އަދިވެސް މެލޭޝިޔާގެ ބޮޑުވަޒީރުކަން ކުރައްވަން ޝައުޤުވެރިވެވަޑައިންނަވާކަމަށް މަހާތިރު ވިދާޅުވެއްޖެ
މިހަފުތާގައި އިސްތިޢުފާދެއްވި މެލޭޝިޔާގެ ބޮޑުވަޒީރު މަހާތިރު މުޙައްމަދަށް ރައްޔިތުންގެ ތާޢީދުއޮތްނަމަ އަލުން އެމަޤާމާ ހަވާލުވެވަޑައިގަތުމަށް ތައްޔާރަށް ހުންނެވިކަމަށް އޭނާ ވިދާޅުވެއްޖެއެވެ. 94 އަހަރުގެ މަހާތިރު ބޮޑުވަޒީރުކަމުން އިސްތިޢުފާދެއްވާފައިވަނީ މިދިޔަ ހޯމަ ދުވަހުއެވެ. ނަމަވެސް އިސްތިޢުފާގެ ސިޓީ ހުށަހެޅެއްވުމުން މެލޭޝިޔާގެ ރަސްގެފާނުވަނީ އިންތިޤާލީ ބޮޑުވަޒީރަކަށް މަހާތިރު ޢައްޔަންކުރައްވާފައެވެ.
އޭގެ ފަހުން ފުރަތަމަ ފަހަރަށް ޤައުމާ މުޚާތަބުކުރައްވާ ވާހަކަދައްކަވަމުން ސިޔާސީ ޕާޓީތައް ނުހިމެނޭގޮތަށް ގުޅިފައިވާ ސަރުކާރެއް އުފެއްދުމަށް މަހާތިރު ގޮވާލެއްވިއެވެ. ޓީވީ މެދުވެރިކޯށް ދެއްވި ބަޔާނުގައި މިނިވަން ސަރުކާރެއް އެކުލަވާލާ ޤައުމުގެ މަޞްލަޙަތު އިސްކުރުމަށް މަހާތިރު ގޮވާލެއްވިއެވެ. ނަމަވެސް މަހާތިރުގެ ސިޔާސީ ޚަތުރު، އަންވަރު އިބްރާހީމަށް ބޮޑުވަޒީރުކަމުގެ މަޤާމު ދާޢީމީގޮތެއްގައި ހަވާލުކުރާނެކަމަށް ބެލެވޭކަމަށް އަންވަރަށް ތާޢީދުކުރާ މީހުން ބުނެއެވެ.
2009ވަނަ އަހަރުންފެށިގެން ބޮޑުވަޒީރުކަމުގައި ހުންނެވި ނަޖީބު ރައްޒާޤް އިންތިޚާބުގައި ބަލިކުރެއްވުމަށް މަހާތިރުވަނީ ޕީޕަލްސް ޖަސްޓިސް ޕާޓީގެ ރައީސް އަންވަރާއެކު 2018ވަނަ އަހަރު އިއްތިޙާދެއް އުފައްދަވާފައެވެ. މަހާތިރުވަނީ އިންތިޚާބު ކާމިޔާބުކުރެވިއްޖެނަމަ ދައުރުގެ މެދުން ބޮޑުވަޒީރުކަން އަންވަރާ ހަވާލުކުރައްވަން އެއްބަސްވެވަޑައިގެންފައެވެ. ނަމަވެސް ބޮޑުވަޒީރުކަމުން އިސްތިޢުފާ ދެއްވުމުގެ ކުރިން ސަރުކާރު ހިންގާ އިއްތިޙާދުގެ ބައިވެރިންނާއި އިދިކޮޅު ޕާޓީތަކާދެމެދުވަނީ އަންވަރަށް ބޮޑުވަޒީރުކަން ހަވާލުނުކޮށް، ސަރުކާރެއް އުފެއްދުމާގުޅޭގޮތުން މަޝްވަރާކޮށްފައެވެ.
އަދި މަހާތިރު ނިސްބަތްވެވަޑައިގަންނަވާ މެލޭޝިޔަން ޔުނައިޓެޑް އިންޑިޖިނަސް ޕާޓީ ސަރުކާރު ހިންގާ އިއްތިޙާދުންވަނީ ވަކިވެފައެވެ.