މިއަހަރު ބާއްވާ 33ވަނަ ޤައުމީ ޤުރުއާން މުބާރާތުގައި ބާރަސަތޭކައަށްވުރެ ގިނަ ކުދިން ބައިވެރިވެއްޖެއެވެ. 33ވަނަ ޤައުމީ ޤުރުއާން މުބާރާތް ބޭއްވުމަށް ހަމަޖެހިފައިވަނީ އަންނަ މަހުގެ އެކަކުން ހަތްވަނަ ދުވަހުގެ ނިޔަލަށެވެ.
33ވަނަ ޤައުމީ ޤުރުއާން މުބާރާތް އަންނަމަހުގެ އެއްވަނަ ދުވަހު ފެށުމަށް ހަމަޖެހިފައިވާއިރު މިމުބާރާތަކީ ރައީސުލް ޖުމްހޫރުއްޔާ އިބްރާޙިމް މުޙައްމަދު ޞާލިހް ވެރިކަމާ ޙަވާލުވެވަޑައިގަތުމަށްފަހު ބާއްވާ މިފަދަ ފުރަތަމަ މުބާރާތެވެ. މުބާރާތާ ގުޅޭ މަޢުލޫމާތު މީޑިއާއާ ޙިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކީރިތި ޤުރުއާނާބެހޭ ޤައުމީ މަރުކަޒުގެ ސްޕަވައިޒަރ އިބްރާހީމް އަޒްލިފް ވިދާޅުވީ މިއަހަރުގެ ޤައުމީ ޤުރުއާން މުބާރާތުގައު 1273 މީހުން ބައިވެރިވާކަމަށެވެ.
މީގެ ތެރޭގައި ބަލައިގެން ކިޔެވުމުގެ ބައިގައި 641 މީހުންނާއި ހިތުން ކިޔެވުމުގެ ބައިގައި 628 އަދި ހާފިޒުންގެ ބައިގައި 4 މީހުން ބައިވެރިވެފައިވާކަމަށް އޭނާ ވިދާޅުވިއެވެ. އަދި މިއަހަރަކީ ޤައުމީ ޤުރުއާން މުބާރާތެއްގައި އެންމެގިނައިން މީހުން ބައިވެރިވާ އަހަރުކަމަށް ވެސް އަޒްލިފް ވިދާޅުވިއެވެ.
މުބާރާތް އިންތިޒާމް ކުރާ ކޮމިޓީގެ ފަރާތުން ވާހަކަދައްކަވަމުން އަޙްމަދު ތަޢުފީޤް ވިދާޅުވީ މިއހަރުގެ މުބާރާތް އެންމެ ފުރިހަމައަށް ކުރިއަށްގެންދިޔުމަށްޓާކައި ގިނަ މަސައްކަތްތަކެއް ކުރައްވަމުން ގެންދަވާކަމަށެވެ. މިގޮތުން މިއހަރުގެ މުބާރާތް ދެތަނެއްގައި ކުރިއަށްގެންދިޔުމަށް ނިންމާފައިވާކަމަށް ތަޢުފީޤް ވިދާޅުވިއެވެ. އެއީ އިސްމީ މަރުކަޒުގެ ހޯލާއި ކީރިތި ޤުރުއާނާބެހޭ ޤައުމީ މަރުކަޒުގެ ހޯލުގައެވެ.
ތައުފީޤް ވިދާޅުވީ ބަލައިގެން ލިޔެވުމުގެ ބައި ކުރިއަށްގެންދިޔުމަށް ހަމަޖެހިފައިވަނީ ޤުރުއާނާ ބެހޭ މަރުކަޒުގައިކަމަށާއި ހިތުން ކިޔެވުމުގެބައި ކުރިއަށްގެންދިޔުމަށް ހަމަޖެހިފައިވަނީ އިސްލާމީ މަރުކަޒުގެ ހޯލުގައި ކަމަށެވެ. އަދި މިއަހަރުގެ މުބާރާތްވެސް ކުރިއަށްގެންދިޔުމަށް ހަމަޖެހިފައިވަނީ 4 ދަންފަޅިއަކަށް ބަހާލައިގެނެވެ.
މިބައްދަލުވުމުގައި ވާހަކަދައްކަވަމުން ކީރިތި ޤުރުއާނާބެހޭ ޤައުމީ މަރުކަޒުގެ އެގްޒެކިޓިވް ޑިރެކްޓަރ އިބްރާހީމް ރާފިއު ވިދާޅުވީ މިސަރުކާރުންވެސް ކީރިތި ޤުރުއާނުގެ ޢިލްމު ފުޅާކޮށް އެކަމަށް ސަމާލުކަންދެއްވާކަމަށެވެ. އެގޮތުން މިޢިލްމު ފުޅާކުރުމަށް ގިނަ ޕްލޭންތަކެއް ހެދިފައިހުރިކަމަށާއި 33ވަނަ ޤައުމީ ޤުރުއާން މުބާރާތަށް ފަހު މިދާއިރާއާ ގުޅޭ އިތުރު ކަންކަން ކުރުމަށް ރާވާފައިހުރިކަމަށް ރާފިއު ވިދާޅުވިއެވެ. އަދި ޙާފިޒުން ތަމްރީން ކުރުމުގެ ޕްރޮގްރާމްތައްވެސް ހުއްޓާނުލާ ކުރިއަށްގެންދާކަން އޭނާ ފާހަގަކުރެއްވިއެވެ.
މިފަހަރުގެ މުބާރަތް ބޭއްވުމަށް ހަމަޖެހިފައިވަނީ 3 ބަޔަކަށް ބަހާލައިގެންނެވެ. މިގޮތުން ޢާއްމުބަޔަކާއި ސްކޫލް ކުދިންނަށް ޚާއްސަކޮށްފައިވާ ބަޔަކާއި ހާފިޒުންގެ ބައެއްވަނީ ހިމަނާފައެވެ.
ޢާންމު ބައިގައި ބައިވެރިވެވޭނީ އުމުރުން 7 އަހަރާއި 65 އަހަރާ ދެމެދުގެ ފަރާތްތަކަށެވެ. މިބައި ހުޅުވާލާފައިވަނީ އަތޮޅޫ ކައުންސިލްތަކަށާއި މިނިސްޓްރީ އޮފް އެޑިއުކޭޝަންގައި ރަޖިސްޓްރީކޮށްފައިވާ މަތީ ތަޢުލީމް ދޭ މުއައްސަސާތަކަށެވެ. އަދި އިސްލާމްދީނަށް ޚިދުމަތްކުރުން އެފަރާތެއްގެ މަޤްޞަދުތަކުގެ ތެރޭގައި ހިމެނޭ ޖަމިއްޔާތަކާއި ކުންފުނިތަކާއި ކްލަބްތަކަށާއި ޖަމާއަތްތަކަށެވެ.
ސްކޫލް ކުދިންގެ ބައިގައި ބައިވެރިވެވޭނީ އެޑިއުކޭޝަން މިނިސްޓްރީގައި ރަޖިސްޓްރީކޯށްފައިވަ ސްކޫލް މަދަރުސާތަކުގެ ގްރޭޑް 1އިން ބާރައަށް ކިޔަވާ ދަރިވަރުންނަށެވެ. އަދި ހާފިޒުންގެ ބައިގައި ބައިވެރިވެވޭނީ ތަޖްވީދުގެ ހަމަތަކާ އެއްގޮތްވާ ގޮތުގެ މަތިން މމުޅި ޤުރުއާން ހިތުދަސް ފަރާތްތަކަށެވެ.
33ވަނަ ޤައުމީ ޤުރުއާން މުބާރާތުގައި ބައިވެރިވުމުގެ ފުރުޞަތު ހުޅުވާލާފައިވަނީ އަތޮޅު ކައުންސިލްތަކާއި، ސިޓީތަކަށާއި، އިސްލާމްދީނަށް ޚިދުމަތް ކުރުން އެ ފަރާތެއްގެ މަޤްޞަދުތަކުގެ ތެރޭގައި ހިމެނޭ ޖަމްޢިއްޔާތަކާއި، ކުންފުނިތަކުގެ އިތުރުން ކްލަބް ޖަމްޢިއްޔާ ޖަމާއަތްތަކަށެވެ. 16އަހަރު ފުރިފައިވާ ކޮންމެ މީހަކަށް މުބާރާތުގައި ބައިވެރިވެވޭނެކަމަށް ކީރިތި ޤުރުއާނާ ބެހޭ މަރުކަޒުން ވިދާޅުވެއެވެ.
ޤައުމީ ޤުރުއާން މުބާރާތުގައި ފޮތުން ކިޔެވުމުގެ ބައިގައި ވިދިވިދިގެން 10 ފޮތާއި 20 ފޮތް އަދި މުޅި ޤުރުއާން ތަޖުވީދު ހަމަތަކުގެ މަތިން ކިޔެވުން ހިމެނޭއިރު، ހިތުން ކިޔެވުމުގެ ބައިން ވިދިވިދިގެން 5 ފޮތާއި 10 ފޮތް އަދި 20 ފޮތް ތަޖުވީދުގެ ހަމަތަކަށް ކިޔެވުން ހިމަނާފައިވެއެވެ. ކީރިތި ޤުރުއާނާބެހޭ މަރުކަޒުން ބުނީ މި މުބާރާތުގެ ދެބައިގައި ހިމެނޭ ގޮފިތަކުގެ ތެރެއިން ކޮންމެ ގޮތްޕެއްގައިވެސް ބައިވެރިވެވޭނީ ގިނަވެގެން 2 ކެންޑިޑޭޓަށް ކަމަށާއި ކޮންމެ ކެންޑިޑޭޓަކަށްވެސް ބައިވެރިވެވޭނީ ކޮންމެވެސް އެއް ގޮތްޕެއްގައި ކަމަށެވެ. މުބާރާތުގެ ޢާންމު ބައިގައި ކޮންމެ މުއައްސަސާއަކު ބައިވެރިކުރެވޭ ޢަދަދަކީ މަދުވެގެން 12 މީހުންނެވެ. އަދި ސްކޫލް ކުދިންގެ ބައިގައި ބައިވެރިވެވޭނީ 15 ބައިވެރިންގެ މައްޗަށް އެކުލެވޭ ޓީމަކުންނެވެ.
ސްކޫލްކުދިންގެ ބައިގައި ބަލައިގެން ލިޔެވުމުގެ ބައިން 3 ފޮތާއި 15 ފޮތާ ދެމެދުގެ ކިޔެވުން ހަމަޖައްސާފައިވާއިރު މިބައިގައި ބައިވެރިވެވޭނީ 1 ބައިވެރިއަކަށެވެ. އަދި ހިތުން ކިޔެވުމުގެ ބައިން 1 ފޮތާއި 5 ފޮތާ ދެމެދު ހިމަނާފައިވާއިރު މިބައިގައި 2 ބައިވެރިން ބައިވެރިވެވޭގޮތަށް ވަނީ ހަމަޖައްސާފައެވެ.
މިއަހަރުގެ މުބާރާތުގައި ވަނަވަނައަށްދާ ފަރާތްތަކަށް ކީރިތި ޤުރުއާނާބެހޭ މަރުކަޒުން ދޭ އިނަމާއި، ރައީސުލްޖުމްހޫރިއްޔާ ދެއްވާ ޚާއްޞަ އިނާމުގެ އިތުރުން ފައިސާގެ އިނާމް ހުށަހަޅާފައިވެއެވެ. ޤުރުޢާން ކިޔެވުމުގެ ޤައުމީ މުބާރާތަކީ ކީރިތި ޤުރުއާނުގެ ޢިލްމު ރާއްޖޭގައި ފަތުރާ ކީރިތި ޤުރުއާން ކިޔެވުމަށް ބާރުއެޅުމުގެ މަޤްޞަދުގައި ބާއްވާ މުބާރާތެކެވެ. މިއހަރުގެ މުބާރާތުގެ ރިކޯޑިން ޕީއެސްއެމްގެ މުންނާރު ޗެނަލުން ދައްކާނެއެވެ.