ހޯމް މިނިސްޓްރީއާ ގުޅިގެން ޔޫތް ލީޑަރސް ނެޓްވޯކުން ގދ. ތިނަދޫގައި ބޭއްވި "ޒުވާނުންގެ ފޯރަމް" ނިންމާލައިފިއެވެ.
ޒުވާނުންގެ މެދުގައި ފަރުދީ ޒިންމާ ނަގަން ދަސްކޮށް ދިނުމަށާއި ޒުވާނުންގެ ތެރެއިން ލީޑަރުން އުފެއްދުމުގެ މަޤްޞަދުގައި ދެ ދުވަހުގެ މުއްދަތަށް ތިނަދޫގައި ބޭއްވި މިފޯރަމްގައި ގިނަ އަދަދެއްގެ ޒުވާނުން ބައިވެރިވެފައިވާއިރު، ތަހުޒީބު މުޖުތަމައެއް ބިނާ ކުރުމާ ގުޅޭ ގޮތުން ބައިވެރީންނަށް ވަނީ މަޢުލޫމާތު ޙިއްޞާކޮށްފައެވެ.
ހޯމް މިނިސްޓްރީން ތިނަދޫގައި ބޭއްވި މިފޯރަމަކީ އެމިނިސްޓްރީން ބާއްވަމުން އަންނަ ސިލްސިލާ ފޯރަމްތަކުގެ ތެރެއިން ފޯރަމެކެވެ.
ހުކުރު ދުވަހު ފެށި މިފޯރަމްގައި މައިގަނޑު ހަ ސެޝަނެއް ނަގައިދީފައި ވެއެވެ.
- މި ސެޝަންތަކަކީ:
- 1. ގައުމުގެ އަމާންކަން ދެމެހެއްޓުމުގައި ޒުވާނުންގެ ދައުރު
- 2. ތަހުޒީބީ މުޖުތަމައަކަށް އިސްލާމީ ލީޑަރޝިޕްގެ މުހިއްމުކަން
- 3. ޒުވާނުން އަހުލުވެރިވާންވީ މުހިއްމު ޤާނޫނުތައް
- 4. ދިވެހި ތާރީޚުގައި ތަހުޒީބް މުޖުތަމައެއް ބިނާކުރުމުގައި ލީޑަރޝިޕް އައިސްފައިވާގޮތް
- 5. ކޮމިއުނިޓީ އެންގޭޖްމަންޓް އަދި ކޮމިއުނިކޭޝަން ސްކިލްސް
- 6. ޕަބްލިކް އެންގޭޖްމަންޓް އެކްޓިވިޓީ
ފޯރަމް ނިންމާލީ ޕަބްލިކް އެންގޭޖްމަންޓް އެކްޓިވިޓީންނެވެ. އެ ޙަރަކާތުގައި ފޯރަމްގައި ބައިވެރިވި ޒުވާނުން ވަނީ ޢާންމު މީހުންނާ ބައްދަލުކޮށް ޒުވާނުންނާ ގުޅުން ހުރި އެކި ކަންކަމާ ގުޅޭ ގޮތުން އެފަރާތްތަކުގެ ޚިޔާލު ހޯދާފައެވެ.
އެ ފޯރަމާ ގުޅޭ ގޮތުން ހޯމް މިނިސްޓްރީގެ ސްޓޭޓް މިނިސްޓަރ، ޢަލީ ނަޒީރު ވިދާޅުވީ ދިވެހިރާއްޖޭގެ އިސް މަޤާމުތަކުގައި ޒުވާނުންގެ ދައުރު އިތުރުވަމުން އައި ނަމަވެސް އަދިވެސް ގޯސް މަގުން އުޅޭ ޒުވާނުންގެ ޢަދަދު އަދިވެސް ގިނަ ކަމަށެވެ. އެހެން ކަމުން ސަރުކާރުގެ އަމާޒަކީ ކުރިއަށް އޮތް ތަނުގައި ރާއްޖެ ހިންގާނެ ޤާބިލް ޒުވާނުން ތަކެއް އުފެއްދުން ކަމަށާއި އެ ފޯރަމަކީ ސަރުކާރުން އެކަމަށްޓަކައި ފަށާފައިވާ މަސައްކަތުގެ ތެރެއިން ބޭއްވުނު ފޯރަމެއް ކަމަށެވެ.
އަދި އެކަމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވަރަށް ބޮޑު އިސްކަމެއް ދެއްވާ ކަމެއް ކަމަށްވެސް އޭނާ ވިދާޅުވިއެވެ.