ކުޑަކުދިންގެ ހައްޤުތައް ރައްކާތެރިކުރުމަށް ހއ އަތޮޅުގައި ފުލުހުން ޙާއްސަ ހަރަކާތްތަކެއް ހިންގަނީ

ކުޑަކުދިންގެ ހައްޤުތައް ރައްކާތެރިކޮށް، އެކުންދިންނަށް އުފާވެރި މާޙައުލެއް ޤާއިމުކޮށްދިނުމުގެ ގޮތުން ފުލުހުން ޙާއްސަ ހަރަކާތްތަކެއް ހއ. އަތޮޅުގައި ފަށައިފިއެވެ.

މިއީ ކުޑަކުދިންނަށް ކުރާ އަނިޔާއާއި ދެކޮޅަށް މަސައްކަތްކުރާ ދުވަހާއި، ބައިނަލްއަޤްވާމީ ކުޑަކުދިންގެ ދުވަހާއި ގުޅުވައިގެން ހއ. އަތޮޅުގެ މީހުން ދިރިއުޅޭ 14 ރަށަށް އަމާޒުކޮށްގެން ހަފްތާއަކަށް ބަހާލައިގެން ކުރިއަށްގެންދާ ޙާއްސަ ޙަރަކާތެއްކަމަށް ފުލުހުން ވިދާޅުވެއެވެ.

ފުލުހުންގެ ހެޑް އޮފް ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓް ސުޕްރިޓެންޑެޑް އޮފް ޕޮލިސް ޙަސަން ހަނީފް ވިދާޅުވީ، މި ހަރަކާތުގެ ދަށުން ހއ. އަތޮޅުގެ މީހުން ދިރިއުޅޭ ރަށްރަށުގެ ރައްޔިތުންނަށް ކުޑަކުދިންގެ ހައްޤުތަކާއި ގުޅޭގޮތުން މަޢުލޫމާތުދީ، ހޭލުންތެރިކުރުވުމުގެ އެކި ހަރަކާތްތައް ކުރިއަށްގެންދިއުމަށް ހަމަޖެހިފައިވާކަމަށެވެ. އަދި ހއ. އަތޮޅުގެ މީހުން ދިރިއުޅޭ ހުރިހާ ރަށެއްގައި ކުޑަކުދިންނަށް ކުރާ އަނިޔާ ހުއްޓުވުމާއި އެކުންދިންގެ ހައްޤުތައް ހިމާޔަތްކުރުމުގެ މުހިއްމުކަން އަންގުވައިދޭ ބިލް ބޯޑްތަކެއް ހަރުކުރުމަށް ހަމަޖެހިފައިވާކަމަށްވެސް އޭނާ ވިދާޅުވިއެވެ.

ހަނީފް ވިދާޅުވީ، ހަފްތާއަކަށް ކުރިއަށްގެންދާ މި ހަރަކާތުގެ ތެރެއިން "ކަލަރ ރަން"އަކާއި، "ޒީރޯ-ޕްލާސްޓިކް ކްލީނިންގ" ހަރަކާތަކާއި، ކުޑަކުދިންގެ ފެސްޓިވަލެއް ދިއްދޫގައި ބޭއްވުމަށް ހަމަޖެހިފައިވާކަމަށެވެ. މިފަދަ ހަރަކާތްތަކެއް ހިންގުމުގެ އެންމެ ބޮޑު އަމާޒަކީ ކުޑަކުދިންނަށް ރައްކާތެރި މާޙައުލެއް ޤާއިމުކޮށްދިނުމަށް ބާރުއެޅުންކަމަށާއި، މިއީ ފުލުހުންގެ ސްޓްރެޓެޖިކް ޕްލޭންގައިވެސް ވަރަށް ބޮޑު އަޙައްމިއްޔަތުކަމެއްދީފައިވާ ދާއިރާއެއްކަން ހަނީފް ފާހަގަކުރެއްވިއެވެ.

މި ހަރަކާތްތައް ކުރިއަށްގެންދަނީ ފުލުހުންނާއި، ޔުނިސެފްއާއި، ކުޑަކުދިންގެ ހައްޤުތަކަށް މަސައްކަތްކުރާ ޖަމިއްޔާތަކާއި، ކަމާގުޅުންހުރި މިނިސްޓްރީތައް ގުޅިގެންކަމަށް ފުލުހުން މަޢުލޫމާތުދެއެވެ.