ހޯމް މިނިސްޓްރީން ކުރިއަށްގެންދާ ޒިންމާދާރު ރައްޔިތުން ބިނާކުރުމުގެ ސިސްސިލާ މަސައްކަތު ބައްދަލުވުންތަކުގެ ތޭރަވަނަ ބައްދަލުވުން ތ. އަތޮޅު ވޭމަންޑޫގައި ފަށައިފެވެ.
އަމާންވެއްޓެއް ޤާއިމުކުރުމާއި ޒިންމާދާރު ރައްޔިތުންތަކެއް ބިނާކުރުމުގެ މަޤްޞަދުގައި ބާއްވާ މި މަސައްކަތު ބައްދަލުވުމުގައި ތ.އަތޮޅުގެ އެކިރަށްރަށުގެ ކައުންސިލްތަކާއި ސްކޫލްތަކާއި ޖަމްޢިއްޔާ ޖަމާއަތްތަކުގެ މަންދޫބުން ބައިވެރިވެއެވެ. އެގޮތުން މިފަހަރުގެ ބައްދަލުވުމުގައި އެ އަތޮޅުގެ 12 ރަށަކުން 50އަށް ވުރެ ގިނަ މީހުން ބައިވެރިވެއެވެ.
މި ބައްދަލުވުންތަކުގައި އެކިއެކި ކުށްތަކަށް އާއްމުން ހޭލުންތެރިކޮށް، ކުށް މަދު ކުރުމަށް ކުރެވިދާނެ ކަންތައްތަކާއި ގުޅޭގޮތުން މަޢުލޫމާތު ދިނުމާއި ސަރުކާރުގެ އިދާރާތަކާއި ކްލަބް ޖަމްޢިއްޔާތަކާ ގުޅިގެން ކުށް މަދު ކުރުމަށް ކުރެވިދާނެ ކަންކަމާބެހޭގޮތުން މަޢުލޫމާތު ދިމުނަށް ހަމަޖެހިފައިވެއެވެ. މީގެ އިތުރުން ތަޢުލީމީ ދާއިރާގެ މަޢުލޫމާތުތައް ހިއްސާކޮށް ދަރިވަރުން ރަނގަޅުގޮތުގައި ތަރުބިއްޔަތުކުރުމުގެ މަޢުލޫމާތާއި މަސްތުވާތަކެތިން ޒުވާން ޖީލު ރައްކާތެރިކުރުމުގެ މުހިއްމުކަމުގެ މައްޗަށްވެސް މި ބައްދަލުވުމުގައި މަޢުލޫމާތުދިނުމަށް ވަނީ ހަމަޖެހިފައެވެ. ހަމަ އެހެންމެ ޤާނޫނުތަކާއި ޤަވައިދިތަކަށް ބޯލެނބުމުގެ މުހިއްމުކަމުގެ އިތުރަށް މުޖުތަމަޢުގައި ހުރި އެހެނިހެން ކަންތައްތަކާއި އެކަންކަން ރަނގަޅު ކުރުމަށް ކުރެވިދާނެކަންކަމުގެ މަޢޫލޫމާތު ދިނުމަވެސް ވަނީ ހަމަޖެހިފައެވެ.
މި ބައްދަލުވުން ފެށުމުގެ ރަސްމިއްޔާތުގައި ވާހަކަދައްކަވަމުން ހޯމް މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ އަރުޝަދު އަޝްރަފް ވިދާޅުވީ މިހާތަނަށް ކުރިއަށްގެންދިޔަ މަސައްކަތު ބައްދަލުވުންތަކުން 500 އަށްވުރެ ގިނަ މީހުންނަށް ޒިންމާދާރު ރައްޔިތެއް ބިނާކުރުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރެވިފައިވާކަމަށެވެ.
ރަށްތަކުގެ ކަންކަން ނިންމާ ލެވެލްގައި ތިބި މީހުން ނުވަތަ އިސްމަޤާމުތަކުގައި ތިބޭ ވެރިން ޒިންމާދާރުކަމާއެކު ކަންކަން ކުރިއަށް ގެންދާނަމަ މުޖުތަމައުގައި ދިރިއުޅޭ މީހުންވެސް އެމީހުންގެ ޒިންމާ އަދާކުރުމަށް މަސައްކަތްކުރާނެކަން ފާހަގަކުރެއްވިއެވެ. އަރުޝަދު ވަނީ މި ބައްދަލުވުމުގެ ޒަރިއްޔާއިން ލިބޭ މަޢުލޫމާތު ބޭނުންކޮށްގެން ރަނަގޅު މުޖުތަމަޢުއެެއް ބިނާކުރުމަށް އިލްތިމާސްކުރައްވާފައެވެ.
މި ބައްދަލުވުމަކީ ދެ ދުވަހުގެ މުއްދަތަކަށް ތަ.އަތޮޅު ތަޢުލީމީ މަރުކަޒުގައި ހޯމް މިނިސްޓްރީން އިންތިޒާމްކޮށްގެން، ސަރުކާރުގެ ބައެއް އިދާރާތައް ގުޅިގެން ކުރިއަށްގެންދާ މަސައްކަތު ބައްދަލުވުމެކެވެ. އެ އިދާރާތަކުގެ ތެރޭގައި މޯލްޑިވްސް ޕޮލިސް ސަރވިސްއާއި، ހެލްތް ޕްރޮޓެކްޝަން އެޖެންސީއާއި، މިނިސްޓްރީ އޮފް އިސްލާމިކް އެފެއަރޒާއި ލޯކަލް ގަވަރމެންޓް އޮތޯރިޓީއާއި، ނޭޝަނަލް ޑްރަގް އެޖެންސީއާއި ޖުވެނައިލް ޖަސްޓިސް ޔުނިޓްގެ އިތުރުން މިނިސްޓްރީ އޮފް އެޑިއުކޭޝަން ހިމެނެއެވެ. ހޯމް މިނިސްޓްރީން ކުރިއަށްގެންދާ މި ސިލްސިލާ ބައްދަލުވުންތަކުގެ ތެރެއިން 12 ވަނަ ބައްދަލުވުން ބާއްވާފައިވަނީ ރ.އަތޮޅުގައެވެ.