ކޮރޯނާވައިރަހަށް ސްކްރީންކުރުމަށް ރާއްޖޭގައި ބޭނުން ކުރެވެނީ އެންމެ ފަހުގެ ސިސްޓަމްތައް: ގްލެން

ކޮރޯނާވައިރަސްއަށް ސްކްރީންކުރުމަށް ރާއްޖޭގައި މިވަގުތު ބޭނުންކުރަމުން އަންނަނީ ދުނިޔެގައި މިވަގުތު ބޭނުންކުރާ އެންމެ ފެންވަރު ރަނގަޅު ސިސްޓަމްތައް ކަމަށް ކޮރޯނާވައިރަސްއާއި ގުޅިގެން ރާއްޖޭގައި ރިސްކް މެނޭޖް ކޮންސަލްޓެންޓެއްގެ ގޮތުގައި މަސައްކަތްކުރައްވާ ގްލެން ސީ ޝޮއޮން ވިދާޅުވެއްޖެއެވެ.


ރައިސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ގެލެން ވިދާޅުވީ ރާއްޖޭގައި މީގެ ކުރިންވެސް ކޮރޯނާއަށް ސްކްރީން ކުރެވޭނެ ސިސްޓަމްތައް ހުރިކަމަށާއި މިހާރު ވަނީ އެސިސްޓަމްތައް އަޕްގްރޭޑުކޮށްފައިކަމަށެވެ. އެގޮތުން ރާއްޖޭގެ މައި އެއަރޕޯޓު ވެލާނާ އިންޓަރނޭޝަނަލް އެއަޕޯޓާއި އައްޑޫ ގަން އިންޓަރނޭޝަނަލް އެއަރޕޯޓާއި ހަނިމާދޫ އިންޓަނޭޝަނަލް އެއަރޕޯޓުގައި މިވަގުތު ހުރި ސިސްޓަމްތައް އަޕްގްރޭޑުކުރުމަށް އީ75 އަދި އީ53 ބްރޭންޑުގެ ކެމެރާތައް ގެނެސް ހަރުކޮށްފައިވާކަމަށް ގްލެން ވިދާޅުވިއެވެ. އެގޮތުން މިސިސްޓަމުތަކުން ވައިރަސް ހުންނަ މީހުން ދެނެގަތުމުގައި އިތުރު ޔަގީންކަމެއް އޮންނާނެކަމަށާއި މިސިސްޓަމްތަކުން ފޯލްސް އެލަރމްތައް އެޅުމުގެ ސަބަބުން ސްކްރީންކުރުމަށް ބުރުއެރުމުގެ ފުރުސަތު ކުޑަވާނެކަމަށް ގްލެން ވިދާޅުވިއެވެ.

ގްލެންވިދާޅުވީ މިވަގުތ ރާއްޖޭގައި ހުރި ތާމަލް ކެމެރާ ސިސްޓަމްތަކަކީ ދުނިޔޭގައި މިވަގުތު ހުރި އެންމެ ފަހުގެ ސިސްޓަމްތައްކަމަށެވެ. އަދި އެހެން ޤައުމުތަކާއި ޚިލާފަށް ރާއްޖެގައި ސިސްޓަމްތައް ހުރިގޮތުން ސެކިއުރިޓީ އިތުރަށް ވަރުގަދަކަން ގްލެން ފާހަގަކުރެއްވިއެވެ.

ސަރުކާރުގެ ރިސްކް މެނޭޖްމަންޓް ކޮންސަލްޓެންޓެއްގެ ގޮތުގައި ރާއްޖެވަޑައިގެން އުޅުއްވާ ގްލެންގެ ޓީމް ތަރމަލް ކެމެރާ ބޭނުންކުރުމަށް ރާއްޖެއިން 75 މީހުން ތަމްރީންކޮށްފައެވެ.

ގްލެން ވިދާޅުވީ ކުއްލިޙާލަތެއްގައި ސަރުކާރުން އަންގަވައިފިނަމަ އެސިސްޓަމްތައް ސްކްރީންނިންގ ބޭނުންވާ އެހެން ސަރަޙައްދަކަށް ބަދަލުކުރެވޭނެކަންވެސް ގްލެން ފާހަގަކުރެއްވިއެވެ. ކޮރޯނާވައިރަސްގެ ސަބަބުން އެއަރޕޯޓުތަކުގެ ތަމާލް ކެމެރާ ބޭނުންކޮށްގެން ސްކްރީންކުރަން ފަށާ ޕޯޓްތަކުގެ ސެކިއުރިޓީ ވަރުގަދަކުރި ފުރަތަމަ ޤައުމުތަކުގެ ތެރޭގައި ރާއްޖެ ހިމެނެއެވެ. ކޮރޯނާ ވައިރަސްގެ ސަބަބުން މުޅި ދުނިޔެގައި ކުއްލި ނުރައްކަލުގެ ޙާލަތު އިއުލާންކޮށްފައިވާއިރު ޤައުމުތަކުން އަންނަނީ މިވައިރަހާއި ދެކޮޅަށް ރައްކަތެރިވުމުގެ ފިޔަވަޅުތައް އަޅަމުންނެވެ.