް އެގްރިކަލްޗަރ މިނިސްޓްރީން ކުރަމުންދާ މަސައްކަތްތަކަށް އިކޮނޮމިކް މިނިސްޓްރީގެ ފުރިހަމަ އެއްބާރުލުމާއި އެހީތެރިކަން ލިބިގެންދާނެކަމަށްވެސް މިނިސްޓަރ ވިދާޅުވިއެވެ. އިކޮނޮމިކް މިނިސްޓަރ ފައްޔާޟް ވިދާޅުވީ، ދަނޑުވެރިން އުފައްދާތަކެތި ޔަޤީންކަމާއެކު ވިއްކާލެވޭނެ ނިޒާމެއް ސަރުކާރުން ޤާއިމުކޮށްދެއްވާނެކަމަށެވެ.
"ދަނޑުވެރިންނަށް އެހީތެރިކަން ފޯރުކޮށްދިނުމާއި، އުފައްދާ ތަކެތި ވިއްކޭނެ ނިޒާމެއް ޤާއިމުކުރުމުގެ މަސައްކަތްތައް ވަރަށް ބާރަށް ކުރިއަށް އެބަދޭ ކޯވިޑްގެ ޙާލަތުގައިވެސް. އަޅުގަނޑުމެންގެ އުއްމީދަކީ ކުރިއަށްއޮތް މަސްތަކުގެ ތެރޭގައި ދަނޑުވެރިންނަށް ދަނޑުވެރިން އެއްޗެހި ހައްދަން ބޭނުންވާ އެހީތެރިކަން ފޯރުކޮށްދީ އެބޭފުޅުން ހައްދަވާ އެއްޗެހި ޔަޤީންކަމާއެއްކޮށް ވިއްކާލެވޭނެ ނިޒާމެއް ޤާއިމުކުރުން. އެކަމަށް ވަށާޖެހޭ ސިޔާސަތެއްގެ ތެރެއިން އަޅުގަނޑުމެން މަސައްކަތް ކުރަމުން މިދަނީ" މިނިސްޓަރ ފައްޔާޟް ވިދާޅުވިއެވެ.
އެގްރިކަލްޗަރ މިނިސްޓްރީން ލޯންޗްކުރި "އެގްރިކަލްޗަރ އޮންލައިން ސިސްޓަމް"އަކީ ދަނޑުވެރިކަމުގައި ހަރަކާތްތެރިވާ ފަރާރްތަކަށް ފޯރުކޮށްދޭ އެކި ޚިދުމަތްތައް ފަސޭހައިން އެއް ވިއުގަރއެއްގެ ތެރެއިން ފޯރުކޮށްދިނުމުގެ މަޤްޞަދުގައި ލޯންޗްކުރި ސިސްޓަމެއްކަމަށް އެ މިނިސްޓްރީން ވިދާޅުވެއެވެ. މި ސިސްޓަމަށް އީ-ފާސް މެދުވެރިކޮށް ލޮގް-އިންވެވޭނެ ކަމަށާއި، ސިސްޓަމް ލޯންޗްކޮށްފައިވަނީ ދެ މަސްވަރު ޓެސްޓްކުރުމަށްފަހުކަމަށްވެސް އެގްރިކަލްޗަރ މިނިސްޓްރީން ވިދާޅުވެއެވެ.
އެހެންނަމަވެސް ލިބެމުންދާ ފީޑްބެކްތަކަށް ބަލާ، މި ސިސްޓަމަކީ ވީހާވެސް ފަސޭހައިން ދަނޑުވެރިންނަށް ބޭނުންކުރެވޭނެ ސިސްޓަމަކަށް ހެދުމަށްޓަކާ ޑިވެލޮޕަރުންނާއެކު މަސައްކަތް ކުރަމުންދާކަން އެގްރިކަލްޗަރ މިނިސްޓްރީން ވަނީ ފާހަގަކުރައްވާފައެވެ. އަދި މިފަދަ ސިސްޓަމެއްގެ ސަބަބުން، ކަރުދާސް ޕްރިންޓްކޮށްގެން ކުރަންޖެހޭ މަސައްކަތްތައްވެސް ކުޑަވެގެންދާނެކަމަށް އެ މިނިސްޓްރީން ވިދާޅުވެއެވެ.