ކުޅުދުއްފުށީ ސިޓީގައި ޤަވާޢިދާ ޚިލާފަށް އުޅެމުންދާ ބިދޭސީން ހޯދުމަށް މިހާރު ފަށާފައިވާ އޮޕަރޭޝަނުގައި އިތުރު ބިދޭސީންތަކެއް މިއަދު މާލެ ފޮނުވާލައިފި އެވެ.
ކުޅުދުއްފުށީ ޓާރސްކް ފޯސްއާއި ކައުންސިލުން އިސްނަގައިގެން އަދި މުއައްސަސާތަކުގެ އެއްބާރުލުމާއެކު ކުރިއަށްގެންދާ އޮޕަރޭޝަންގައި އަތުލައިގެންފައިވަނީ ބަންގްލަދޭޝްގެ ރައްޔިތުންނެވެ. އެމީހުން މާލެ ފޮނުވާލީ ބަހާދަރު ބޯޓުންނެވެ.
މިއީ ޤަވައިދާ ޚިލާފަށް އުޅޭ ބިދޭސީން ގައުމަށް ފޮނުވާލުމަށް މިގޮތަށް ކުޅުދުއްފުށި ސިޓީގައި ހިންގުނު ދެވަނަ ބުރެވެ. މިމަހުގެ 10 ވަނަ ދުވަހުވެސް ވަނީ ޤަވާޢިދާ ޚިލާފަށް އުޅެމުންދިޔަ 13 ބިދޭސީއަކު މާލެ ފުރުވާލާފައެވެ. އެ މީހުން މިހާރު ވަނީ އެމީހުންގެ ގައުމަށް ފޮނުވާލާފައެވެ.
ކުޅުދުއްފުށީ ކައުންސިލްގެ ރައީސް ޢަބުދުއްލަޠީފް ޙަސަން ވިދާޅުވީ، ބިދޭސީންގެ މައްސަލައަކީ ޒަމާންތަކެއް ވަންދެން ރާއްޖޭގައި ބޮޑުވެފައިވާ މައްސަލައެއްކަމަށާއި، މިމައްސަލަ ޙައްލު ކުރަން ސަރުކާރުން ކުރަމުންދާ މި މަސައްކަތަކީ މުހިންމު މަސައްކަތެއް ކަމަށެވެ. ލަތީފް ވިދާޅުވީ، މިގޮތަށް ބިދޭސީން ފޮނުވާލުމުން ދިވެހިންނަށް ކުރެވިދާނެ އެތަކެއް މަސައްކަތްތަކެއް އަނބުރާ ދިވެހިންނަށް ލިބިގެން ދިއުމަކީ ދިވެހީންގެ ކުރަމުން އައި އުއްމީދެއްކަމަށެވެ.
މިއަދު ފޮނުވާލީ ބިދޭސީންނާ މާލެއިން ހަވާލުވާނީ އިކޮނޮމިކް މިނިސްޓްރީންނެވެ. ލަތީފް ވިދާޅުވީ، ގަވައިދާ ހިލާފަށް އުޅޭ ބިދޭސީން ހޯދުމުގެ އިތުރު ޕްރޮގުރާމްތައް ކުރިއަށް އޮތްތާވެސް ހިންގާނެ ކަމަށެވެ.
ބިދޭސީން ދިރިއުޅެމުންދިޔަ ގެތައް ދެނެގަނެ އެމީހުން ހޯދައި ހދ އަތޮޅު ތައުލީމީ މަރުކަޒަށް ޖަމާ ކުރުމަށްފަހު . ފުރުވާލަން ވަންދެން ހދ އޭއީސީ ހޯލުގައި ބައިތިއްބުމަށްފަހު އެމީހުން ފުރުވާލީ މިއަދު ހަވީރުގެ ވަގުތެއްގައެވެ. އެތަނުގައި އެ މީހުން ތިބިވަގުތު ރެޑްކްރެސެންޓްގެ ދަރުމަވެރިން ވަނީ އިންސާނީ ކަރާމާތް ޔަގީންކުރުމަށް ހަރަކާތްތެރިވެފައި އެވެ.
އެ މީހުންނަށް ކާބޯތަކެއްޗާއި ބޭނުންވާ ޒަރޫރީ ޚިދުމަތް ކައުންސިލުން ފޯރުކޮށްދީފައިވާއިރު މުއައްސަސާތަކުން ވަނީ އެތަނުގެ ސެކިއުރިޓީއާ އެހެނިހެން އެހީތެރިކަން ފޯރުކޮށްދީފައެވެ.