ޒިންމާދާރު ރައްޔިތުން ބިނާކުރުމަށް ތ.އަތޮޅަށް ޚާއްސަކޮށްގެން ބޭއްވި މަސައްކަތު ބައްދަލުވުން ނިންމާލައިފިއެވެ.
މިއީ މިނިސްޓްރީ އޮފް ހޯމް އެފެއާޒުން ރަށްރަށުގައި ޒިންމާދާރު ރައްޔިތުން ބިނާކުރުމަށް ބާއްވާ ސިލްސިލާ މަސައްކަތު ބައްދަލުވުންތަކުގެ ތޭރަވަނަ ބައްދަލުވުމެވެ. މި ބައްދަލުވުން ނިންމާލުމުގެ ރަސްމިއްޔާތު ޝަރަފުވެރިކޮށްދެއްވީ ތ.އަތޮޅު ކައުންސިލްގެ ރައީސްއެވެ. މި ރަސްމިއްޔާތުގައި ބައިވެރިންނަށް ހަނދާނީ ލިޔުންވަނީ ހަވަލުކޮށްފައެވެ.
އަމާން ވެއްޓެއް ޤާއިމުކުރުމާއި ޒިންމާދާރު ރައްޔިތުންތަކެއް ބިނާކުރުމުގެ މަޤްޞަދުގައި ބޭއްވި މި މަސައްކަތު ބައްދަލުވުމުގައި ތ.އަތޮޅުގެ އެކިރަށްރަށުގެ ކައުންސިލްތަކާއި ސްކޫލްތަކާއި ޖަމްޢިއްޔާ ޖަމާޢަތްތަކުގެ މަންދޫބުން ހިމެނެއެވެ. އެގޮތުން މި ފަހަރުގެ ބައްދަލުވުމުގައި އެ އަތޮޅުގެ 12 ރަށަކުން 55އަށްވުރެ ގިނަ މީހުން ބައިވެރިވިއެވެ.
މި ބައްދަލުވުންތަކުގައި ކުށްތަކާއި ގުޅޭގޮތުން ޢާންމުން ހޭލުންތެރިކޮށް، ކުށް މަދު ކުރުމަށް ކުރެވިދާނެ ކަންތައްތަކާއި ގުޅޭގޮތުން މަޢުލޫމާތު ދިނުމުގެ އިތުރަށް ސަރުކާރުގެ އިދާރާތަކާއި ކުލަބު ޖަމްޢިއްޔާތަކާ ގުޅިގެން ކުށް މަދު ކުރުމަށް ކުރެވިދާނެ ކަންތައްތަކާ ގުޅޭގޮތުން މަޢުލޫމާތުވަނީ ދީފައެވެ. މީގެ އިތުރުން، ކާމިޔާބު ދަރިވަރުންތަކެއް ތަރުބިއްޔަތު ކުރެވޭނެ ގޮތްތަކުގެ މަޢުލޫމާތާއި މަސްތުވާތަކެތިން ޒުވާން ޖީލު ރައްކާތެރިކުރުމުގެ މުޙިއްމުކަމުގެ މައްޗަށްވެސް މި ބައްދަލުވުމުގައިވަނީ އަލިއަޅުއްވާލައްވާފައެވެ.
މި ބައްދަލުވުމުގެ ބައިވެރިންނަށްވަނީ މުޖުތަމަޢުގައި ހުރި ދީނީ ޚިޔާލު ތަފާތުވުންތަކާ ގުޅޭ ގޮތުންވެސް މަޢުލޫމާތު ދީފަައެވެ. އަދި މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުންވަނީ ކަނޑުމަތީގައި ހިތާމަވެރި ޙާދިސާތައް ހިގަން މެދުވެރިވާ ސަބަބުތަކާއި އެކަމުން ސަލާމަތްވާނެ ގޮތްތަކާއި ޤުދުރަތީ ގޮތުން ހިނގާ ޙާދިސާތަކުން ރައްކާތެރިވުމަށާއި ސަލާމަތްވުމަށް ކުރެވިދާނެ ކަންތައްތަކާއި ގުޅޭ ގޮތުން ބައިވެރިންނަށް މަޢުލޫމާތުދީފައެވެ.
ދެ ދުވަހުގެ މުއްދަތައް ބޭއްވި މި ބައްދަލުވުމުގައި މޯލްޑިވްސް ޕޮލިސް ސަރވިސްއާއި ހެލްތް ޕްރޮޓެކްޝަން އެޖެންސީއާއި މިނިސްޓްރީ އޮފް އިސްލާމިކް އެފެއަރޒާއި ލޯކަލް ގަވަރމެންޓް އޮތޯރިޓީއާއި ނޭޝަނަލް ޑްރަގް އެޖެންސީއާއި ޖުވެނައިލް ޖަސްޓިސް ޔުނިޓްގެ އިތުރުން މިނިސްޓްރީ އޮފް އެޑިއުކޭޝަންއާއި އެމްއެންޑީއެފް ހިމެނެއެވެ.