ހއ.ހޯރަފުށީގައި އެއަރޕޯޓު ހެދުމަށް ބޭނުންވާ ބިން ހިއްކުމުގެ މަސައްކަތް ނިމެއްޖެއެވެ. ހޯރަފުށި އެއަރޕޯޓަށް ބޭނުންވާ ބިން ހިއްކާފައިވަނީ މަހާޖައްރާފު ބޭނުންކޮށްގެންނެވެ.
އެމްޓީސީސީން ވިދާޅުވީ އެމަސައްކަތް މިދިޔަ ހަފްތާގެތެރޭގައި ނިންމާލާފައިވަކަމަށެވެ. ހޯރަފުށީގައި އެއަރޕޯޓު ހެދުމަށް އަރަށުން ގާތްގަނޑަކަށް 34 ހެކްޓަރުގެ ބިން ހިއްކާފައިވާކަމަށް އެމްޓީސީސީން ވިދާޅުވެއެވެ. މިސަރަޙައްދު ހިއްކުމަށް 67 މިލިޔަން ރުފިޔާ ވަނީ ޚަރަދުކޮށްފައެވެ.
އެމްޓީސީސީން ވިދާޅުވީ ބިން ހިއްކުމުގެ މަސައްކަތް ކުރަމުންދިޔައިރުވެސް ރަންވޭގެ ބައެއް މަސައްކަތްތައް ފަށާފައިވާކަމަށާއި އެހެންނަމަވެސް ރަންވޭގައި ތާރު އެޅުމުގެ މަސައްކަތް ފެށޭވަރުވާނީ އަންނަ އަހަރުގެ ފެބްރުއަރީ ހާތާގައިކަމަށެވެ. ހއ.ހޯރަފުށީގައި އެއަރޕޯޓު ހެދުމަށް ބޭނުންވާ ބިން ހިއްކުމުގެ މަސައްކަތް އެމްޓީސީސީން ފަށާފައިވަނީ އޭޕްރީލް މަހުގެތެރޭގައެވެ.
ހއ.ހޯރަފުށީގައި ހަދާ އެއަރޕޯޓްގެ މަސައްކަތް އެމްޓީސީސީއާ ޙަވާލުކޮށްފައިވަނީ މާޗް މަހުގެ 25ވަނަ ދުވަހުއެވެ. އަދި އެއަރޕޯޓުގެ ޢަމަލީ މަސައްކަތް ފަށާފައިވަނީ އޭޕްރީލް މަހުގެ އެއްވަނަ ދުވަހު ރަސްމީކޮށް ފަށްޓަވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހެވެ.
ކުރީގެ ސަރުކާރުން ހއ.ހޯރަފުށީ އެއަރޕޯޓް އެރަށާ ކައިރީގައި އޮންނަ މާފިނޮޅުގައި ހަދަން ހަމަޖެއްސިނަމަވެސް ރައީސް އިބްރާހީމް މުޙައްމަދު ޞާލިހުގެ ވެރިކަން ފެށި، ފެހިކަންގަދަ ރަށްތައް ހަލާކު ކުރުން މަދުކޮށް، ޖަޒީރާވަންތަކަން ދެމެހެއްޓުމަށްޓަކައި އެއަރޕޯރޓް ހެދުމުގެ މަސައްކަތްވަނީ ހޯރަފުއްޓަށް ބަދަލުކޮށްފައެވެ.
އަދި ހޯރަފުށީގައި ހިއްކާފައިވާ ސަރަޙައްދު މިހާރަށްވުރެ ބޮޑަށް ހިއްކައި، އެރަށުގައި އެއަރޕޯޓް ހެދުމަށް ސަރުކާރުން ނިންމެވިއެވެ. އަދި އެމަސައްކަތް ސޯޅަ މަސް ދުވަހުގެ ތެރޭގައި ނިންމާނޭކަމަށް ސަރުކާރުން ވަނީ އިޢުލާންކޮށްފައެވެ. ހޯރަފުއްޓަކީ މިވަގުތު ތިންހާސް ހަތަރު ސަތޭއަށްވުރެ ގިނަ މީހުންގެ އާބާދީއެއް އޮންނަ ރަށެކެވެ.