ށ.ކޮމަންޑޫގައި އަޅާ އާ އިންޖީނުގޭގެ ޢަމަލީ މަސައްކަތް ކުރުމަށް ފެނަކައިން ކުންފުންޏަކާ ހަވާލުކޮށްފިއެވެ. ފެނަކައިން މި މަސައްކަތް ހަވާލުކޮށްފައިވަނީ އަންލިމިޓެޑް ހޯލްޑިންގްސް ޕްރައިވެޓް ލިމިޓެޑާއެވެ. ށ.ކޮމަންޑޫގައި އަޅާ އާ އިންޖީނުގޭގެ މަސައްކަތަކީ އެރަށުގެ އިންޖީނުގެ މީހުން ދިރިނޫޅޭ ސަރަޙައްދަށް ބަދަލުކުރުމަށް ކުރިއަށްގެންދާ މަޝްރޫޢުގެ ދަށުން ކުރަމުންދާ މަސައްކަތެކެވެ.
މި މަޝްރޫޢަކީ ފެނަކައިން 7.8 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ. މިމަޝްރޫޢުގެ ދަށުން އިންޖީނު ބަހައްޓާ އިމާރާތެއް ހެދުމާއި، އިދާރީ މަސައްކަތްތަކަށް ޚާއްސަ އިމާރާތަކާއި، ފިއުލް ސްޓޯރޭޖް ހެދުމަށްވަނީ ހަމަޖެހިފައެވެ.
މިމަޝްރޫޢުގެ މަސައްކަތް އަންނަ އަހަރުގެ ފެބްރުއަރީމަހު ނިންމާނެކަމަށް ފެނަކައިން ބުނެއެވެ.
މަސައްކަތް ހަވާލުކުރުމުގެ އެއްބަސްވުމުގައި ފެނަކައިގެ ފަރާތުން ސޮއިކުރެއްވީ ފެނަކައިގެ މޭނޭޖިންގ ޑިރެކްޓަރ އަޙްމަދު ސަޢީދު މުޙައްމަދުއެވެ. އަދި އަންލިމިޓެޑް ހޯލްޑިންގްސްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ އަޙްމަދު ޝިމާލްއެވެ.
ރަށްރަށުގެ ކަރަންޓުގެ ޚިދުމަތުގެ ފެންވަރު ރަނގަޅުކުރުމަށް ފެނަކައިންދަނީ ގިނަ މަސައްކަތްތައް ކުރަމުންނެވެ. އެގޮތުން އެއް މަސައްކަތަކީ މީހުންނަށް އުނދަގޫވާގޮތަށް ރަށުތެރޭގައި ހުންނަ އިންޖީނުގެތައް، މީހުން ދިރިނޫޅޭ އެކަހެރި ސަރަޙައްދުތަކަށް ބަދަލުކުރުމުގެ މަސައްކަތެވެ.