މިސަރަޙައްދުގައި ޤާނޫނާ ޚިލާފަށްކުރާ މަސްވެރިކަން ހުއްޓުވުމަށް އިންޑިއާ ކަނޑުގެ ހުޅަނގު ބިތުގެ ޤައުމުތަކުން ގުޅިގެން މަސައްކަތް ކުރުމަށް މިނިސްޓަރ އޮފް ފިޝަރީސް މެރިން ރިސޯސަން އެންޑް އެގްރިކަލްޗަރ ޒަހާ ވަހީދު ގޮވާލައްވައިފިއެވެ. މިނިސްޓަރ މިގޮތަށް ގޮވާލެއްވީ ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަންގެ 10ވަނަ ޢާންމު ބައްދަލުވުން ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
މިރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޒަހާވަނީ ޤައުމުތަކުގެ އިޤްތިޞާދީ ސަރަހައްދުގެ ތެރޭގައާއި މާކަނޑުގައި ކުރާ މަސްވެރިކަން ބަލަހައްޓައި މޮނިޓަރކޮށް ޤަވާޢިދާ ޚިލާފަށް ކުރާ މަސްވެރިކަން ހުއްޓުވުމަށް ގޮވާލައްވާފައެވެ. އަދި އެފަދަ އުޅަނދުފަހަރާއި، އެކަންކުރާ ފަރާތްތައް ޒިންމާދާރުކުރުމުގެ އެންމެބޮޑު ޒިންމާއެއް އޮތް ބަޔަކީ އައްސޭރިފަށުގެ ޤައުމުތައްކަން ފާހަގަކޮށް ކޮމިޝަންގެ މެމްބަރު ޤައުމުތަކުން އެކަމަށް ޚާއްސަކަމެއްދީގެން ފިޔަވަޅުތަކެއް އެޅުމަށް މިނިސްޓަރ ވަނީ ގޮވާލައްވާފައެވެ.
މިގޮތުން ބޭރުގެ މަސްވެރި އުޅަނދުފަހަރަށް ލައިސަންސް ދޫކުރުމުގައި އަމަލުކުރުމަށްޓަކައި މިހާރު ކޮމިޝަނުން އެކުލަވާލާފައިވާ "މިނިމަމް ޓާރމްސް އެންޑްކޮންޑިޝަން ގައިޑްލައިން"އަކީ މުހިންމު ފިޔަވަޅެއްކަން ފާހަގަކޮށް އެގައިޑްލައިންގައި ހިމެނޭ ކަންތައްތައް ޤައުމުތަކުން ތަންފީޒުކުރުމަށްވެސް ގޮވާލެއްވިއެވެ.
އަދި އިންޑިއާ ކަނޑުގެ މަހުގެ ބާވަތްތަކުގެ ސްޓޮކްގެ ޙާލަތު ދައްވުމުގެ ސަބަބުން ހިފާ މަހުގެ މިންވަރު މަދުކުރުމަށް އަޅާ ކޮންމެ ފިޔަވަޅެއްގެ އެންމެ ބޮޑު ގެއްލުމަކާއި ކުރިމަތިލާންޖެހޭނީ އައްސޭރިފަށުގެ ކުދި ޤައުމުތަކުން ކަންފާހަގަކޮށް، މަހުގެ ސްޓޮކްތައް ދެމެހެއްޓެނިވި މިންވަރެއްގައި ބެހެއްޓުމަށް ދުރާލާ ފިޔަވަޅުތައް އެޅުމަށްވެސް ގޮވާލައްވާފައެވެ. އޮޔާދާ ބޮއި، ބޭނުންކުރާ މިންވަރު މަދުކުރުމަށް ފިޔަވަޅުތަކެއް އެޅުމަށާއި މާކަނޑުގައި ޙަރަކާތްތެރިވާ އިންޑަސްޓްރިއަލް ފްލީޓް ދުވަހެއް ދުވަހަކަށް ބޮޑުވަމުންދާ ދިއުން ހުއްޓުވުމަށް އިންޑިއަން އޯޝަން ޓޫނާ ކޮމިޝަންގެ ތެރެއިން މެންބަރު ޤައުމުތައް ގުޅިގެން އިތުރުމަސައްކަތްތަކެއް ކުރަޖެހިފައިވާ ކަންވެސް މިނިސްޓަރ ފާހަގަކުރެއްވެވިއެވެ.
ސައުތު ވެސްޓް އިންޑިއަން އޯޝަން ފިޝަރީޒް ކޮމިޝަނަކީ ދުނިޔޭގެ ކާބޯތަކެތީގެ ޖަމްޢިއްޔާގެ އޮނިގަނޑުގެ ދަށުން އިންޑިއާ ކަނޑުގެ ހުޅަނގުބިތުގެ އައްސޭރިފަށުގެ ޤައުމުތަކުން ގުޅިގެން އެކުލަވާލާފައިވާ ޖަމްޢިއްޔާއެކެވެ. މިބައްދަލުވުމުގައި މަސްވެރިކަމާ ގުޅުންހުރި ގިނަ ކަންތައްތަކެއްގެ މައްޗަށް މަޝްވަރާކުރުމަށް ވަނީ ހަމަޖެހިފައެވެ.