ހުޅުމާލެ ދެވަނަ ފިޔަވަހިން ބިން ވިއްކުމާމެދު ވަކި ގޮތެއް ނިންމާފައި ނުވާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބުނެފިއެވެ. އެޗްޑީސީން މިހެން ބުނެފައިމިވަނީ ހުޅުމާލެ ދެވަނަ ފިޔަވަހިން ބިން ވިއްކުމުގެ މަސައްކަތް އެޗްޑީސީން ކުރަމުންދާކަމަށް ބުނެ ބައެއް މީޑިއާތަކުގައި ޚަބަރު ފެތުރިފައިވަނިކޮށެވެ.
މިކަމާއި ގުޅިގެން އެޗްޑީސީން ނެރުނު ނޫސް ބަޔާނެއްގައި ބުނެފައިވަނީ ހުޅުމާލެއަކީ މާސްޓަރ ޕްލޭނެއްގެ ދަށުން ތަރައްޤީކުރަމުންދާ ރަށަކަށްވާއިރު، މި ޕްލޭންގައި ހުޅުމާލެއިން އެކި ބޭނުންތަކަށް ބިން ދޫކުރުމަށް ހިމަނާފައިވާކަމަށެވެ. އެގޮތުން ގެދޮރު ހެދުމާއި، ވިޔަފާރިއާއި، އިންޑަސްޓްރިއަލް މަސައްކަތްތައް ކުރުމަށް މި މާސްޓަރ ޕްލޭންގައި ހިމަނާފައިވާކަމަށެވެ. ނަމަވެސް މީގެތެރެއިން އެންމެ ބޮޑު ހިއްސާއެއް އޮތީ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހިންގާ މަޝްރޫޢުތަކަށް ކަމަށް އެޗްޑީސީންވަނީ ބުނެފައެވެ. މީގެތެރޭގައި "ސޯޝަލް އަދި "އެފޯޑަބަލް ހައުސިންގ" މަޝްރޫޢުތައް ހިމެނެއެވެ.
އަދި ރައީސުލްޖުމްހޫރިއްޔާ އިޢުލާންކުރައްވާފައިވާ ގޮތަށް މާލެއިން ލިބިފައިވާ ބިންކޮޅު ދޫކޮށްލައި، ވެށި ފަހި މާލެ ޕްރޮގްރާމްގެ ދަށުން ގޯތި ލިބޭނެ ކަމުގެ ލިޔުން ލިބުނު ފަރާތްތަކުގެ ތެރެއިން މިހާތަނަށް ގޯތި ލިބިފައި ނުވާ ފަރާތްތަކަށް މިއަހަރު ގޯތި ދޫކުރާނެކަމަށް އެޗްޑީސީން ވަނީ ބުނެފައެވެ. މި ފަރާތްތަކަށް މިއަހަރުގެ ތެރޭގައި ގޯތި ދިނުމަށް ކުރަންޖެހޭ މަސައްކަތްތައް ކުރަމުން އަންނަކަމަށް އެޗްޑީސީން ބުނެއެވެ.
ނަމަވެސް ހުޅުމާލެ ދެވަނަ ފިޔަވަހިން ބިން ވިއްކާނެ ވަކި މުއްދަތެއް އެޗްޑީސީން ހާމަކޮށްފައެއް ނުވެއެވެ.