ތިން ރަށެއްގައި ތިން މަޝްރޫއެއް ހިންގުމަށް ހޯމް މިނިސްޓްރީން ފައިސާގެ އެހީ ދީފިއެވެ.
ހޯމް މިނިސްޓްރީން ފައިސާގެ އެހީދިނުމަށް މިއަދު ސޮއިކުރީ ޅ.އޮޅުވެލިފުށި ކައުންސިލާއި، އއ.ފެރިދޫ ކައުންސިލާއި، ފ.މަގޫދޫ ކައުންސިލާއެކުގައެވެ. މީގެތެރެއިން އޮޅުވެލިފުށި ކައުންސިލަށް ފައިސާގެ އެހީ ދީފައިވަނީ އެރަށުގެ ޤަބުރުސްތާނު ވަށާފާރު ރޭނުމަށެވެ. އެ އެއްބަސްވުމުގެ ދަށުން މިނިސްޓްރީން ދިނުމަށް ހަމަޖެހިފައިވަނީ ދެލައްކަ ތިރީސްފަސްހާސް ހަސަތޭކަ ސާޅީސް ތިން ރުފިޔާ ހަތްދިހަ ފަސްލާރިއެވެ. އޮޅުވެލިފުށި ކައުންސިލުން މިމަޝްރޫއަށް ހަތްދިހަ ހަތްހާސް ދުއިސައްތަ ނުވަރުފިޔާ ހަތްދިހަ ފަސް ލާރި ޚަރަދުކުރުމަށް ވަނީ ހަމަޖެހިފައެވެ.
އއ.ފެރިދޫ ކައުންސިލަށް ހޯމް މިނިސްޓްރީން ފައިސާގެ އެހީ ދީފައިވަނީ އެރަށުގައި ކުޑަކުދިންގެ ޕާރކެއް އެޅުމަށެވެ. އެ އެއްބަސްވުމުގެ ދަށުން މިނިސްޓްރީން ދިނުމަށް ހަމަޖެހިފައިވަނީ ތިން ލައްކަ ރުފިޔާއެވެ. އަދި ފެރިދޫ ކައުންސިލުން މި މަޝްރޫޢަށް ހަތަރު ލައްކަ ރުފިޔާ ޚަރަދުކުރާނެއެވެ.
މި ދެރަށުގެ އިތުރުން ހޯމް މިނިސްޓްރީން ފައިސާގެ އެހީ ދީފައިވަނީ ފ.މަގޫދޫ ކައުންސިލަށެވެ. އެރަށުގެ ކައުންސިލަށް އެހީ ދީފައިވަނީ އެރަށުގެ މަގުބައްތި މަރާމާތުކުރުމަށެވެ. މިމަޝްރޫއަށް މިނިސްޓްރީން ދިނުމަށް ހަމަޖެހިފައިވަނީ ތިން ލައްކަ ރުފިޔާ އެވެ. އަދި މި މަޝްރޫއަށް މަގޫދޫ ކައުންސިލުން ތިންލައްކަ އަށްޑިހަ ދެހާސް ރުފިޔާ ޚަރަދުކުރުމަށް ވަނީ ހަމަޖެހެހިފައެވެ.
ޖަމާޢަތުގެ ފައިދާއަށް ހިންގާ މަޝްރޫޢުތަކަށް ފައިސާގެ އެހީ ދިނުމަށް ހިންގާ މިމަޝްރޫއުގެ ދަށުން 17 ރަށަކަށް އެހީ ދިނުމަށް ވަނީ ހަމަޖެހިފައެވެ. އެއީ 6 ރަށެއްގެ ޕާރކް ހެދުމަށާއި، 6 ރަށެއްގެ މަގުބައްތި ޖެހުމަށާއި، 4 ރަށެއްގެ ޤަބުރުސްތާން ވަށާފާރު ރޭނުމަށާއި އެއް ރަށެއްގެ ނެރުބައްތި ޖެހުމަށެވެ. މި ރަށްތައް ކަނޑައަޅާފައިވަނީ ޢާއްމުކޮށް ހުޅުވާލައި، ކައުންސިލް ތަކުން ހުށައެޅި ޕްރޮޕޯސަލްތައް ބެލުމަށްފަހު އެންމެ ރަނގަޅު ޕްރޮޕޯސަލް ހުށައެޅި ރަށްތައް ބަލައިގެންކަމަށް ހޯމް މިނިސްޓްރީން މަޢުލޫމާތުދެއްވައެވެ.