ސިވިލް ސަރވިސް ޓްރެއިނިން އިންސްޓިޓިއުޓުން 175 މުވައްޒަފަކު ދަސްވެނިވެއްޖެއެވެ.
މިއަދު އެ އިންސްޓިޓިއުޓުގައި އޮތް ރަސްމިއްޔާތެއްގައި ވަނީ މިއަހަރު ހިންގި ދިގު މުއްދަތުގެ 8 ކޯހެއްގެ ތެރެއިން 5 ކޯހެއް ނިންމި މުވައްޒަފުންނަށް ތަމްރީން ހާސިލް ކުރި ކަމުގެ ސެޓުފިކެޓާއި އިނާމް ހަވާލުކޮށްފައެވެ. އެގޮތުން ކުރިޔަށްގެންދިޔަ ކޯސްތަކުގެ ތެރޭގައި ސެޓިފިކެޓް 3 އިން މެނޭޖުމެންޓާއި، ސެޓުފިކެޓް 3 އިން އޮފީސް އެޑްމިނިސްޓުރޭޝަން އާއި ޔުނިވަރސިޓީ އޮފް ޕްރިޕަރޭޝަން އައާއި ޑިޕްލޮމާ އިން ޕަބްލިކު އެޑްމިނިސްޓުރޭޝަން އެންޑު މެނޭޖުމެންޓް ހިމެނެއެވެ.
މި ކޯސްތަކަކީ މޯލްޑިވްސް ކޮލިފިކޭޝަން އޮތޯރިޓީން އެކްރިޑެޓްކޯށްފައިވާ ކޯސްތަކެކެވެ. މި ރަސްމިއްޔާތު ޝަރަފުވެރިކޮށްދެއްވާ ވާހަކަ ދައްކަވަމުން ހަޔަރ އެޑިއުކޭޝަން މިނިސްޓަރ ޑރ. އިބްރާޙިމް ޙަސަން ވަނީ ވަޒީފާގައި އުޅެމުން މިފަދަ ކޯސްތައް ފުރިހަމަ ކުރުމަކީ އުނދަގޫކަމެއްކަން ފާހަގަކުރައްވާފައެވެ. އަދި ހޯދާ ސަނަދަކީ ލިޔުމެއްގެ ގޮތުގައި ބާއްވާ އެއްޗަކަށް ނުހަދާ އެއީ ވަކި މަޤްޞަދެއް ހާސިލްކުރުމަށް ހޯދާ އެއްޗަކަށް ހެދުމަށް އިލްތިމާސްކުރައްވާފައެވެ
މި ރަސްމިއްޔާތުގައި ވާހަކަދައްކަވަމުން ސިވިލް ސަރވިސް ކޮމިޝަންގެ ރައީސް ޑރ. އަލީ ޝަމީމް ވިދާޅުވީ 2009 ވަނަ އަހަރު ސިވިލްސާވިސް ޓުރެއިނިން އިންސްޓިޓުއުޓް އުފެދުނީސުރެން މިހާތާނަށް މިދިޔަ 10 އަހަރުގެ ތެރޭގައި ގިނަކާމިޔާބީތައް ހާސިލްކޮށްފައިވާކަމަށެވެ. ނަމަވެސް ބަޖެޓު ނެތުމާއި، ވަސީލަތް ނެތުމާއެކު އެ ކޮމިޝަނުގެ މުވައްޒަފުން ބޭނުންވާކަންކަން ދެނެގަތުމަށް ކުރާ ދިރާސާތައް އެދެވޭވަރަށް ކުރިޔަށް ނުގެން ދެވޭކަން އޭނާ ފާހަގަކުރެއްވިއެވެ. އަދި އެ އިންސްޓިޓިއުޓް ޕަބްލިކް ސަރވިސް އިންސްޓިޓިއުޓްއަށް ހެދުމުގެ މަސައްކަތް ކުރައްވަމުންގެންދަވާކަމަށް ޝަމީމް ވިދާޅުވިއެވެ.
ސިވިލް ސަރިވސްއިން ކުރިއަށްގެންދާ މި ކޯސްތަކަކީ އެ ކޮމިޝަންގެ ގެ މުވައްޒަފުން ކުރާ މަސައްކަތުގެ ފަންނީ ތަޖުރިބާ އިތުރުކޮށް މަޢުލޫމާތު އިތުރު ކުރުމަށް ހިންގާ ކޯސްތަކެކެވެ. އެގޮތުން މިހާރުވެސް 19 އަތޮޅެއްގައި 53 ޕްރޮގްރާމް ކުރިއަށް ގެންދެއެވެ. ސިވިލް ސަރވިސް ޓްރެއިނިން އިންސްޓިޓިއުޓުން 2020 ވަނަ އަހަރު ވެސް އިތުރު ޕޮގުރާމް ތަކެއް ކުރިޔަށް ގެންދިޔުމަށް ވަނީ ނިންމާފައެވެ.