"ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަން"ގެ 10ވަނަ ޢާންމު ބައްދަލުވުން ޕެރަޑައިސް އައިލޭންޑް ރިޒޯޓުގައި ފަށައިފިއެވެ.
މި ބައްދަލުވުން ފަށްޓަވައިދެއްވީ މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދެވެ. މިމަހުގެ 3ވަނަ ދުވަހުގެނިޔަލަށް ކުރިއަށްދާ މިބައްދަލުވުމުގައި މެމްބަރު ޤައުމުތަކުގެ ތެރެއިން ބޭރުގެ މަސްވެރި އުޅަނދުފަހަރަށް ލައިސަންސް ދޫކުރާ ޤައުމުތަކުން ބޭރުގެ މަސްވެރި އުޅަނދުފަހަރަށް ލައިސަންސް ދޫކުރުމުގައި ބަލާނެ މިންގަޑުތައް ކަނޑައަޅައި އެކުލަވާލާފައިވާ "މިނިމަމް ޓަރމްސް އެންޑް ކޮންޑިޝަން" ގައިޑްލައިން މެމްބަރު ޤައުމުތަކުން ތަންފީޒްކުރުމުގައި އިންތިޒާމްތައް ހަމަޖައްސާނެ ގޮތަކާއިމެދު މަޝްވަރާކޮށް ރޯޑްމެޕެއް އެކުލަވާލުމަށް ވަނީ ހަމަޖެހިފައެވެ.
މީގެ އިތުރުން، ސްވައިއޯ.އެފް.ސީއާއި ގުޅިގެން ކުރިއަށްގެންދާ ސަރަހައްދީ އެހެން ޕްރޮޖެޓްތަކާއި ގުޅިގެން ކުރެވެމުންދާ މަސައްކަތްތަކާއި، އެމަސަކަތްތައް ހަރުދަނާކޮށް އޭގެ މަންފާ މެމްބަރު ޤައުމުތަކަށާއި ސަރަހައްދުގެ މަސްވެރިކަމަށް އެންމެ ބޮޑަށް ކުރާނެގޮތަކަށް އިންތިޒާމްތައް ހަމަޖައްސުމާއި ގުޅޭގޮތުން މަޝްވަރާކުރުމަށް ހަމަޖެހިފައިވެއެވެ.
މި ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަންގެ ސެކެޓްރީ ލުކާ ގެރިބަލްދި ވިދާޅުވީ އެކޮމިޝަނުން ކަނޑުގެ މާހައުލާއި މަސްވެރިކަމުގެ ދިރުންތައް ދެމެހެއްޓެނިވި ގޮތެއްގައި ބޭނުންކުރުމާއެކު އެވަޞީލަތްތައް މުސްތަޤްބަލަށް ފޯރުކޮށްދެވޭނެ ގޮތަށް، ސަރަހައްދީ މަސްވެރިކަން ތަރައްޤީކުރުމުގެ މަސައްކަތް ކުރައްވަމުން ގެންދަވާކަމަށެވެ. މިގޮތުން މަސްވެރިކަން ތަރައްޤީކުރުމަށްޓަކައި މިއަހަރުވެސް 2 މަޝްރުއެއް ހިންގުމަށް ނިންމާފައިވާކަން އޭނާ ފާހަގަކުރެއްވިއެވެ.
އަޑު
ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަނަކީ ދުނިޔޭގެ ކާބޯތަކެތީގެ ޖަމްޢިއްޔާގެ އޮނިގަނޑުގެ ދަށުން އިންޑިއާ ކަނޑުގެ ހުޅަނގުބިތުގެ އައްސޭރިފަށުގެ ޤައުމުތަކުން ގުޅިގެން އެކުލަވާލާފައިވާ ޖަމިއްޔާއެކެވެ. މިޖަމިއްޔާގެ މައިގަނޑު މަޤްޞަދަކީ، ހުޅަނގުދެކުނު އިންޑިއާ ކަނޑުގެ ސަރަހައްދުގެ އައްސޭރިފަށުގެ ޤައުމުތަކުން ގުޅިގެން މަސްވެރިކަން ރާވައި ހިންގާ ބެލެހެއްޓުމެވެ.
މީގެ އިތުރުން، ޤަވާއިދާ ޙިލާފަށް ބެލެހެއްޓުމެނެތި މާކަނޑުގައި ކުރާ މަސްވެރިކަން ހުއްޓުވުމަށް މެންބަރު ޤައުމުތަކުން ގުޅިގެން ފިޔަވަޅުތަކެއް އެޅުމެވެ. އަދި މަސްވެރިކަމާގުޅޭ މަޢުލޫމާތު މެމްބަރު ޤައުމުތަކުގެ މެދުގައި ބަދަލުކޮށް މަސްވެރިކަމުގެ ދާއިރާއިން ފަންނީ އަދި އިންސާނީވަސީލަތްތައް ތަރައްޤީކުރުން ހިމެނެއެވެ. މިކޮމިޝަނުގެ މެމްބަރު ޤައުމުތަކުގެ ތެރޭގައި ރައްޖެ ހިމެނޭހެން 12 ޤައުމެއް ހިމެނެއެވެ.