ޓުވިޓަރގައި ދައުރުވަމުންދާ ފޮޓޯތަކަކީ ހުކުރު މިސްކިތަށް ކެމިކަލް ޖަހާ ބަންދުކޮށްފައިވަނިކޮށް އެތަނަށް ބަޔަކު ވަދެ ހިންގާފައިވާ ޢަމަލެއްކަމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ބުނެފިއެވެ.
މިކަން ހިންގާފައިވަނީ މިދިޔަ އަހަރުގެ ޑިސެމްބަރުމަހުއެވެ. އަދި ދައުރުވަމުންދާ ފޮޓޯތަކަކީވެސް އޭރުގެ ފޮޓޯތަކެއްކަމަށް ޤައުމީ މަރުކަޒުންވަނީ ބުނެފައެވެ.
ފޮޓޯތަކުން ފެންނަ ގޮތުގައި މިސްކިތުގެ ތެރެއަށްވަނީ ތަފާތު އެކި ބާވަތްތަކުގެ ކުނި އަޅައި، ހަޑިކޮށްފައެވެ.
ނަމަވެސް މިކަން ހިންގުމާއެކު މިސްކިތުގެ އެތެރޭގެ ކާޕެޓްތައް ނަގައި އޭރުވަނީ ސާފުކޮށްފައެވެ. އަދި މިފަދަ ކަމެއް ތަކުރާރުވިޔަ ނުދިނުމަށް ފުލުހުންނާއި ގުޅިގެން އެ ސަރަޙައްދު 24 ގަޑިއިރު ބެލެހެއްޓުމުގެ މަސައްކަތް ކުރަމުންދާކަމަށް ތަރިކަ ރައްކާތެރިކުރާ ޤައުމީ މަރުކަޒުންވަނީ ބުނެފައެވެ.
މިސްކިތް މަރާމާތުކޮށް، މިސްކިތުގެ ހިރިގަލާއި ލަކުޑިތަކަށް ފަރުވާދިނުގެ ޕްރޮޖެކްޓެއް ކުރިއަށް ގެންދިއުމަށް މިސްކިތް މިވަގުތު ހުރީ ބަންދުކޮށްފައެވެ. މި ޕްރޮޖެކްޓަކީ އިންޑިއާއި ގުޅިގެން ކުރިއަށްގެންދާ 2 އަހަރުގެ ޕްރޮޖެކްޓެކެވެ.