ވައިގެ މަގުން ރާއްޖެ އެތެރެކުރަން އުޅުނު 1.90 މިލިޔަނަށްވުރެ ގިނަ ރުފިޔާގެ މަސްތުވާތަކެތި އަތުލައިގެންފި

ވައިގެ މަގުން ރާއްޖެއަށް އެތެރެކުރަން އުޅުނު 1.90 މިލިޔަނަށްވުރެ ގިނަ ރުފިޔާގެ މަސްތުވާތަކެތި އަތުލައިގެންފިއެވެ.

ވައިގެ މަގުން އިންޑިޔާގެ ޓްރިވެންޑްރަމްއިން ރާއްޖެއަށް މަސްތުވާތަކެތި އެތެރެކުރަން އުޅެނިކޮށް އަތުލައިގެންފައިވަނީ 25 އަހަރުގެ ދިވެހި ފިރިހެނެކެވެ. ކަސްޓަމްސް އިންބުނެފައިވަނީ މިމީހާގެ އަތުން މަސްތުވާތަކެތި ފެނިފައިވަނީ އޭނާގެ އަމަލުތައް ހުރިގޮތުން، ބަލައި ފާސްކުރުމުގެތެރޭގައިކަމަށެވެ.

އޭނާގެ ލަގެޖުން ދެ ބާވަތެއްގެ މަސްތުވާތަކެތި ފެނިފައިވާކަމަށް ކަސްޓަމްސްއިން ބުނެފައިވެއެވެ. އޭގެ ތެރޭގައި ހިމެނެނީ ކޮކެއިންއަށް ޕޮޒިޓިވްވާ 1 މިލިޔަނަށްވުރެ ގިނަ ރުފިޔާގެ މަސްތުވާތަކެއްޗާއި، ހެރޮއިންއަށް ޕޮޒިޓިވްވާ 7 ލައްކައަށްވުރެ ގިނަ ރުފިޔާގެ މަސްތުވާތަކެއްތިކަމަށް ކަސްޓަމްސް އިން ބުނެއެވެ.

މި މައްސަލާގައި އަތުލައިގަތް މަސްތުވާތަކެއްޗާއި، އެތަކެތި އެތެރެކުރަން އުޅުނު މީހާ ފުލުހުންނާއި ހަވާލުކުރެވި މައްސަލަ އިތުރަށް ތަޙްޤީޤު ކުރެވެމުންދާކަމަށް ކަސްޓަމްސްއިން ބުނެފައިވެއެވެ.

ރާއްޖެއަށް އެތެރެކުރާ މަސްތުވާތަކެތި އަތުލައިގަތުމަށް ކަސްޓަމްސްއިން ހިންގަމުންދާ އޮޕަރޭޝަންތަކުގައި މިހަފްތާގައި ވަނީ ވައިގެ މަގުން އެތެރެކުރި މިލިޔަނަކަށްވުރެ ގިނަ ރުފިޔާގެ މަސްތުވާތަކެތިވެސް އަތުލައިގެންފައެވެ.