ކުރިއަށް އޮތް ދެހަފްތާގެ ތެރޭގައި ނިންމުމަށް ބޭނުންވާ، ރައްޔިތުންގެ މަޖިލީހުގެ މަސައްކަތްތައް ނިންމުމަށް މިރެއާއި، މިހަފްތާގެ ބުރާސްފަތިދުވަހާއި އަންނަ އާދީއްތަ ދުވަހުވެސް މަޖިލީހުގެ ޖަލްސާ ބޭއްވުމަށް ނިންމަވައިފިއެވެ.
މަޖިލީހުގައި މިހާރު ހުރި މަސައްކަތްތަކާއި ސަރުކާރުން މަޖިލީހަށް ހުށަހަޅާފައިވާ 6 ބިލެއްގެ މަސައްކަތްތައް ނިންމުމަށްޓަކައި މަޖިލީހުގެ މަސައްކަތްތައް ރޭވިފައިވާ ގޮތާގުޅޭގޮތުން މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ، ކުރިއަށް އޮތް 2 ހަފްތާގައި މަޖިލީހުގައި މިހާރުހުރި މަސައްކަތްތައް ނިންމުމަށް ބޭނުންވާކަމަށެވެ. މިއަދު މަޖިލީހަށް ހުށަހަޅައި ވާހަކަ ދައްކަވަމުންދާ މަސްވެރިކަމުގެ ބިލަކީ މިދައުރުގައި މަޖިލީހުގައި ކުރެވޭނެ އެންމެ މުހިންމު އެއް މަސައްކަތް ކަމަށާ، މިބިލްގެ މަސައްކަތް ނިންމުމަށްޓަކައި މިއަދާއި މިރޭވެސް މަޖިލީހުގެ ޖަލްސާ އޮންނާނެކަމަށް މަޖިލީހުގެ ރައީސް ވިދާޅުވިއެވެ.
އަދި މާދަމާ ސަރުކާރުން ހުށަހަޅާ ބިލާއެކު މަޖިލީހުގައިހުރި މަސައްކަތްތައް ނިންމުމަށް މިދެހަފްތާގައި ޢާންމުކޮށް މަޖިލިސް ނޯންނަ ދެދުވަހުވެސް މަޖިލިސް ބޭއްވުމަށް ނިންމަވާފައިވާކަމަށް ރައީސް ނަޝީދު ވިދާޅުވިއެވެ.
މަޖިލީހުގައި ގިނަ މަސައްކަތްތަކެއް ހުރި އިރު، އަންނަ މަހުގެ 1އިން 2އަށް ރާއްޖޭގައި ބޭއްވުމަށް ހަމަޖެހިފައިވާ އިންޓަރޕާލިމަންޓްރީ ޔޫނިއަންގެ ދެކުނު އޭޝިއާގެ ސްޕީކަރުންގެ 4ވަނަ ބައްދަލުވުމުގައިވެސް މަޖިލިސް މެމްބަރުން ބައިވެރިވުމަށް ވަނީ ހަމަޖެހިފައެވެ. އަދި މިމަހުގެ 27އިން 29އަށް މަޖިލީހުގެ ކޮމިޓީތަކުގެ މުވައްޒަފުންނާއި މެމްބަރުން ތަމްރީން ކުރުމަށް ޚާއްސަ ޕްރޮގުރާމެއް ބޭއްވުމަށް ހަމަޖެހިފައިވާކަމަށްވެސް މަޖިލިސް ރައީސް ވިދާޅުވިއެވެ.