ޔޫއެފާ ނޭޝަންސް ލީގުގައި ރޭ ނޯވޭ އާއި ދެކޮޅަށް ޕޯޗުގަލް ކުޅުނު މެޗު 2-1 ގެ ނަތީޖާއަކުން ޕޯޗުގަލް މޮޅުވެއްޖެއެވެ.
ނޭޝަންސް ލީގުގެ ގްރޫޕް ހަތަރެއްގައި ކުޅުނު މި މެޗަށް ޕޯޗުގަލް ނޯވޭގައި ގައި ނިކުތްއިރު އެ ޓީމުގެ ކެޕްޓަން އަދި އެންމެ ތަޖުރިބާކާރު ކުޅުންތެރިޔާ ކްރިސްޓިއާނޯ ރޮނާލްޑޯ ހުރީ ބެންޗުގައެވެ. އަދި މެޗުގެ އެއްވެސް ހިސާބެއްގައި އޭނާއަށް ކުޅެއް ފުރުސަތު ދީފައެއް ނުވެއެވެ.
ރޮނާލްޑޯގެ އިތުރުން މި މެޗުގައި މެންޗެސްޓަރ ޔުނައިޓެޑްގެ މިޑްފީލްޑަރ ބްރޫނޯ ފެނާންޑޭޒްއަށް ލިބިފައިވާ އަނިޔާގެ ސަބަބުން އޭނާވެސް ކުޅެފައެއް ނުވެއެވެ.
ނޯވޭއިން ގިނައިރު ބޯޅަ ހިފަހައްޓައިގެން ކުޅެފައިވާ މި މެޗުގައި އެ ޓީމުންވަނީ ލަނޑު ޖަހާނެ ގިނަ ފުރުސަތުތަކެއް ތަނަވަސްކޮށްފައެވެ.
ނަމަވެސް މެޗުގެ 17 ވަނަ މިނިޓުގައި ފުރަތަމަ ލަނޑު ޖަހާ ލީޑު ނަގާފައިވަނީ ޕޯޗުގަލްއިންނެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ ޕެޑްރޯ ނެޓޯގެ އެސިސްޓަކުން ޖޮއާއޯ ފޭލިކްސްއެވެ.
ނޯވޭއިން މެޗުގެ ނަތީޖާ އެއްވަރުކޮށްފައިވަނީ މެޗުގެ ދެވަނަ ހާފުގެ ކުޅުން ފެށުނުތާ 6 ވަނަ މިނިޓުގައި އާލިން ހާލާންޑް ކާމިޔާބުކޮށްދިން ލަނޑުންނެވެ. މިއީ އޭނާ ނޭޝަންސް ލީގުގައި ޖެހި 22 ވަނަ ލަނޑެވެ. އަދި ނޯވޭގެ ގައުމީ ޓީމަށް ޖަހައިދިން 65 ވަނަ ލަނޑެވެ.
މި މެޗުން ޕޯޗުގަލް މޮޅުވެ އެ ޓީމަށް ތިން ޕޮއިންޓް ކަށަވަރުވެފައިވަނީ މެޗުގެ 54 ވަނަ މިނިޓުގައި ނޯވޭގެ ގޯލުކީޕަރު ނައިލާންޑް ހެދި ގޯހެއްގެ ފައިދާ ނަގާ ގޮންޒާލޯ ރާމޯސް ކާމިޔާބުކޮށްދިން ލަނޑުންނެވެ.
ޕޯޗުގަލްއިން ދެވަނަ ފަހަރަށް ލީޑު ނެގިތާ ގިނައިރުތަކެއް ނުވަނީސް ނައިލާންޑްގެ އިތުރު ގޯހަކުން ރާމޯސް އިތުރު ލަނޑެއް ޖެހި ނަމަވެސް ވީޑިއޯ އެސިސްޓެންޓް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.