ހިތަދޫ ސްކޫލަށް 60 ކޮމްޕިއުޓަރު ރައްޔިތުން މަޖިލީހުން ހަދިޔާ ކޮށްފިއެވެ.
ރައްޔިތުންގެ މަޖިލީހުން ހަދިޔާ ކޮށްފައިވާ ކޮމްޕިއުޓަރު ތަކަކީ މީގެ ކުރީން ރައްޔިތުންގެ މަޖިލީހުގެ މެންބަރުން ބޭނުން ކުރެއްވި ކޮމްޕިއުޓަރުތަކެކެވެ. މިތަކެއްޗާ ގުޅޭ ގޮތުން ހިތަދޫ ސްކޫލުގެ ޕްރިންސިޕަލް އާސިޔަތު މުޙައްމަދު ދީދީ ވިދާޅުވީ، މިތަކެއްޗާ ބެހޭ މަޢުލޫމާތު އެނގުމާއެކު ހެން މި ކޮމްޕިއުޓަރ ހޯދުމަށް މަޖިލީހަށް ސިޓީ ފޮނުވާފައިވާ ކަމަށެވެ. އަދި ދާދި ފަހުން މަޖިލީހުގެ ރައީސް، ރައީސް މުޙައްމަދު ނަޝީދު އައްޑުއަށް ކުރެއްވި ދަތުރުފުޅެއްގައި ވެސް މިކަމާ ގުޅިގެން މަޝްވަރާ ކުރެއްވި ކަމަށެވެ.
މިކޮމްޕިއުޓަރު ތައް ޙަވާލު ކުރަން ނިންމި ކަން އަންގައި މަޖިލީހުގެ ރައީސް ވަނީ ހިތަދޫ ސްކޫލުގެ ޕްރިންސިޕަލަށް އެކަން އަންގަވާފައި ކަމަށް ހިތަދޫ ސްކޫލުން މަޢުލޫމާތު ދެއެވެ. އަދި ސްކޫލުގެ ކަންކަން ކުރިއަށްދާ ގޮތާއި، މިތަކެތީގެ ބޭނުން ހިފާނެ ގޮތްތައް ވަނީ އޮޅުން ފިލުއްވާފައި ކަމަށް ހިތަދޫ ސްކޫލުން ބުނެއެވެ.
ހިތަދޫ ސްކޫލުން ބުނީ އެސްކޫލުގެ ލެބްގައި މިހާރު ބޭނުން ކުރަން ހުރީ މަދު ކޮމްޕިއުޓަރު ތަކެއް ކަމަށެވެ. އޭނާ ވިދާޅުވީ ދައުލަތުގެ މުއައްސަސާތަކުގެ މެދުގައި މިފަދަ ތަކެތި މިގޮތަށް ބަދަލުވެގެން ދިއުމަކީ ނުހަނު ބޭނުން ތެރި ކަމެއް ކަމަށެވެ. އެއީ ގިނަ ފަހަރަށް މިފަދަ ތަކެތި ގުދަން ކުރެވި ހަލާކުވެގެން ދާނެތީކަން އޭނާ ފާހަގަ ކުރެއްވިއެވެ.
އެސްކޫލުން މަޢުލޫމާތު ދިން ގޮތުގައި މި 60 ކޮމްޕިއުޓަރު ބޭނުން ކުރުމަށް ހަމަޖެހިފައިވަނީ، ސްކޫލުގެ ކޮމްޕިއުޓަރ ލެބް އަޕްގްރޭޑް ކުރުމަށާއި، ސްކޫލުގެ ސްޓާފުންގެ ބޭނުންތަކަށެވެ. އަދި ބާކީ ވާއެއްޗެއް ނަމަ އެހެން ސްކޫލަކުން އެދިއްޖެ ޙާލަތެއްގައި ވަކި އުޞޫލެއްގެ ދަށުން ދިނުމަށް ނިންމާފައިވާ ކަމަށްވެސް އާސިޔަތު ވިދާޅުވިއެވެ.