މަނީ ލޯންޑަރިންގެ ކުށް ސާބިތުވެ ފަސް އަހަރުދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އެއްގަޑިއިރަށް ގެއަށް ގެނައުމަށްފަހު، އަނބުރާ ޖަލަށް ގެންގޮސްފިއެވެ.
ހައިކޯޓުގައި ކުރިއަށްދިޔަ އިސްތިއުނާފު އަޑުއެހުމަށް މާލެއަށް ގެނައުމަށްފަހު ރައީސް ޔާމީން ގެކޮޅަށް ގެންދިޔައީ ފުލުހުން މިހާރު ބަލަމުންދާ އިތުރު މައްސަލަތަކަކާ ގުޅޭ ގޮތުން ފުލުހުންގެ ބޭނުމަކަށްކަމަށް ވަނީ މަޢުލޫމާތުލިބިފައެވެ. އަދި ގަޑިއެއްހައިއިރު ފަހުން އެމަނިކުފާނު އަލުން މާފުށީ ޖަލަށް ގެންގޮސްފައިވާ ކަމަށްވެސް މަޢުލޫމާތުލިބެއެވެ.
ރައީސް ޔަމީންގެ މައްޗަށް ކޮށްފައިވާ ފަސް އަހަރުދުވަހުގެ ޖަލުޙުކުމުގެ އިސްތިނާފު ޝަރީޢަތުގެ އަޑުއެހުމެއް، ވަނީ ބާއްވާފައެއެވެ. މި އަޑުއެހުމުގައި އޮތީ ކުރިން ޔާމީންގެ ފަރާތްޕުޅުން ހުށަހެޅި ނުކްތާތަކަށް ދައުލަތުގެ ފަރާތުން ޖަވާބުދިނުމެވެ. މިމައްސަލައިގެ ޝަރީޢަތުގައި ދެން އަޑުއެހުމެއް އޮންނާނީ މިމަހުގެ 21 ވަނަ ދުވަހުކަމަށް ޝަރީޢަތުންވަނީ އިޢުލާންކުރައްވާފައެވެ.