މާލޭގައި ހަތަރު ކެމިކަލް ގުދަނަކާއި ހަ ގެއެއްގައި ރޯވި އަލިފާންގަނޑު ކޮންޓްރޯލްކޮށްފިއެވެ.
އަލިފާނުގެ ހާދިސާއާއި ގުޅިގެން އެމްއެންޑީއެފުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވަނީ އަލިފާން ކޮންޓްރޯލް ކުރެވުނީ މިރޭ 1:30 ހާއިރު ކަމަށެވެ. މި ނުރައްކާތެރި އަލިފާނުގެ ހާދިސާގައި 49 އަހަރުގެ އަންހެނަކު މަރުވެފައިވާއިރު، ގިނަ އަދަދެއްގެ ކުޑަކުދިންނާއި މީހުންނަށް ދުމުގެ އަސަރު ކޮށްގެން ފަރުވާދީފައިވެއެވެ.
މި އަލިފާނުގެ ހާދިސާގައި ޖުމްލަ ހަތަރު ކެމިކަލް ގުދަނަކާއި ހަ ގެ އެއްގައި ރޯވެ އަދާހުލިވެފައިވާއިރު، އަލިފާން ނިންވާލުމަށް ދަތިތަކެއް ކުރިމަތިވިކަމަށްވެސް އެންއެންޑީއެފުން ވިދާޅުވެއެވެ. މިހާދިސާގައި ރޯވީ ކޮން ކަހަލަ ކެމިކަލެއްހުރި ގުދަންތަކެއް ކަމެއް އަދި ސާފު ނުވާކަމަށްވެސް އެމްއެންޑީއެފުން ވިދާޅުވެއެވެ.
އަލިފާން ރޯވެގެން އުޅޭ ކަމުގެ ރިޕޯޓު ލިބުމާ އެކު ސިފައިން ހަރަކާތްތެރިވާން ފެށި ނަމަވެސް މަގުތަކުގައި ގިނަ އަދަދެއްގެ ސައިކަލް ޕާކް ކޮށްފައި ހުރުމުން، އެމްއެންޑީއެފްގެ ވެހިކަލްތަކަށް، އަލިފާން ރޯވި ގެތައް ހިމެނޭ ސަރަހައްދަށް ދާން ގިނަ އިރުތަކެއް ވި ކަމަށް އެމްއެންޑީއެފުން ވިދާޅުވެއެވެ. އަދި އަލިފާން ރޯވި ގެތަކުގައި ތާށިވެފައިތިބި މީހުން ސަލާމަތްކުރުމަށް އެ ގެތަކަށް ރިސްކު ނެގުމަށްފަހު 6 ފަހަރެއްގެ މަތިން ވަދެފައިވެއެވެ.
މިއަލިފާންގަނޑު ފެތުރިގެން ގޮސްފައިވަނީ އަލިފާން ރޯވި ހ.ތިލަފުށިގޭގައި ރޯވި އަލިފާންގަނޑު ބޮޑުވެ ބާރުގަދަ ގޮވުންތަކަކަށްފަހު ކުރިމަތީގައިހުރި ގޭގައި އަލިފާންރޯވި ހިސާބުންކަމަށް އެމްއެންޑީއެފުން ވިދާޅުވެއެވެ.