އައްޑޫގެ ކަރަނޓު ޙާލަތު ރަނގަޅު ކުރުމަށް އައްޑޫގައި 2 މެގަވޯޓުގެ 2 އިންޖީނު ބެހެއްޓުމުގެ މަސައްކަތް ފެނަކަ ކޯޕަރޭޝަނުން ފަށައފިއެވެ. 10 ވަރަކަށް ދުވަސް ތެރޭ މިމަސައްކަތް ނިމޭނެ ކަމަށް ފެނަކަ އައްޑޫ ގޮފިން މައުލޫމާތު ދެއެވެ.
ޕީއެސްއެމް އަށް މައުލޫމާތު ދެމުން ފެނަކަ އައްޑޫ ގޮފިން ބުނީ، މިއީ ކުރިއަށް އޮތް ރޯދަމަހާއި ދިމާކޮށް އައްޑޫގެ ކަރަންޓް ކެޕޭސިޓީ އިތުރުކުރުމަށް ކުރެވެމުންދާ މަސައްކަތެއް ކަމަށެވެ. އަދި މި ދެ އިންޖީނު ބެހެއްޓުމުގެ އިތުރުން، ޕެނަލްބޯޑު ވެސް ވަރަށް އަވަހަށް ލިބޭނެ ކަމަށާއި، މިކަމުގެ ސަބަބުން ފެނަކައިން މިހާރު އައްޑޫގައި ޚިދުމަތް ދެމުންދާ ނެޓްވޯކްވެސް އަޕްގްރޭޑް ކުރެވޭނެ ކަމަށް އެފަރާތުން ބުނެއެވެ.
އައްޑޫސިޓީގެ ސަރަހައްދީ އިންޖީނުގޭގައި މިހާރު ބޭނުން ކުރުމުންދަނީ މުޅިއެކު ޖުމްލަ 8.5 މެގަވޯޓެވެ. މި ދެ އިންޖީނާއި އެކު 12.5 މެގަވޯޓަށް ކެޕޭސިޓީ އިތުރުވެގެންދާނެއެވެ. އައްޑޫގެ ސަރަހައްދީ އިންޖީނުގެ މެދުވެރިކޮށް ގަން، ފޭދޫ، މަރަދޫ-ފޭދޫ، މަރަދޫ އަދި ހިތަދޫ އަށް ކަރަންޓްގެ ޚިދުމަތް ދެއެވެ. މިއީ ފެނަކައިން ޚިދުމަތްދޭ އެންމެ ބޮޑު ނެޓްވޯކެވެ.
ސަރުކާރުންވަނީ އައްޑޫ ސިޓީގެ ކަަރަންޓްގެ މައްސަލައަށް ޙައްލު ގެނައުމަށް އެރަށުގައި 20 މެގަވޮޓްގެ ކަރަންޓް ފެސިލިޓީއެއް ޤާއިމުކުރުމަށްވެސް ނިންމާފައެވެ. ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަނާ، މިމަސައްކަތް ޙަވާލު ކޮށްފައިވަނީ 37 މިލިއަން ރުފިޔާއަށް 15 މަސްދުވަހުގެތެރޭގައި ނިންމާގޮތަށެވެ. މި އިންޖީނުގޭގެ މަސައްކަތް ނިމުމުން އިންޖީނުގެ ހިންގާނީ ފެނަކަ ކޯޕަރޭޝަނުންނެވެ.