އައްޑޫގައި މަތީ ތަޢުލީމު އިންސްޓިޓިއުޝަނެއް ހެދުމަށް ވިލާ ކުންފުންޏަށް ބިމެއް ދީފި

މަތީ ތަޢުލީމުދޭ އިންސްޓިޓިއުޝަނެއް ޤާއިމު ކުރުމަށް އައްޑޫސިޓީއިން 25000 އަކަފޫޓުގެ ބިމެއް ވިލާ އަށް ދޫކޮށްފި.
ވިލާ އެޑިއުކޭޝަނަލް ސާވިސް ޕްރައިވެޓް ލިމިޓެޑާއި މިބިން ޙަވާލު ކުރުމުގެ އެއްބަސަވުމުގައި ސޮއި ކޮށްފައިވަނީ މިއަދު އައްޑޫސިޓީ ކައުންސިލް އިދާރާގައެވެ.

އައްޑޫސިޓީ ކައުންސިލުން ބުނީ އައްޑޫއިން ވިލާ އަށް ދޭން ނިންމާފައިވަނީ 25000 އަކަފޫޓުގެ ބިމެއް ކަމަށެވެ. ނަމަވެސް މިއެއްބަސްވުމުގެ މާބޮޑު ތަފްސީލެއް ސިޓީ ކައުންސިލުން ހާމަ ނުކުރައްވައެވެ. މަޢުލޫމާތު ލިބިފައިވާ ގޮތުގައި ވިލާ އެޑިއުކޭޝަނަލް ސާވިސް އަށް މިބިން ދީފައި ވަނީ މަތީ ތަޢުލީމުދިނުމަށް މުޅިން ހިލެއެވެ.

އައްޑޫގައި މަތީ ތަޢުލީމު ދޭ އިންސްޓިޓިއުޝަންތައް ގާއިމުކުރަން ބިން ދޫކުރަން އައްޑުއިން މިނިންމީ މިދިޔަ އެޕްރީލް 29 ވަނަ ދުވަހު އޮތް ކައުންސިލްގެ 91 ވަނަ ބައްދަލުވުމު ގައެވެ. އެގޮތުން 3 ބިމަކަށް ކުރިމަތި ލުމަށް ހުޅުވާލިއެވެ. އެއީ 5000 އަކަފޫޓުގެ ދެ ބިމާއި 10000 އަކަފޫޓުގެ ބިމަކާއި 25000 އަކަފޫޓުގެ ބިމެކެވެ. މިބިންތަށް ދިނުމަށް ހަމަޖެހިފައިވަނީ ހިތަދުއާއި، ހުޅުމީދޫންނެވެ.

މީގެ ކުރިންވެސް ވިލާ ކޮލެޖަށް ބޮޑު ބިމެއް ދޫކުރުމަށް އައްޑޫސިޓީ ކައުންސިލުން މަސައްކަތް ކުރި ކަމުގެ އަޑުތަކެއްވަނީ ފެތުރިފައެވެ. މިކަމާއި ގުޅިގެން އޭރު ކައުންސިލުން ބުނެފައިވަނީ، އައްޑޫއިން ބިމެއް އެއްވެސް ބަޔަކަށް ދޭނީ ޢިއުލާން ކުރެވި، ބިޑް އުސޫލުން އެންމެ ރަނގަޅު ހުށަހެޅުމެއް ހުށަހަޅާ ފަރާތަކަށް ކަމަށެވެ.

އައްޑޫސިޓީ ކައުންސިލުން ބިންތަކަށް ކުރިމަތި ލުމަށް ހުޅުވާލި އިޢުލާނުގައި ބުނެފައިވަނީ، މިއީ އައްޑޫގެ ތަރައްޤީގެ ޕްލޭނުގައި ހިމެނައިގެން މަތީތަޢުލީމުގެ ސިޔާސަތު ތަންފީޒު ކުރުމުގެ ގޮތުން ހުޅުވާލި ފުރުސަތެއް ކަމުގައެވެ. މަތީ ތަޢުލީމުދޭ އިންސްޓިޓިޢުޝަނެށް ޤާއިމު ކުރުމަށް ވިލާގެ ކުންފުންޏަކާއި ޙަވާލު ކޮށްފައި ވާއިރު، މިހާރުވެސް އައްޑޫގައި ވިލާ ކޮލެޖު ހިންގަމުން ދެއެވެ. މިކޮލެޖު ހިންގަމުންދަނީ ކުރީގެ ޕްރީސްކޫލެއް ހިންގި އިމާރާތެއްގައެވެ. އަދި ވިލާ ކޮލެޖު ރެކްޓަރ އައްޑޫސިޓީ އަށް ކުރެއްވި ޒިޔާރަތުގައި ބިމުގެ ދަތިކަން ހުރި ވާހަކަ ސިޓީ ކައުންސިލާއި ވަނީ ހިއްސާ ކުރައްވާފައެވެ.