އަފްޣާނިސްތާނުގެ ރައީސްކަމަށް މިދިޔަ ސެޕްޓެމްބަރުމަހު އިންތިޚާބުވެވަޑައިގެންނެވި އަޝްރަފް ޣަނީ ރައީސްކަމުގެ ހުވާ ކުރައްވައިފިއެވެ.
ރައީސްކަމުގެ ދެވަނަ ދަޢުރަކަށް ހަވާލުވެވަޑައިގެންނެވި އަޝްރަފް ޣަނީގެ ސިޔާސީ ހަތުރު އަދި ކުރީގެ ޗީފް އެގްޒެކެޓިވް އަބްދުﷲ އަބްދުﷲވަނީ އެރަސްމިއްޔާތު ބަލައިގަންނަވަން ދެކޮޅުހައްދަވާ އަމިއްލަ ރަސްމިއްޔާތެއްގައި އިދިކޮޅު ރައީސް ގޮތުގައި ހުވާކުރައްވާފައެވެ. މިދިޔަ ސެޕްޓެމްބަރު މަހު ބޭއްވި އިންތިޚާބުގައި ދެބޭފުޅުންނަށް އެއްވަރަށް ވޯޓު ލިބިވަޑައިގެންނެވުމުން ގިނަ ދެބަސްވުންތަކެއް ހިނގައިފާވެއެވެ. ޤައުމުގެ ހައްޤު ވެރިޔާކަމަށް ދެބޭފުޅުންވެސް ދަޢުވާ ކުރައްވައެވެ. ނަމަވެސް ރިޔާސީ އިންތިޚާބު ކާމިޔާބު ކުރައްވާފައިވަނީ ރައީސް އަޝްރަފް ޣަނީކަމަށް އެޤައުމުގެ އިންތިޚާބާބެހޭ ކޮމިޝަނުންވަނީ ކަނޑައަޅާފައެވެ. އަފްޣާނިސްތާނުން އެމެރިކާއާއި ގުޅިފައިވާ ފައުޖުތައް ފޭބުމަށް އެމެރިކާއާއި ޠާލިބާނުންވެފައިވާ އެއްބަސްވުމަށް އެކަމުގެ ސަބަބުންވަނީ ހިޔަނިއެޅިފައެވެ.
ޣަނީ ރައީސްކަމުގެ ހުވާ ކުރެއްވި ވަގުތު ރިޔާސީ ގަނޑުވަރަށް އަމާޒުކޮށް ރޮކެޓު ޙަމަލާއެއްވަނީ ދީފައެވެ. ނަމަވެސް އެޙަމަލާގައި އެއްވެސް މީހަކަށް ޒަޚަމްވިކަން އެންގިފައެއް ނުވެއެވެ. އަދި ރައީސް ޣަނީވަނީ އެވަގުތު އޭނާ ދެއްވަމުންދިޔަ ޚިޠާބު ކުރިއަށް ގެންދަވާފައެވެ. ނަމަވެސް ހުވާކުރުމުގެ ރަސްމިއްޔާތަށްފަހު ބޭއްވުމަށް ހަމަޖެހިފައިވާ އެހެން ޙަރަކާތްތަކާއި ރަސްމިއްޔާތުތައްވަނީ ފަސްކޮށްފައެވެ.
އަފްޣާނިސްތާނުގައި ހުންނަ އެމެރިކާގެ ޚާއްޞަ މަންދޫބު ޒަލްމޭ ޚާލިލްޒާގުވަނީ ޣަނީއާއި އަޝްރަފާ ދެމެދު އެއްބަސްވުމެއް ޤާއިމުކުރެއްވުމަށް މަސައްކަތްކުރައްވާފައެވެ. ނަމަވެސް އެކަމާބެހޭ ތަފްޞީލެއް ލިބިފައެއް ނުވެއެވެ. ސުލްޙަކުރެއްވުމަށް ޚާލިލްޒާގު ކުރެއްވި މަސައްކަތް ކާމިޔާބުވިކަމަކަށް ނުބެލެވެއެވެ. ރައީސްކަމުގެ ހުވާ ކުރެއްވުމަށް ރިޔާސީ ގަނޑުވަރުގައި ބޭއްވި ރަސްމިއްޔާތަށް ބޭރު ޤައުމުތަކުގެ ގިނަ ޢަދަދެއްގެ ޚާރިޖީ ބޭފުޅުންނާއި ގުޅިފައިވާ ފައުޖުތަކުގެ އިސްވެރިން ބައިވެރިވެވަޑައިގެންނެވިއެވެ.
މަޤާމުގެ ހުވާ ކުރެއްވުމަށްފަހު ދިން ޚިޠާބުގައި ޣަނީ ވިދާޅުވީ އޭނާ އެކުލަވާލައްވާ ސަރުކާރުގައި ހިމެނޭނީ ހަމައެކަނި އޭނާގެ ސިޔާސީ އެކުވެރިން ނޫންކަމަށެވެ. ޠާލިބާނުންނާއެކު ކުރެވޭ މަޝްވަރާތަކުގައި ސަރުކާރުގެ ފަރާތުން ވާހަކަތަކުގައި ބައިވެރިވެ ވަކާލާތުކުރާނެ ވަފުދެއް އެކުލަވާލެއްވުމުގެ މަސައްކަތް ޣަނީދަނީ ކުރައްވަމުންނެވެ. އަދި 5،000 ޤައިދީން މިނިވަންކުރުމަށް ޠާލިބާނުންކޮށްފައިވާ ޝަރުތާއިމެދު ގޮތެއް އިޢުލާނު ކުރައްވާނެކަމަށްވެސްވަނީ ވިދާޅުވެފައެވެ.