ޓީޗާރސް ކޮންފަރެންސަށް އެންމެ ގިނަ ޕޭޕަރު މިފަހަރު ހުށަހަހަޅާނީ އައްޑޫގެ ސްކޫލުތަކުން: އެން.އައި.އީ

ފަސްވަނަ ބައިނަލްއަޤްވާމީ ޓީޗަރސް ކޮންފަރެންސަށް އެންމެ ގިނަ ޕޭޕަރު ހުށައަޅާފައިވަނީ އައްޑޫގެ ސްކޫލުތަކުން ކަމަށް އެންއައިއީ އިން ވިދާޅުވެއްޖެއެވެ.

މި މަހުގެ 4 އިން 5 އަށް ދެދުވަހުގެ މުއްދަތަށް އައްޑޫސިޓީ ހިތަދޫ، ޝަރަފުއްދީން ސްކޫލުގެ ބޭއްވުމަށް ހަމަޖެހިފައިވާ މިކޮންފަރެންސްގައި 250 ފަރާތަކުން ބައިވެރިވުމަށް ހަމަޖެހިފައިވާކަމަށް އެންއައިއީއިން މަޢުލޫމާތު ދެއެވެ. އެންއައިއީން ކޮންމެ ދެ އަހަރުން އެއް އަހަރު އިންތިޒާމު ކޮއްގެން ބާއްވާ މި ކޮންފަރެންސްގެ މިއީ ފަސްވަނަ ބުރެވެ. މީގެ ކުރީން 4 ކޮންފަރެންސް މާލެ ސަރަހައްދުގައި ބޭއްވުމަށް ފަހު މިކޮންފަރެންސް އައްޑޫގައި ބާއްވަނީ ސަރުކާރުގެ ލާމަރުކަޒީ ސިޔާސަތަށް އެއްބާރުލުން ދިނުމުގެ އިތުރުން މާލެ ސަރަހައްދުން ބޭރު އެންމެ ބޮޑު ޓީޗަރުންގެ އާބާދީއެއް އައްޑޫގައި އޮވެ ދިވެހި ވަންތަކަން މިކޮންފަރެންސުގެ ތެރެއިން ދެއްކުމުގެ މަޤްސަދުގައި ކަމަށް އެންއައިއީން ބުނެއެވެ.

ކޮންފަރެންސްގެ އެކި ޕާޓްނާރުންނާއި އެކު ސޮއި ކުރެއްވުމަށް ފަހު ޕީއެސްއެމް އަށް މައުލޫމާތު ދެއްވަމުން އެންއައިއީގެ ފަރާތުން ކޮންފަރެންސް ކޯޑިނޭޓަރ ޝުހުދާ ރިޒްވާން ވިދާޅުވީ، އައްޑޫއިން ކޮންފަރެންސަށް ވަރަސް ބޮޑަށް ތައްޔާރު ވަމުންދާ ކަމަށެވެ. އެގޮތުން ސީޓީ ކައުންސިލާއި އެހެނިހެން މުޢައްސަސާތަކުގެ އެއްބާރުލުން މިކޮންފަރެންސަށް ވަރަށް ބޮޑަށް ލިބެމުންދާ ކަމަށެވެ. އޭނާ ވިދާޅުވި ގޮތުގައި ކޮންފަރެންސަަށް އެންމެ ބޮޑު ތަރުހީބެއް ލިބެމުންދަނީ އައްޑޫގެ ސްކޫލް ތަކުގެ ޓީޗަރުންގެ ފަރާތުންނެވެ. އެގޮތުން މި ކޮންފަރެންސަށް ގިނަ ޕޭޕަރު ތައް ހުށަހަޅާނީ އައްޑޫގެ ސްކޫލުތަކުން ކަން އޭނާ ފާހަގަކުރެއްވި އެވެ.

"މިކޮންފަރެންސްގައި 98 ޕޭޕަރެއް ހުށަހެޅުމަށް ވަނީ ހަމަޖެހިފައި، އެގޮތުން ދެދުވަހުގެ ތެރޭގައި ޝަރަފުއްދީން ސްކޫލުގެ އެއްވަގުތާއި 8 ކޮޓަރިއެއްގައި ޕޭޕަރުތަށް ހުށަހެޅުން ކުރިއަށް ގެންދާނެ. މީގެ އިތުރުން އެސްކޫލު ހޯލުގައި ތަފާތު ޕެނަލް ޑިސްކަޝަންތަށް ކުރިއަށް ގެންދިއުމަށް ވަނީ ހަމަޖެހިފަ. މިކޮންފަރެންސް ހުޅުވުމުގެ ރަސްމީއްޔާތު އޮންނާނީ އަންނަ ހޯމަ ދުވަހުގެރޭ ޝަރަފުއްދީން ސްކޫލު ހޯލުގައެވެ. ކޮންފަރެންސް ހުޅުުއްވައިދެއްވާނީ ދިވެހިރާއްޖޭގެ ނައިބް ރައީސް ފައިސަލް ނަސީމެވެ.

ބައިނަލްއަޤްވާމީ ޓީޗަރުންގެ 5 ވަނަ ކޮންފަރެންސަށް އައްޑޫއިން ދަނީ ތައްޔާރުވަމުންނެވެ. އެގޮތުން އައްޑޫގެ ގުޅިފައިވާ ރައްތަކުގެ ސްކޫލުގެ ތަކާއި މުޢައްސަސާތަކާއި ޖަމީއްޔާތަށް ގުޅިގެން އިއްޔެ އައްޑޫގައި ވަނީ ސާފު ކުރުމުގެ ބޮޑު ހަރަކާތެއް ކުރިއަށް ގެންގޮސްފައިވެއެވެ. އައްޑޫސިޓީ ކައުންސިލުން އިންތިޒާމު ކުރި މިޙަރަކާތުގައި އައްޑޫގެ ގުޅިފައިވާ ރައްތަކުގެ އެކި ސަރަހައްދުތަށް ވަނީ ސާފު ކޮއްފައެވެ. އަދި މިމަސައްކަތުގެ ދަށުން މަގުތަކުގައި ހުރި ގަސްވަށި ތައް ޒީނަތްތެރި ކުރުމަށް ވަނީ ހަމަޖެހިފައެވެ.

ޓީޗަރުންނަށް އަމާޒުކޮށްގެން ބާއްވާ މިކޮންފަރެންސްއަކީ ސްކޫލްތަކުގައި މަސައްކަތް ކުރާ ޓީޗަރުންގެ މެދުގައި ދިރާސާ ކުރުމުގެ ސަޤާފަތެއް ޤާއިމްކުރުމަށާއި ޢިލްމީ މަސައްކަތް ކުރާ ބައިނަލްއަޤްވާމީ ފަރާތްތަކަށް ރާއްޖެ ހުޅުވާލުމަށް ކުރިއަށް ގެންދާ ކޮންފަރެންސްއެކެވެ. މިކޮންފަރެންސް މެދުވެރިކޮށް ރާއްޖެއާއި ރާއްޖެއިން ބޭރުގެ ފަރާތްތަކަށް އެމީހުންގެ މަސައްކަތްތައް ހިއްސާކުރާނެ ޕްލެޓްފޯމެއް ހުޅުވައިދީ، ހުށަހެޅޭ ޢިލްމީ ދިރާސާތަކާއި މަސައްކަތްތަކުގެ އަލީގައި ސްކޫލްތަކުގެ ކިޔަވައިދިނުމަށް ރަނގަޅު ބަދަލުތަކެއް ގެނެއުމަކީ މި ކޮންފަރެންސް ބޭއްވުމުގެ މުހިއްމު މަޤުޞަދެއްކަމަށް އެން.އައި.އީން ވިދާޅުވެއެވެ.