ރަށު ފެންވަރުގައި ކުނި ނައްތާލުމާގުޅޭ މަސައްކަތު ބައްދަލުވުމެއް ބ.އަތޮޅަށް އަމާޒުކޮށްގެން ކުރިއަށްގެންގޮސްފިއެވެ. އެއް ދުވަހުގެ މުއްދަތަށް ބ. އޭދަފުށީގައި ކުރިއަށްގެންދިޔަ މި މަސައްކަތު ބައްދަލުވުމުގައި ރަށު ފެންވަރުގައި ކުނި ނައްތާލާނެ ގޮތްތަކާމެދު ވަނީ މަޝްވަރާ ކޮށްފައެވެ.
މި މަސައްކަތު ބައްދަލުވުން ޚާއްޞަކޮށްފައިވަނީ މޯލްޑިވްސް ކްލީން އެންވަޔަރަންމަންޓްގެ ދަށުން ޒޯން ދޭގައި ކުރިއަށްގެންދިޔުމަށް ހަމަޖެހިފައިވާ ރީޖަނަލް ވޭސްޓް މެނޭޖްމަންޓް ޕްރޮޖެކްޓް ފެށުމުގެ ކުރިން އެކަންކަން ކުރިއަށްދާނެގޮތުގެ މަޢުލޫމާތު ކައުންސިލްތައް މެދުވެރިކޮށް ރައްޔިތުންނަށް ފޯރުކޮށްދިނުމުގެ ބޭނުމުގައެވެ. މި ބައްދުލުމަށްފަހު ކޮންމެ ރަށެއްގައިވެސް ވޭސްޓް މެނޭޖްމަންޓް ކޮމެޓީތަކެއް އެކުލަވާލައި، އެކޮމެޓީތަކާ މިނިސްޓްރީ ގުޅިގެން މި ރަށްތަކަށް ދިމާވެފައިވާ ކުނީގެ މަސައްލަތަކަށް ހައްލު ހޯދައިދިނުމަށް މަސައްކަތްތަކެއް ކުރެވޭނެ ކަމަށް މޯލްޑިވްސް ކްލީން އެންވަޔަރަންމަންޓް ޕްރޮޖެކްޓްގެ ކޮމިޔުނިކޭޝަން ސްޕެޝަރލިސްޓް މުނާޒް މުބާރިކް ވިދާޅުވިއެވެ.
މުނާޒް ވިދާޅުވީ މިކަމާ ގުޅުންހުރި އިތުރު ބައްދަލުވުންތައް ބާއްވާނެކަމަށާ، އެބައްދަލުވުންތައް ބާއްވާނީ މިފަހަރުގެ ބައްދަލުމުން ނުކުންނަ ނަތީޖާއަށް ބެލުމަށްފަހުގައި ކަމަށެވެ. މިމަސައްކަތު ބައްދަލުވުމުގައި، ބ.އަތޮޅުގެ 13 ރަށުން، ކައުންސިލްތަކާ ސިއްޙީ ދާއިރާގައި މަސައްކަތް ކުރާ ފަރާތްތަކުން ވަނީ ބައިވެރިވެފައެވެ.
މި ބައްދަލުވުމުގެ ސަބަބުން ރަށުފެންވަރުގައި ކުނި ނައްތާލުމަށް ހުރި ގޮންޖެހުތަކާ އެކަންކަން ހައްލުކުރާނެގޮތް ރަގަޅަށް އެނގިގެން ދިޔަކަމަށް ބައިވެރިންވަނީ ބުނެފައެވެ. މިމަސައްކަތު ބައްދަލުވުމުގައި، ބ.އަތޮޅުގެ 13 ރަށުން، ކައުންސިލްތަކާ ސިއްޙީ ދާއިރާގައި މަސައްކަތް ކުރާ ފަރާތްތަކުން ވަނީ ބައިވެރިވެފައެވެ.